ବଲାଙ୍ଗୀର ଅଫିସ, ୨୬ା୫
ବଲାଙ୍ଗୀର ଜିଲାରେ ଗତ କିଛିଦିନ ହେଲା ଗ୍ରୀଷ୍ମ ପ୍ରବାହ ଜାରି ରହିଛି ା ରାଜ୍ୟର ସର୍ବାଧିକ ତାପମାତ୍ରା ଟିଟିଲାଗଡ଼ରେ ରେକର୍ଡ କରାଯାଇଛି ା ଟିଟିଲାଗଡ଼ରେ ରବିବାର ୪୫.୮ ଡିଗ୍ରୀ ତାପମାତ୍ରା ରେକର୍ଡ କରାଯାଇଥିବା ବେଳେ ସୋମବାର ତାପମାତ୍ରା ୪୫.୫ ଡିଗ୍ରୀ ରେକର୍ଡ କରାଯାଇଛି ା ଉଭୟ ଦିନ ବଲାଙ୍ଗୀର ତାପମାତ୍ରା ସମାନ ଭାବେ ୪୪.୮ ଡିଗ୍ରୀ ରେକର୍ଡ କରାଯାଇଛି ା ଜିଲାର ପ୍ରାୟ ସମସ୍ତ ଅଞ୍ଚଳରେ ପ୍ରଚଣ୍ଡ ରୌଦ୍ରତାପ ଯୋଗୁ ସ୍ବାଭାବିକ ଜୀବନ ଯାତ୍ରା ପ୍ରଭାବିତ ହୋଇଛି ା ପୂର୍ବାହ୍ନ ୧୦ଟାରୁ ଟାଣଖରା ଅନୁଭୂତ ହେଉଛି ା ଲକ୍ଡାଉନ୍ ଯୋଗୁ ପ୍ରଶାସନ ପକ୍ଷରୁ ସକାଳ ୭ଟାରୁ ସନ୍ଧ୍ୟା ୭ଟା ପର୍ଯ୍ୟନ୍ତ ଦୋକାନ ବଜାର ଖୋଲିବାକୁ ନିର୍ଦ୍ଦେଶ ଦିଆଯାଇଛି ା ଗତ ୩ ଦିନରୁ ଉର୍ଦ୍ଧ୍ୱ ହେଲା ପ୍ରଚଣ୍ଡ ଗ୍ରୀଷ୍ମ ପ୍ରବାହ ଜାରି ରହିଥିବାରୁ ଜିଲାରେ ଅଂଶୁଘାତ ଆଶଙ୍କା ବୃଦ୍ଧି ପାଇଛି ା ଆଖପାଖ ଗ୍ରାମରୁ ପ୍ରତ୍ୟହ ବଲାଙ୍ଗୀର ଡେଲିମାର୍କେଟକୁ ପନିପରିବା, ଦୁଗ୍ଧ ଓ ଅନ୍ୟାନ୍ୟ ସାମଗ୍ରୀ ଆଣୁଥିବା ଚାଷୀ, ବ୍ୟବସାୟୀମାନେ ଘରକୁ ଫେରିବା ବେଳେ ଟାଣ ଖରା ଯୋଗୁ ଅସୁବିଧାର ସମ୍ମୁଖୀନ ହେଉଛନ୍ତି ା ଖରା ଯୋଗୁ ପୂର୍ବାହ୍ନ ୧୧ଟାରୁ ଟିଟିଲାଗଡ଼ ଓ ବଲାଙ୍ଗୀର ସହର ସମେତ ପାଟଣାଗଡ଼, କଣ୍ଟାବାଞ୍ଜି, ତୁଷୁରା ସହରାଞ୍ଚଳ ଓ ଅନ୍ୟ ଗ୍ରାମାଞ୍ଚଳର ରାସ୍ତାଘାଟ ଶୂନ୍ଶାନ୍ ହୋଇପଡୁଛି ା ଜରୁରୀ କାମ ଥିଲେ ଲୋକେ ମୁଣ୍ଡରେ ଗାମୁଛା