କେନ୍ଦୁଝର, ୩୦ା୩(ସ୍ବ.ପ୍ର.)-ସମଗ୍ର ବିଶ୍ୱରେ ଏବେ କରୋନା ଭୂତାଣୁ ଆତଙ୍କ ଖେଳାଇବା ପରେ କେନ୍ଦ୍ର ସରକାରଙ୍କ ପକ୍ଷରୁ ୨୧ଦିନିଆ ଲକ୍ଡାଉନ ଘୋଷଣା କରାଯାଇଛି। ଜରୁରୀ କାମ ନ ଥିଲେ ଲୋକେ ପଦାକୁ ବାହାରି । ଏଭଳି ପରିସ୍ଥିତିରେ ବାହାରୁ ରାଜ୍ୟରୁ ଆସି ପେଟ ପୋଷୁଥିବା ଓଟ ମାଲିକମାନେ ଏବେ ରୋଜଗାର ହରାଇ ବ୍ୟତିବ୍ୟସ୍ତ ହୋଇ ଘରମୁହାଁ ହୋଇଛନ୍ତି। ଏପରିକି ଯାନବାହନ ସୁବିଧା ନ ଥିବାରୁ ସେମାନେ ଘରକୁ ଚାଲି ଚାଲି ଯାଉଥିବା ଦେଖିବାକୁ ମିଳିଛି।
କରୋନା କଟକଣା ଯୋଗୁ ଏବେ ପର୍ଯ୍ୟଟନ କେନ୍ଦ୍ରଗୁଡିକ ଖାଁ ଖାଁ ହୋଇପଡ଼ିଛିି। ପୁରୀ ବେଳାଭୂମିରେ ଉତ୍ତରପ୍ରଦେଶର ଓଟମାଲିକମାନେ ପର୍ଯ୍ୟଟକଙ୍କ ଆମୋଦପ୍ରମୋଦ କରି ପେଟ ପୋଷୁଥିଲେ। ଏବେ କିଛି ରୋଜଗାର ହେଉ ନ ଥିବାରୁ ବଞ୍ଚିବା ସେମାନଙ୍କ ପକ୍ଷେ କଷ୍ଟକର ହୋଇପଡିଛି। ସେମାନେ ଓଟ ଧରି ଚାଲି ଚାଲି ଘରକୁ ଫେରିଯିବାକୁ ଚିନ୍ତା କରି ବାହାରି ପଡିଛନ୍ତି। ୯ଜଣ ଆରୋହୀ ସେମାନଙ୍କର ଓଟ ସହିତ ୨୦ନଂ. ଜାତୀୟ ରାଜପଥ ଦେଇ ରବିବାର ସକାଳେ ଚାଲି ଚାଲି ଯାଉଥିବା ଦେଖିବାକୁ ମିଳିଥିଲା। ସେମାନଙ୍କ ଘର ସୁଦୂର ଉତ୍ତରପ୍ରଦେଶ ଓ ସେମାନେ ପୁରୀ ବେଳାଭୂମିରେ ଓଟ ଗୁଡିକୁନେଇ ପରିବାର ପ୍ରତିପୋଷଣ କରିଆସୁଥିଲେ ବୋଲି କହିଛନ୍ତି। ପୁରୀରୁ ଉତ୍ତରପ୍ରଦେଶର ଦୂରତ୍ୱ ପ୍ରାୟ ୧୦୦୦କି.ମି। କରୋନାକୁ ନେଇ ଲକ୍ଡାଉନ ପରେ ସେମାନେ ଜୀବନ ବିକଳରେ ଗତ ୨୩ ତାରିଖଠାରୁ ଘରମୁହାଁ ହୋଇଥିବା କହିଛନ୍ତି। ଭୋକ ଓପାସରେ ଜୀବନ ବଞ୍ଚାଇବା ପାଇଁ ସେମାନେ ପଳାଇଯାଉଥିବା ବେଳେ ସ୍ଥାନୀୟ ଲୋକେ ସେମାନଙ୍କୁ ସହାନୁଭୂତି ପ୍ରଦର୍ଶନ କରୁଛନ୍ତି। ଯିବା ରାସ୍ତାରେ ସେମାନେ ନିଜର ତଥା ଓଟମାନଙ୍କ ଭୋକିଲା ପେଟ ପାଇଁ ହାତ ପାତୁଥିବା ମଧ୍ୟ ଦେଖିବାକୁ ମିଳିଛି।