କେନ୍ଦ୍ରାପଡା ଅଫିସ, ୨୭ା୮- କେନ୍ଦ୍ର ଅଣୁ, କ୍ଷୁଦ୍ର ଓ ମଧ୍ୟମ ଉଦ୍ୟୋଗ ବିଭାଗ ମନ୍ତ୍ରୀ ପ୍ରତାପ ଷଡ଼ଙ୍ଗୀ ସ୍କିମ ଅଫ ଫଣ୍ଡ ଫର ରିଜେନେରେସନ ଅଫ ଟ୍ରାଡିସନାଲ ଇଣ୍ଡଷ୍ଟ୍ରିଜ (ଏସ୍ଏଫ୍ୟୁଆରଟିଆଇ/ ସ୍ଫୁର୍ତ୍ତୀ) ମାଧ୍ୟମରେ ରାଜ୍ୟରେ ୧୫ଟି ନଡ଼ିଆ କତା ହସ୍ତଶିଳ୍ପ କ୍ଲଷ୍ଟର ଖୋଲିବାକୁ ଘୋଷଣା କରିଛନ୍ତି ା ଏଥିସହ ଗତ ଶନିବାର ଭିଡିଓ କନଫରେନସ ମାଧ୍ୟମରେ କୋଣାର୍କ, ପୁରୀ, ବ୍ରହ୍ମପୁର, ବାଲେଶ୍ୱର ଓ କେନ୍ଦ୍ରାପଡ଼ାରେ ଏହାର ଶିଳାନ୍ୟାସ କରିଛନ୍ତି ା ଏହି ହସ୍ତଶିଳ୍ପ କ୍ଲଷ୍ଟର ଖୋଲିବା ପରେ କତା କାରିଗରଙ୍କ ପାଇଁ ନିଯୁକ୍ତି ସହ ଆର୍ଥିକ ସମୃଦ୍ଧି ଆଣିବ ବୋଲି ବିଭିନ୍ନ ମହିଳା ସ୍ବୟଂ ସହାୟକା ଗୋଷ୍ଠୀର ସଦସ୍ୟାମାନେ କହିଛନ୍ତି।
କେନ୍ଦ୍ରାପଡ଼ା ଜିଲାରେ କୌଣସି କ୍ଷୁଦ୍ର, ମଧ୍ୟମ ଓ ବୃହତ ଶିଳ୍ପ ନାହଁି। ଏପରିସ୍ଥିତିରେ ଚାଷ ପରେ ଏହି ଅଣୁଶିଳ୍ପ ପରିବାର ସଦସ୍ୟଙ୍କ ପାଇଁ ଅର୍ଥ ରୋଜଗାରର ମାଧ୍ୟମ ପାଲଟିଛି ା ପ୍ରସ୍ତାବିତ କ୍ଲଷ୍ଟର ପାଇଁ ପ୍ରାଥମିକସ୍ତରରେ ୨.୫ କୋଟି ଟଙ୍କା ଖର୍ଚ୍ଚ ହେବାକୁ ଥିବା ବେଳେ ପ୍ରର୍ଯ୍ୟାୟକ୍ରମେ କେନ୍ଦ୍ର ସରକାରଙ୍କ ପକ୍ଷରୁ ୧୦ କୋଟି ଟଙ୍କା ପ୍ରତି କ୍ଲଷ୍ଟରକୁ ଦିଆଯିବାକୁ ନିଷ୍ପତ୍ତି ହୋଇଛି ବୋଲି କେନ୍ଦ୍ରମନ୍ତ୍ରୀ ଷଡ଼ଙ୍ଗୀ ସୂଚନା ଦେଇଛନ୍ତି ା ଫଳରେ କାରିଗରମାନେ ବୈଷୟିକ ତାଲିମ ସହ ମାର୍କେଟିଂ ପାଇଁ ପ୍ରେତ୍ସାହନ ପାଇପାରିବେ। ଏନେଇ ଜିଲାର ଆକୁଳିପଡା, ପିମ୍ପୁଡି, ଆଇତିପଡା, ପଲ୍ଲିସାହାଡା, ଶାସନ, ତରାଶ, ସିଆଳିଆ ଆଦି ଗ୍ରାମରେ ବସବାସ କରୁଥିବା ୫୦୦ରୁ ଊର୍ଦ୍ଧ୍ୱ କତା ହସ୍ତଶିଳ୍ପୀ କାରିଗର ଉତ୍ସାହିତ ହୋଇଯାଇଛନ୍ତି। ଉନ୍ନତ ବୈଷୟିକ କୌଶଳରେ ନିର୍ମିତ ହସ୍ତକଳା ଦେଶ ବିଦେଶରେ ଆଦୃତ ହେବା ସହ ରୋଜଗାରର ମାଧ୍ୟମ ପାଲଟିବ ବୋଲି ବାୟାବାବା ମହିଳା କତା ସମବାୟ ସମିତି ସମ୍ପାଦିକା