ନୟାଗଡ଼ ଅଫିସ,୩୦।୭- ଭ୍ରାତୃତ୍ୱ, ବନ୍ଧୁତ୍ୱ, ଭାଇଚାରା ଏବଂ ନିଃସ୍ବାର୍ଥପର ସେବା ରୋଟାରିଆନ୍ମାନଙ୍କ ନିଜସ୍ବ ପରିଚୟ ହେଉ। ସମାଜରେ ଅନ୍ୟସବୁ କିଛି କାର୍ଯ୍ୟ ପାଇଁ ଲୋକେ ଆଗ୍ରହ ଦେଖାଉଥିବା ବେଳେ ସ୍ବତଃପ୍ରବୃତ୍ତ ଭାବେ ସେବା କରିବାର ମାନସିକତାଠାରୁ ଆଜିର ଯୁବପିଢ଼ି ଦୂରେଇ ଯାଉଛନ୍ତି। ତେଣୁ ପ୍ରତ୍ୟେକ ସ୍ବେଚ୍ଛାସେବୀ ଅନୁଷ୍ଠାନ ଅତିକମ୍ରେ ୧୦ ଜଣ ସ୍ବେଚ୍ଛାସେବୀଙ୍କୁ ସୃଷ୍ଟି କରିବା ପାଇଁ ଯତ୍ନବାନ ହେବା ଦରକାର ବୋଲି ସ୍ଥାନୀୟ ବିଧାୟକ ତଥା କୃଷି ଓ କୃଷକ ସଶକ୍ତୀକରଣ, ମତ୍ସ୍ୟ, ପଶୁସମ୍ପଦ ଏବଂ ଉଚ୍ଚ ଶିକ୍ଷାମନ୍ତ୍ରୀ ଡ. ଅରୁଣ କୁମାର ସାହୁ ମତବ୍ୟକ୍ତ କରିଛନ୍ତି। ଆଇନଜୀବୀ ରଣଜିତ୍ ଦାଶଙ୍କ ପୌରୋହିତ୍ୟରେ ଅନୁଷ୍ଠିତ ୩୦ତମ ରୋଟାରୀ ଅଧିତ୍ଷ୍ଠାନ ଦିବସରେ ମୁଖ୍ୟ ଅତିଥିଭାବେ ମନ୍ତ୍ରୀ ସାହୁ ଯୋଗଦେଇ ଉପରୋକ୍ତ ବକ୍ତବ୍ୟ ରଖିଥିଲେ। ଜିଲାପାଳ ଡା. ଏନ୍. ତିରୁମାଲା ନାୟକ ଯୋଗଦେଇ ରୋଟାରୀ କ୍ଲବର ବିଭିନ୍ନ କାର୍ଯ୍ୟକ୍ରମକୁ ପ୍ରଶଂସା କରିବା ସହିତ ଜିଲା ପ୍ରଶାସନର ସହଯୋଗ ସର୍ବଦା ରହିବ ବୋଲି ପ୍ରକାଶ କରିଥିଲେ। ନୂତନ ସଭାପତି ଭାବେ ଇଂ. ମଦନ ମୋହନ ମହାପାତ୍ର ଏବଂ ସମ୍ପାଦକ ଭାବେ ପ୍ରବୀର କୁମାର ପୃଷ୍ଟି ଅଧିଷ୍ଠିତ ହୋଇଥିଲେ। ବିଦାୟୀ ସମ୍ପାଦକ ଲକ୍ଷ୍ମୀନାରାୟଣ ରଥ ବାର୍ଷିକ ବିବରଣୀ ପାଠ କରିଥିଲେ। ଆସିଷ୍ଟାଣ୍ଟ ଗଭର୍ନର ରମେଶ ଚନ୍ଦ୍ର ସାହୁ ନୂତନ କର୍ମକର୍ତ୍ତାମାନଙ୍କୁ ଶପଥ ପାଠ କରାଇଥିଲେ। ମୁଖ୍ୟ ସଂଯୋଜକ ରୋଟାରିଆନ୍ ପ୍ରମୋଦ ପଟ୍ଟନାୟକ ଉତ୍ସବର ଉଦ୍ଦେଶ୍ୟ ଏବଂ ବିଭିନ୍ନ ଜନହିତକର କାର୍ଯ୍ୟକ୍ରମରେ ରୋଟାରୀ କ୍ଲବର ସମ୍ପୃକ୍ତି ବିଷୟରେ ବର୍ଣ୍ଣନା କରିଥିଲେ। ପ୍ରସନ୍ନ କୁମାର ବସନ୍ତିଆ ରୋଟାରୀ ପରିବାର ସଦସ୍ୟଙ୍କ ଶିକ୍ଷାଗତ ସଫଳତା ପାଇଁ ଡାକ୍ତର ପ୍ରିୟମ ପଟ୍ଟନାୟକ, ପ୍ରବୋଧ ବସନ୍ତିଆ, ଆଇଜାକ୍ ଦାସ ଏବଂ ନିବାସା ଜ୍ୟୋତିଙ୍କ ନାମ ଘୋଷଣା କରିବା ପରେ ମନ୍ତ୍ରୀ ସାହୁ ସେମାନଙ୍କୁ ସମ୍ବର୍ଦ୍ଧିତ କରିଥିଲେ। ଏହା ପରେ କ୍ଲବ ତରଫରୁ ମନ୍ତ୍ରୀ ଏବଂ ଜିଲାପାଳଙ୍କୁ ସମ୍ବର୍ଦ୍ଧିତ କରାଯାଇଥିଲା। ଇନରହ୍ବିଲ କ୍ଲବର ପ୍ରତିଷ୍ଠାତା ରୋଟାରିଆନ୍ ନିରୁପମା ପଟ୍ଟନାୟକ ଧନ୍ୟବାଦ ଦେଇଥିଲେ।