ନୂଆଦିଲ୍ଲୀ,୩।୧୧- ବାଂଲାଦେଶ ବିପକ୍ଷ ପ୍ରଥମ ମ୍ୟାଚ୍ ପୂର୍ବରୁ ୧୯ ବର୍ଷୀୟ ଲୋକାଲ ପେସର କେଶବ ଦବସ ଭାରତୀୟ ଓପନର ରୋହିତ ଶର୍ମା ଓ ଶିଖର ଧାଓ୍ବନଙ୍କୁ ଚକିତ କରିଦେଇଛନ୍ତି। ସେ ନିଜର ଦକ୍ଷ ବୋଲିଂରେ ରୋହିତଙ୍କୁ ଆଉଟ କରିବା ପରେ ଧାଓ୍ବନଙ୍କୁ ଉଇକେଟ ଓପାଡ଼ି ଦେଇଛନ୍ତି। ଏହି ଘଟଣା ଭାରତୀୟ ଦଳର ଅଭ୍ୟାସ ସେସନରେ ଘଟିଥିଲା। ଏକ ସାକ୍ଷାତ୍କାର ଦେଇ କହିଛନ୍ତି, ଦେଶର ଦୁଇ ଦକ୍ଷ ବ୍ୟାଟ୍ସମ୍ୟାନଙ୍କୁ ଆଉଟ୍ କରି ଚମତ୍କାର ଅନୁଭବ କରୁଛି। କ’ଣ କହିବି ଜାଣି ପାରୁ ନାହିଁ। ମୋତେ ଦଳୀୟ ବୋଲର ଶାର୍ଦ୍ଦୁଳ ଠାକୁର ପ୍ରଶଂସା କରିଥିଲେ। ରିପୋର୍ଟ ଅନୁଯାୟୀ ଭଲ ଲେନ୍ଥରେ ଓ ଅତ୍ୟଧିକ ବାଉନ୍ସ ଯୋଗୁ ବଲ ରୋହିତଙ୍କ ବ୍ୟାଟ୍ର ଏଜ୍ ନେଇଥିଲା। କାମଚଳା ଅଧିନାୟକ ବଲ ଫେରାଇବା ପୂର୍ବରୁ କେଶବ ଉଲ୍ଲସିତ ହୋଇ ପବନରେ ମୁଥା ମାରିଥିଲେ। କିନ୍ତୁ ଧାଓ୍ବନଙ୍କୁ କ୍ଲିନ ବୋଲ୍ଡ କରିବା ପରେ ୧୯ ବର୍ଷୀୟ ପେସର କିଛି ରିଆକଶନ ଦେଇ ନ ଥିଲେ। ଅନ୍ତର୍ଜାତୀୟ କ୍ରିକେଟରଙ୍କୁ ବୋଲିଂ କରିବା ତାଙ୍କ ପାଇଁ ନୂଆ ଘଟଣା ନୁହେଁ। ଚଳିତ ବର୍ଷ ଅଷ୍ଟ୍ରେଲିଆ ବିପକ୍ଷ ସିରିଜ୍ବେଳେ ଭାରତୀୟ ବ୍ୟାଟ୍ସମ୍ୟାନଙ୍କ ବୋଲିଂ କରିଥିଲେ।