ଶ୍ରୀମତୀ ନାୟକ କହିଛନ୍ତି ା ସେ କହିଛନ୍ତି, ନଡ଼ିଆ କତାରେ ନିର୍ମିତ ସାମଗ୍ରୀ ପରିବେଶ ଅନୁକୂଳ ା ଏହା ପ୍ଲାଷ୍ଟିକର ଚାହିଦା କମାଇବା ସହ ସମୟ କ୍ରମେ ନଷ୍ଟ ହେବାରେ ମଧ୍ୟ ଅସୁବିଧା ହୁଏ ନାହିଁ। ଏଥିଯୋଗୁ ଏହା ପୁନର୍ବାର ଲୋକଙ୍କ ଆଦୃତି ଲାଭ କରିପାରିବ ବୋଲି ସେ ଆଶାବ୍ୟକ୍ତ କରିଛନ୍ତି।
ସେହିପରି ପୂର୍ବରୁ ସମବାୟ ସମିତିର ସଦସ୍ୟାମାନେ ମ୍ୟାଟ, କାରପେଟ, କାନ୍ଥ ଝୁଲା, ଟୋପି, ବାସ୍କେଟ, ହାତପଙ୍ଖା, ଫୁଲଦାନୀ ଆଦି ସୁନ୍ଦର ଭାବେ ପ୍ରସ୍ତୁତ କରୁଥିଲେ ମଧ୍ୟ ବିକ୍ରି ପାଇଁ ପ୍ରୋତ୍ସାହନ ମିଳୁ ନ ଥିଲା ା କ୍ଲଷ୍ଟର ମାଧ୍ୟମରେ ଦକ୍ଷତା ତାଲିମ ସହ ବିକ୍ରିକୁ ପ୍ରୋତ୍ସାହନ ମିଳୁଥିବାରୁ ସହଜରେ ଅର୍ଥଲାଭ ହୋଇ ପାରିବ ବୋଲି ସମ୍ପାଦିକା ନାୟକ ମତ ଦେଇଛନ୍ତି ା
ଏସମ୍ପର୍କରେ ଜିଲା ଶିଳ୍ପ କେନ୍ଦ୍ର ପରିଚାଳକ ସନ୍ତୋଷ କୁମାର ମିଶ୍ର କହିଛନ୍ତି, କେନ୍ଦ୍ର ସରକାରଙ୍କ ଏହି ଯୋଜନା ଜିଲା ଶିଳ୍ପ କେନ୍ଦ୍ର ଅଧୀନରେ ପରିଚାଳିତ ହେବ ା କେନ୍ଦ୍ରାପଡାରେ ଭିତରକନିକା ଜାତୀୟ ଉଦ୍ୟାନ ଥିବାରୁ ପ୍ରତିବର୍ଷ ଏଠାକୁ ଦେଶ ବିଦେଶର ବହୁ ପର୍ଯ୍ୟଟକ ଆସିଥାନ୍ତି। ସେମାନଙ୍କ ନିକଟରେ କତା ହସ୍ତକଳାକୁ ପହଞ୍ଚାଯାଇପାରିବ।
ଅନ୍ଲାଇନରେ କାଇଁଚ ସାମଗ୍ରୀ ବିକ୍ରି ହେବା ପରି କତା ହସ୍ତକଳା ସାମଗ୍ରୀକୁ ମଧ୍ୟ ବିକ୍ରି କରାଯାଇପାରିବ ା ଏହି ଶିଳ୍ପକୁ ପ୍ରୋତ୍ସାହନ ଦେବା ଲାଗି ଜିଲାର ପାରିପଙ୍ଗରା ଓ ନନତାରର ୯୦ ଜଣ କାରିଗରଙ୍କୁ ଇତିମଧ୍ୟରେ କତା ସାମଗ୍ରୀ ନିର୍ମାଣ ପାଇଁ ଶିଳ୍ପ କେନ୍ଦ୍ର ପକ୍ଷରୁ ତାଲିମ ପ୍ରଦାନ କରାଯାଇଛି। ଆଗାମୀ ଦିନରେ ଏହାର ପ୍ରଚାର ପ୍ରସାର ହେବ ା କେନ୍ଦ୍ରାପଡ଼ା ଜିଲା ମହିଳା ସଶକ୍ତୀକରଣରେ ଏହି କ୍ଲଷ୍ଟର ଏକ ଗୁରୁତ୍ୱପୂର୍ଣ୍ଣ ଭୂମିକା ନେବ ବୋଲି ସେ ଆଶାବାଦୀ ବୋଲି ଜିଲା ଶିଳ୍ପ କେନ୍ଦ୍ର ପରିଚାଳକ ମିଶ୍ର କହିଛନ୍ତି ା