ରାଞ୍ଚି,୨୦।୧୦- ଏଠାରେ ଭାରତ ଓ ଦକ୍ଷିଣ ଆଫ୍ରିକା ମଧ୍ୟରେ ଚାଲିଥିବା ତୃତୀୟ ଟେଷ୍ଟର ଦ୍ୱିତୀୟ ଦିନ ମଧ୍ୟ ଖରାପ ଆଲୋକ ଯୋଗୁ ଶୀଘ୍ର ଖେଳ ବନ୍ଦ ହୋଇଯାଇଛି। ଭାରତୀୟ ଦଳ ତା’ର ଅସମାପ୍ତ ପ୍ରଥମ ଇନିଂସ ସ୍କୋର ୨୨୪/୩ରୁ ବ୍ୟାଟିଂ ଆରମ୍ଭ କରି ୪୯୭/୯ ଥିବାବେଳେ ଇନିଂସ ଘୋଷଣା କରିଥିଲା। ଅଜିଙ୍କ୍ୟ ରାହାନେ ନିଜ କ୍ୟାରିୟରର ୧୧ତମ ଶତକ ପୂରଣ କରିବା ପରେ ୧୧୫ ରନ୍ କରି ଆଉଟ୍ ହୋଇଥିଲେ। ସେ ଆଉଟ୍ ହେବା ପୂର୍ବରୁ ରୋହିତ ଶର୍ମାଙ୍କ ସହ ମିଶି ୪ର୍ଥ ଉଇକେଟ ପାଇଁ ୨୭୭ ରନ୍ ଯୋଡ଼ିଥିଲେ। ରୋହିତ କ୍ୟାରିୟରର ପ୍ରଥମ ଟେଷ୍ଟ ଦ୍ୱିଶତକ ଅର୍ଜନ କରିଥିଲେ। ୨୮ ଚୌକା ଓ ୬ ଛକା ସହାୟତାରେ ୨୧୨ ରନ୍ କରିଥିବା ରୋହିତ କାଗିସୋ ରବାଡାଙ୍କ ବଲରେ ଲୁଙ୍ଗି ଏନ୍ଗିଡିଙ୍କୁ ଦ୍ୱାରା କ୍ୟାଚ୍ ଆଉଟ୍ ହୋଇଥିଲେ। ଭ୍ରମଣକାରୀ ଦଳ ପାଇଁ ଜର୍ଜ ଲିଣ୍ଡେ ୪ ଓ ରବାଡା ୩ ଉଇକେଟ ନେଇଥିଲେ। ଏହାପରେ ପ୍ରଥମ ଇନିଂସ ବ୍ୟାଟିଂ ଆରମ୍ଭ କରିଥିବା ଦକ୍ଷିଣ ଆଫ୍ରିକା କ୍ରମାଗତ ଦୁଇ ଓଭରରେ ଦୁଇ ଓପନରଙ୍କୁ ହରାଇଥିଲା। ଡିନ ଏଲଗାର ଖାତା ଖୋଲିପାରି ନ ଥିବାବେଳେ କୁଇଣ୍ଟନ ଡିକକ୍ ୪ ରନ୍ କରିଥିଲେ। ଦଳ ମାତ୍ର ୫ ଓଭର ଖେଳି ଦୁଇ ଉଇକେଟ ହରାଇ ୯ ରନ୍ କରିବାକୁ ସକ୍ଷମ ହୋଇଥିଲା। ଭାରତ ପକ୍ଷରୁ ବୋଲିଂରେ ଉମେଶ ଯାଦବ ଓ ମହମ୍ମଦ ସାମି ଗୋଟିଏ ଲେଖାଏ ଉଇକେଟ ନେଇଥିଲେ। ଦକ୍ଷିଣ ଆଫ୍ରିକାକୁ ଇନିଂସ ଅଗ୍ରଣୀ ପାଇଁ ବଳକା ୮ ଉଇକେଟରେ ୪୮୮ ରନ୍ ଦରକାର।