ଗୁଡାଇ, ଟୋପି ପିନ୍ଧି ଯାତାୟାତ କରୁଛନ୍ତି। ପ୍ରଚଣ୍ଡ ଖରାକୁ ଦୃଷ୍ଟିରେ ରଖି ଜିଲା ପ୍ରଶାସନ ପକ୍ଷରୁ ସହରର ବିଭିନ୍ନ ଛକ ଓ ରାସ୍ତାକଡ଼ରେ ଜଳଛତ୍ର ଖୋଲାଯାଇଛି ା ତୃଣମୂଳ ସ୍ତରରେ କାର୍ଯ୍ୟକରୁଥିବା ଅଧିକାରୀ ଓ କର୍ମଚାରୀଙ୍କୁ ସତର୍କତା ଅବଲମ୍ବନ କରିବା ପାଇଁ ନିର୍ଦ୍ଦେଶ ଦିଆଯାଇଥିବା ଜିଲା ଜରୁରୀ ଅଧିକାରୀ ଶଙ୍କର୍ଷଣ ପ୍ରଧାନ ସୂଚନା ଦେଇଛନ୍ତି ା
କରୋନା ଲକ୍ଡାଉନ ଘୋଷଣା ପରଠାରୁ ବଲାଙ୍ଗୀର ଜିଲାକୁ ପ୍ରତ୍ୟହ ହଜାର ହଜାର ସଂଖ୍ୟାରେ ପ୍ରବାସୀ, ଦାଦନ ଶ୍ରମିକ ଟ୍ରେନ୍ ଓ ବସ୍ରେ ଫେରୁଛନ୍ତି ା ସେମାନଙ୍କୁ ବିଭିନ୍ନ ଯାନବାହନରେ କ୍ୱାରାଣ୍ଟାଇନ୍ ସେଣ୍ଟରକୁ ନେବା ପ୍ରଶାସନ ପାଇଁ ବଡ ଆହ୍ବାନ ପାଲଟିଛି ା ଯେଉଁମାନେ ଟ୍ରେନ୍ରେ ଫେରୁଛନ୍ତି ସେମାନଙ୍କୁ ପରିଚାଳାନା କରିବା ସହଜ ହେଉଥିବାବେଳେ ବସ୍ ଓ ଅନ୍ୟ ଯାନବାହନରେ ଫେରୁଥିବା ପ୍ରବାସୀମାନଙ୍କୁ ବିଭିନ୍ନ ସ୍ଥାନରେ ବସ୍ଗୁଡିକ ଛାଡି ପଳାଇ ଯାଉଥିବାରୁ ପ୍ରଚଣ୍ଡ ଖରାରେ ସେମାନେ ବହୁ କଷ୍ଟ ଭୋଗୁଛନ୍ତି ା ଦୀର୍ଘଦିନ ହେଲା ଖାଇବା, ପିଇବାରେ ଅବ୍ୟବସ୍ଥିତ ଥିବା ଏଭଳି ପ୍ରବାସୀଙ୍କ ଅଂଶୁଘାତ ଆଶଙ୍କା ବଢ଼ି ଯାଉଛି ା ସହରର ବିଭିନ୍ନ ରାସ୍ତାରେ ପ୍ରବାସୀମାନେ ସେମାନଙ୍କ ଜିନିଷପତ୍ର ବୋହି ଖରାରେ ଚାଲୁଥିବା ଦୃଶ୍ୟ ଦେଖାଯାଉଛି ା ଖରାଯୋଗୁ ବିଭିନ୍ନ ଅସ୍ଥାୟୀ ସ୍ବାସ୍ଥ୍ୟକେନ୍ଦ୍ର ଓ କ୍ୱାରାଣ୍ଟାଇନ୍ ସେଣ୍ଟରରେ ମଧ୍ୟ ପ୍ରବାସୀ ଅନ୍ତେବାସୀମାନେ କଷ୍ଟ ଭୋଗୁଥିବା ଖବର ମିଳୁଛି ା