ମେଲବୋର୍ନ,୨୫।୧୨(ଏଏଫ୍ପି)- ଅଷ୍ଟ୍ରେଲିଆ ଓ ଭ୍ରମଣକାରୀ ନ୍ୟୁଜିଲାଣ୍ଡ ମଧ୍ୟରେ ଦ୍ୱିତୀୟ ତଥା ବକ୍ସିଂ ଡେ ଟେଷ୍ଟ ମ୍ୟାଚ୍ ଗୁରୁବାରଠାରୁ ଆରମ୍ଭ ହେବାକୁ ଯାଉଛି। ମେଲବୋର୍ନ କ୍ରିକେଟ ଗ୍ରାଉଣ୍ଡରେ ଦୀର୍ଘ ୩୦ ବର୍ଷ ପରେ ନ୍ୟୁଜିଲାଣ୍ଡ ବକ୍ସିଂ ଡେ ଟେଷ୍ଟ ଖେଳିବାକୁ ଯାଉଛି। ତାରକା ଦ୍ରୁତ ବୋଲର ଟ୍ରେଣ୍ଟ ବୋଲ୍ଟଙ୍କ ଦମ୍ଦାର ପ୍ରଦର୍ଶନ ସହାୟତାରେ ନ୍ୟୁଜିଲାଣ୍ଡ ବିଜୟୀ ହେବା ଲକ୍ଷ୍ୟରେ ରହିଛି।
ସାଇଡ୍ ଷ୍ଟ୍ରେନ୍ ଜନିତ ଆଘାତ ସମସ୍ୟା କାରଣରୁ ବୋଲ୍ଟ ପର୍ଥରେ ଖେଳାଯାଇଥିବା ପ୍ରଥମ ଟେଷ୍ଟ ମ୍ୟାଚ୍ ଖେଳିପାରି ନ ଥିଲେ। ଏଥିରେ ନ୍ୟୁଜିଲାଣ୍ଡ ବୃହତ୍ ୨୯୬ ରନରେ ପରାସ୍ତ ହୋଇଥିଲା। ବୋଲ୍ଟ ନେଟ୍ସରେ ବେଶ୍ ଝାଳ ବୁହାଇଛନ୍ତି ଓ ସେ ଦ୍ୱିତୀୟ ଟେଷ୍ଟ ଖେଳିବେ ବୋଲି ଆଶା କରାଯାଉଛି। ପାଖାପାଖି ଏକ ଲକ୍ଷ ଦର୍ଶକଙ୍କ ଉପସ୍ଥିତିରେ ଏହି ମ୍ୟାଚ୍ ବେଶ୍ ରୋମଞ୍ଚକ ହେବ ବୋଲି ଆଶା କରାଯାଉଛି। ବହୁ ସଂଖ୍ୟାରେ ନ୍ୟୁଜିଲାଣ୍ଡ ଦର୍ଶକ ମଧ୍ୟ ଉପସ୍ଥିତ ରହି ନିଜ ଦଳକୁ ଉତ୍ସାହିତ କରିବେ। ନ୍ୟୁଜିଲାଣ୍ଡ ଦର୍ଶକଙ୍କ ପାଇଁ ଅକଲାଣ୍ଡ ଓ ମେଲବୋର୍ନ ମଧ୍ୟରେ ଅତିରକ୍ତି ବିମାନ ଉଡାଣ ବ୍ୟବସ୍ଥା କରାଯାଇଛି।
ଶେଷଥର ପାଇଁ ନ୍ୟୁଜିଲାଣ୍ଡ ଓ ଅଷ୍ଟ୍ରେଲିଆ ୧୯୮୭ରେ ବକ୍ସିଂ ଡେ ଟେଷ୍ଟରେ ପରସ୍ପରକୁ ଭେଟିଥିଲେ। ସେତେବେଳର ତାରକା ବୋଲର ରିଚାର୍ଡ ହାର୍ଡଲି ଦମ୍ଦାର ପ୍ରଦର୍ଶନ କରି ଏହି ମ୍ୟାଚ୍କୁ ଡ୍ର ରଖିବାରେ ପ୍ରମୁଖ ଭୂମିକା ଗ୍ରହଣ କରିଥିଲେ। ଏମ୍ସିଜିର ଉଇକେଟ କିଭଳି ରଙ୍ଗ ଦେଖାଇବ ଅବଶ୍ୟ ତାହା ଅଜଣା ରହିଛି। ଏକ ନୂଆ ପିଚ୍ ପ୍ରସ୍ତୁତ କରିବା ପାଇଁ ଗ୍ରାଉଣ୍ଡ କ୍ୟୁରେଟର ମ୍ୟାଟ୍ ପେଜ ପ୍ରୟାସ ଜାରି ରଖିଛନ୍ତି। ପର୍ଥ ଟେଷ୍ଟରେ ଆହତ ହୋଇଥିବା ଜୋସ ହାଜେଲଉଡଙ୍କ ବଦଳରେ ଜେମ୍ସ ପାଟିନସନ ଖେଳିବେ। ସେହିପରି ପ୍ୟାଟ କୁମିନ୍ସ ଓ ମିଚେଲ ଷ୍ଟାର୍କ ମଧ୍ୟ କମାଲ କରିବେ ବୋଲି ଆଶା କରାଯାଉଛି। ଅଭିଜ୍ଞ ସ୍ପିନର ନାଥନ ଲିୟନ ମଧ୍ୟ ଉପଯୋଗୀ ସାବ୍ୟସ୍ତ ହେବେ। ଜବରଦସ୍ତ ଫର୍ମରେ ଥିବା ୩ ନମ୍ବର ବ୍ୟାଟ୍ସମ୍ୟାନ ୨୫ ବର୍ଷୀୟ ମାର୍ନସ ଲାବୁସେନଙ୍କ ଉପରେ ସମସ୍ତଙ୍କ ନଜର ରହିବ। ସେ କ୍ରମାଗତ ୩ଟି ଶତକ ଅର୍ଜନ କରିବା ସହ ଦ୍ୱିତୀୟ ଇନିଂସରେ ଅର୍ଦ୍ଧଶତକ ମଧ୍ୟ ହାସଲ କରିଛନ୍ତି। ପ୍ରଥମ ମ୍ୟାଚ୍ ହାତଛଡ଼ା କରିଥିବାରୁ ନ୍ୟୁଜିଲାଣ୍ଡ ସିରିଜକୁ ଫେରିବା ପାଇଁ ଏହି ମ୍ୟାଚ୍ରେ ଜିତିବା ଜରୁରୀ ହୋଇ ପଡିଛି। ଅନ୍ୟପଟେ ଏହି ମ୍ୟାଚ୍ ଜିତି ଅଷ୍ଟ୍ରେଲିଆ ୨-୦ରେ ଅଗ୍ରଣୀ ହେବା ସହ ଆଗୁଆ ସିରିଜ ହାତେଇ ଖ୍ରୀଷ୍ଟମାସ ନୂଆ ଭେଟି ଦେବା ଲକ୍ଷ୍ୟରେ ରହିଛି। ବକ୍ସିଂ ଡେ ରେ ଏହି ଟେଷ୍ଟ ଆରମ୍ଭ ହେଉଥିବାରୁ ଓ ଏବେ ଛୁଟି ଚାଲିଥିବାରୁ ଷ୍ଟାଡିୟମରେ ଦର୍ଶକଙ୍କ ଭିଡ ପରିଲକ୍ଷିତ ହେବ। ମ୍ୟାଚ୍ ରୋମାଞ୍ଚକ ହେବ ବୋଲି ଆଶା କରାଯାଉଛି।
ଅଷ୍ଟ୍ରେଲିଆ ଦଳ: ଡେଭିଡ ଓ୍ବାର୍ନର, ଜୋ ବନର୍ସ, ମର୍ନସ ଲାବୁସେନ, ଷ୍ଟିଭ ସ୍ମିଥ୍, ମାଥ୍ୟୁ ଓ୍ବେଡ, ଟ୍ରାଭିସ ହେଡ, ଟିମ୍ ପେନ (ଅଧିନାୟକ), ପ୍ୟାଟ୍ କୁମିନ୍ସ, ମିଚେଲ ଷ୍ଟାର୍କ, ନାଥନ ଲିୟନ, ଜେମ୍ସ ପାଟିନସନ, ମିଚେଲ ନେସେର ଓ ପିଟର ସିଡଲ।
ନ୍ୟୁଜିଲାଣ୍ଡ ଦଳ: ଟୋଡ୍ଡ ଆସଲେ, ଟମ୍ ବ୍ଲଣ୍ଡେଲ, ଟ୍ରେଣ୍ଟ ବୋଲ୍ଟ, କଲିନ ଡି ଗ୍ରାଣ୍ଡହୋମ, ଲୋକି ଫର୍ଗୁସନ, ମ୍ୟାନ ହେନେରୀ, ଟମ୍ ଲାଥମ, ହେନେରୀ ନିକୋଲ୍ସ, ଜିତ୍ ରାଭାଲ, ମିଚେଲ ସାଣ୍ଟନର, ଟିମ୍ ସୌଦି, ରସ୍ ଟେଲର, ବିଜେ ଓ୍ବାଟଲିଂ, ନେଲ ଓ୍ବାଗନର ଓ କେନ୍ ଓ୍ବିଲିୟମସନ।