ବରଗଡ଼ ଅଫିସ୍,୧୯।୬-
କରୋନା ସଂକ୍ରମଣକୁ ପ୍ରତିହତ କରିବା ପାଇଁ ଦେଶବ୍ୟାପୀ ଲକ୍ଡାଉନ୍ ହୋଇଛି । ଏଥିରେ ଉଠା ଦୋକାନୀମାନେ ନିଜର ରୋଜଗାର ହରାଇଛନ୍ତି । ମାତ୍ର ପ୍ରଶାସନିକ ଅବହେଳା ଯୋଗୁ ସେମାନେ ସରକାରୀ ସହାୟତାରୁ ବଞ୍ଚିତ ହୋଇଛନ୍ତି। ଏଭଳି ଅଭିଯୋଗ ନେଇ ଆମ୍ ଆଦମୀ ପାର୍ଟି ବରଗଡ଼ ଜିଲାର ଏକ ପ୍ରତିନିଧି ଦଳ ଜିଲାପାଳଙ୍କୁ ଫେରାଦ ହୋଇଥିଲେ । ଜିଲାପାଳ ଜ୍ୟୋତିରଞ୍ଜନ ପ୍ରଧାନଙ୍କ ଅନୁପସ୍ଥିତିରେ ସେମାନେ ଅତିରିକ୍ତ ଜିଲାପାଳ ମିର୍ଦ୍ଧା ଟପ୍ପୋଙ୍କୁ ଏକ ସ୍ମାରକପତ୍ର ପ୍ରଦାନ କରିଛନ୍ତି । ସ୍ମାରକପତ୍ରରେ ଉଲ୍ଲେଖ ଅଛି, ଉଭୟ ରାଜ୍ୟ ଓ କେନ୍ଦ୍ର ସରକାର ଉଠା ଦୋକାନୀଙ୍କ ପାଇ ବିଭିନ୍ନ ଯୋଜନା ଘୋଷଣା କରିଛନ୍ତି । ମାତ୍ର ପ୍ରଶାସନିକ ଅବହେଳାରୁ ଉଠା ଦୋକାନୀମାନେ ଚିହ୍ନଟ ହୋଇପାରି ନଥିବା ଯୋଗୁ ସେମାନଙ୍କ ପାଖକୁ ସେହି ଯୋଜନା ଅପହଞ୍ଚ ହୋଇ ପଡୁଛି । ସହରାଞ୍ଚଳର ପ୍ରାୟ ୮୦ପ୍ରତିଶତ ଉଠା ଦୋକାନୀଙ୍କ ନାମ ଏପର୍ଯ୍ୟନ୍ତ ତାଳିକାଭୁକ୍ତ ହୋଇପାରି ନାହିଁ । ଫଳରେ ସେମାନେ ସରକାରୀ ସହାୟତା ପାଇବାରୁ ବଞ୍ଚିତ ରହିଥିବା ଅଭିଯୋଗ ହୋଇଛି । ୨୦୧୭ ପର୍ଯ୍ୟନ୍ତ ପ୍ରାୟ ଏକ ହଜାର ଉଠା ଦୋକାନୀଙ୍କୁ ପ୍ରଶାସନ ଚିହ୍ନଟ କରିଥିଲା। ମାତ୍ର ସେତେବେଳେ ସହରରେ ପ୍ରାୟ ୩ହଜାର ଉଠା ଦୋକାନୀ ରହିଥିଲେ । ଏବେ ଉଠା ଦୋକାନୀଙ୍କ ସଂଖ୍ୟା ଆହୁରି ବଢ଼ିଛି । ମାତ୍ର ଉଠା ଦୋକାନୀଙ୍କ ଚିହ୍ନଟ ପ୍ରକ୍ରିୟା ଅସମ୍ପୁର୍ଣ୍ଣ ତଥା ଠିକ୍ଭାବେ ହୋଇ ନଥିବା ଯୋଗୁ ସେମାନେ ସହାୟତା ପାଇ ପାରୁନାହାନ୍ତି। ଫଳରେ ଚିହ୍ନଟ ପ୍ରକ୍ରିୟାକୁ ଠିକ୍ଭାବେ ତୁରନ୍ତ ସମାପନ କରିବା ସହିତ କେନ୍ଦ୍ର ସରକାରଙ୍କ ଘୋଷଣା ଅନୁଯାୟୀ ଉଠା ଦୋକାନୀମାନଙ୍କୁ ୧୦ହଜାର ଟଙ୍କା ପର୍ଯ୍ୟନ୍ତ ଦୀର୍ଘ ମିଆଦି ଋଣ ପ୍ରଦାନ, ସମସ୍ତ ଉଠା ଦୋକାନୀଙ୍କୁ ରାଜ୍ୟ ସରକାରଙ୍କ ପକ୍ଷରୁ ୩ହଜାର ଟଙ୍କା ଲେଖାଏ ସହାୟତା ପ୍ରଦାନ କରିବାକୁ ଦଳ ଦାବି କରିଛି। ଦଳର ଜିଲା ଆବାହକ ଭବାନୀ ପ୍ରସାଦ ସାହୁ, ଜିଲା ଉଠା ଦୋକାନୀ ସଂଘର ଆବାହକ ଅମିତାଭ ପାତ୍ର ପ୍ରମୁଖ ସ୍ମାରକପତ୍ର ପ୍ରଦାନବେଳେ ଉପସ୍ଥିତ ଥିଲେ ।