ଭୁବନେଶ୍ୱର,୧୭।୨(ବ୍ୟୁରୋ): ଇନ୍ଫୋସିଟି ଥାନା ବଜରଙ୍ଗବିହାରରେ ଗତ ୧୦ ତାରିଖରେ ରୋମାନ୍ସବେଳେ ଗୁଳି ଫୁଟି ଯୁବତୀଙ୍କ ଜଙ୍ଘରେ ପଶିଯିବା ଘଟଣାରେ ପୋଲିସ ଅଭିଯୁକ୍ତଙ୍କୁ ଧରିଥିଲେ ମଧ୍ୟ ଏ ପର୍ଯ୍ୟନ୍ତ ବନ୍ଧୁକ ଜବତ କରିପାରିନାହିଁ। ଏପରି କି ବନ୍ଧୁକ ଲୁଚାଇ ରଖିଥିବା ରାଜେଶ ତରାଇ ପ୍ରଥମ ଦିନରୁ ହିଁ ପୋଲିସକୁ ଭୁଆଁ ବୁଲାଇଥିଲେ। ତାଙ୍କର ଭିନ୍ନ ଭିନ୍ନ ବୟାନ ଆଧାରରେ ପୋଲିସ ରଘୁନାଥପୁର ଗଙ୍ଗୁଆନାଳରେ ବନ୍ଧୁକ ଖୋଜିଥିଲେ। ଏପରିକି ପୋଲିସ ରାଜେଶଙ୍କୁ ନେଇ ଉକ୍ତ ସ୍ଥାନ ବୁଲାଇଥିଲେ ମଧ୍ୟ ବନ୍ଧୁକ ପାଇ ନ ଥିଲେ। ପରେ ପୁଣି ସେ ବନ୍ଧୁକକୁ ଅନ୍ୟଜଣେ ସାଙ୍ଗକୁ ଦେଇଦେଇଥିବା କହିଥିଲେ। ଏହିଭଳି ପୋଲିସ ତଦନ୍ତ ପାଇଁ ତାଙ୍କୁ ସକାଳେ ଥାନାକୁ ଡାକିବା ସହ ସନ୍ଧ୍ୟାରେ ଘରକୁ ଛାଡୁଥିଲେ। କିନ୍ତୁ ସେ ବନ୍ଧୁକ କେଉଁଠି ଲୁଚାଇ ରଖିଛନ୍ତି, ସେନେଇ ସତ କଥା କହୁ ନ ଥିବାବେଳେ ଶେଷରେ ରବିବାର ପୋଲିସ ରାଜେଶଙ୍କୁ ଗିରଫ କରିଛି। ରାଜେଶଙ୍କ ଘର ନିଆଳି ଅଞ୍ଚଳରେ ହୋଇଥିବାବେଳେ ସେ ରଘୁନାଥପୁର ମାରୁତିଭିଲା ଆପାର୍ଟମେଣ୍ଟରେ ରହୁଛନ୍ତି। ତେବେ ରାଜେଶ ଉକ୍ତ ବନ୍ଧୁକକୁ ତାଙ୍କର ଜଣେ ସାଙ୍ଗଙ୍କୁ ଦେଇଥିବା ପୋଲିସକୁ ଶେଷ ମୁହୂର୍ତ୍ତରେ କହିବା ପରେ ଖୋଳତାଡ଼ ଆରମ୍ଭ ହୋଇଛି। ବନ୍ଧୁକ ନେଇଥିବା ରାଜେଶର ସାଙ୍ଗ ଏବେ ଫେରାର ଥିବାରୁ ତାଙ୍କୁ ଧରିବା ପାଇଁ ସ୍ପେଶାଲ ସ୍କ୍ବାଡ୍କୁ ଉକ୍ତ ମାମଲା ହସ୍ତାନ୍ତର କରାଯାଇପାରେ ବୋଲି ସୂଚନା ମିଳିଛି। ଅନ୍ୟପକ୍ଷରେ ରାଜେଶଙ୍କ ବିରୋଧରେ ପୋଲିସ ଦଫା ୩୦୭, ୨୦୧, ୩୪ ଏବଂ ୨୫, ୨୭ ଆମର୍ସ ଆକ୍ଟ ଲଗାଇ କୋର୍ଟ ଚାଲାଣ କରିଛି। ପୂର୍ବରୁ ଏହି ଗୁଳିମାଡ଼ ମାମଲା ପୋଲିସ ଜଗତ୍ସଂହପୁର ଜିଲାର ଆଶିଷ କୁମାର ନାୟକ ଏବଂ ପ୍ରଦୀପ ଅଗସ୍ତିଙ୍କୁ ଗିରଫ କରିଛି।
ତେବେ ଗିରଫ ରାଜେଶଙ୍କଠାରୁ ପୋଲିସ ବହୁ ଗୁରୁତ୍ୱପୂର୍ଣ୍ଣ ତଥ୍ୟ ପାଇଛି। ପଚରାଉଚରାବେଳେ ଘଟଣା ସଂକ୍ରାନ୍ତରେ ସେ କହିଛନ୍ତି, ଗୁଳି ଫୁଟିବା ପୂର୍ବ ରାତିରେ ପ୍ରଦୀପ ଯୁବତୀଙ୍କ ରୁମ୍ରେ ରହୁଥିଲେ। ପରଦିନ ସକାଳ ୧୧ଟାରେ ପ୍ରଦୀପ ଫୋନ୍ କରି ଖାଇବା ଆଣିବା ପାଇଁ ଆଶିଷଙ୍କୁ କହିଥିଲେ। ଆଶିଷ ଖାଇବା ଆଣି ଉକ୍ତ ରୁମ୍କୁ ଯାଇଥିଲେ। ହେଲେ ତାଙ୍କ ଅଣ୍ଟାରେ ବନ୍ଧୁକ ଦେଖି ଯୁବତୀ ଜଣକ କିଭଳି ଫୁଟୁଛି ବୋଲି ପଚାରିଥିଲେ। ବନ୍ଧୁକ ଦେଖାଦେଖି ଭିତରେ ଅସାବଧାନତା ବଶତଃ ଟ୍ରିଗର ଉପରେ ହାତ ପଡିଯାଇଥିଲା। ଫଳରେ ଗୁଳିଟି ଫୁଟିଯିବା ସହ ସିଧା ଯୁବତୀଙ୍କ ଜଙ୍ଘରେ ପଶିଯାଇଥିଲା। ଯୁବତୀଙ୍କୁ ଉଦ୍ଧାର କରି ପ୍ରଦୀପ ଓ ଆଶିଷ ହସ୍ପିଟାଲ ନେଇଥିବା ବେଳେ ରାଜେଶ ଉକ୍ତ ରୁମ୍କୁ ଯାଇ ବନ୍ଧୁକ ନେଇ ଲୁଚାଇ ଦେଇଥିଲେ। ପରେ ଜଣେ ସାଙ୍ଗଙ୍କୁ ଉକ୍ତ ବନ୍ଧୁକ ଦେଇଥିଲେ ବୋଲି ପୋଲିସ ନିକଟରେ ରାଜେଶ ସ୍ବୀକାର କରିଛନ୍ତି।