ନିରାକରାପୁର,୩।୪(ଡି.ଏନ.ଏ.)- କରୋନା ମୁକାବିଲା ଲାଗି ସାରା ଦେଶରେ ଲକ୍ଡାଉନ୍ ଚାଲିଥିବାବେଳେ ନିରାକାରପୁର ଅଞ୍ଚଳରେ କେତେଜଣ ଲୋକ ଏହାକୁ ବେଖାତିର କରୁଥିବାର ଦେଖିବାକୁ ମିଳିଛି। ଲକଡାଉନର ଅର୍ଥ ନ ବୁଝି ଏହି ଅଞ୍ଚଳର ଅନେକ ଗାଁରେ ଗୋଟିଏ ଜାଗାରେ ୧୦/୨୦ଜଣ ଲେଖାଏଁ ବସି ତାସ ଖେଳୁଥିବାର ଦେଖିବାକୁ ମିଳୁଛି। ଏହାସହ ଅନ୍ୟ କେତେଜଣ ଏକତ୍ରିତ ହୋଇ ଭୋଜି କରି ସାମାଜିକ ଦ୍ୱରତ୍ୱକୁ ଅବମାନନା କରୁଛନ୍ତି। ଫଳରେ ସଂକ୍ରମଣ ସଂଖ୍ୟା ବୃଦ୍ଧି ପାଇବାରେ ଆଶଙ୍କା କରାଯାଉଛି। ଏହିଭଳି ଦୃଶ୍ୟ କେବଳ ନିରାକାରପୁର ନୁହେଁ ଡିଆ, ରାମେଶ୍ୱର, ମଳିପଡ, ଗୋଡିପଡା, ଜଙ୍କିଆ, ଛଣଗିର, ଅଚୁତପୁର, ସରପାରି, ବଡପୋଖରିଆ, ଟାଙ୍କୋଳ, ହରିପୁର, ଲେଣ୍ଡେ, ସିକୋ ପଞ୍ଚାୟତରେ ଥିବା ଗ୍ରାମ ସମେତ ଆଖପାଖ ଅଞ୍ଚଳରେ ଏକଜୁଟ ହୋଇ ତାସ, କ୍ରିକେଟ ଖେଳୁଥିବା ଦେଖିବାକୁ ମିଳିଛି। ତାସ ଖେଳ ଚାଲୁଥିବାରୁ କାଳେ ପୋଲିସ ଗାଁ ଭିତରେ ପଶିଯିବ ସେଥିପାଇଁ ଗାଁ ଦୁଇପାଶ୍ୱରେ କାଠ, ବାଉଁଶ ପକେଇ ଦେଇଥିବା ଦେଖିବାକୁ ମିଳିଛି। ଏହିସବୁ ଅଞ୍ଚଳକୁ ବହୁସଂଖ୍ୟାରେ ବାହାର ରାଜ୍ୟରୁ ଲୋକେ ଆସିଥିବାବେଳେ ଏମାନଙ୍କୁ ପ୍ରଶାସନ କ୍ୱାରାଣ୍ଟାଇନରେ ରଖିବାକୁ ପରାମର୍ଶ ଦେଇଥିବା ବେଳେ ଆଉକିଛି ଲୁକ୍କାୟତରେ ରହୁଛନ୍ତି। ଅପରପକ୍ଷେ ବଜାର, ଔଷଧ ଆଣିବା ବାହାନା କରି ରାସ୍ତାଘାଟ ଓ ଛକଗୁଡ଼ିକରେ ବହୁସଂଖ୍ୟାରେ ଭିଡ଼ ଜମାଉଛନ୍ତି। ସେହିଭଳି ଔଷଧ ଦୋକାନ ବ୍ୟତୀତ ବଜାର, ହାଟ ସବୁ ଅପରାହ୍ନ ପର୍ଯ୍ୟନ୍ତ ଖୋଲା ରହିବାକୁ ନିର୍ଦ୍ଦେଶଥିବାବେଳେ ଲୋକେ ପାନ, ଚା ଦୋକାନ ଦିନ ତମାମ ଖୋଲି ରଖୁଛନ୍ତି। ଏ ନେଇ ପୋଲିସ ଓ ପ୍ରଶାସନ ଦୃଷ୍ଟି ଦେବାକୁ ସାଧାରଣରେ ଦାବି ହେଉଛି। ଏ ସମ୍ପର୍କରେ ନିରାକାରପୁର ଥାନା ଏଏସ୍ ଆଇ ଶରତ ପାଇକରା କୁହନ୍ତି, ଏହି ଖବରପାଇ କେତେକ ଗ୍ରାମରେ ଶୁକ୍ରବାର ଆମେ ଚଢ଼ାଉ କରିଛୁ। ଏଭଳି ପୁନରାବୃତ୍ତି କଲେ ଦୃଢ଼ କାର୍ଯ୍ୟାନୁଷ୍ଠାନ ନିଆଯିବ ବୋଲି ଲୋକଙ୍କୁ କୁହାଯାଇଛି।