ବାରିପଦା ଅଫିସ, ୨ା୪- ମୟୂରଭଞ୍ଜ ଜିଲାରେ ଲକ୍ଡ଼ାଉନ ଅମାନ୍ୟ କରୁଥିବା ଲୋକଙ୍କୁ ବାଜିଛି ଛାଟ। ୭ ଦିନ ମଧ୍ୟରେ ଜିଲାର ବିଭିନ୍ନ ଥାନାରେ କୋଭିଡ଼-୧୯ ଆଇନ ଅମାନ୍ୟ କରାଯାଇଥିବା ନେଇ ୧୦୬ଟି ମାମଲା ରୁଜୁ ହୋଇଛି। ୧୪୨ ଜଣଙ୍କୁ ଗିରଫ କରାଯାଇ ଜାମିନ୍ରେ ଛଡ଼ା ଯାଇଥିବା ବେଳେ ୧୦୬ଟି ଗାଡ଼ିକୁ ଜବତ କରାଯାଇଥିବା ଜିଲା ପୋଲିସ କାର୍ଯ୍ୟାଳୟରୁ ସୂଚନା ମିଳିଛି। ଅନ୍ୟ ପକ୍ଷେ ଏହି ଆଇନ ଉଲ୍ଲଂଘନକାରୀଙ୍କଠାରୁ ୧ଲକ୍ଷ ୪୭ ହଜାର ୪୦୦ ଟଙ୍କା ଜରିମାନା ଆଦାୟ କରାଯାଇଛି। ପ୍ରକାଶ ଯେ, ଆସନ୍ତା ଏପ୍ରିଲ ୧୪ ତାରିଖ ପର୍ଯ୍ୟନ୍ତ ଲକଡାଉନ ପାଳନ କରିବା ପାଇଁ କୁହାଯାଇଛି। ହେଲେ କେତେକ ଲୋକ ଅତ୍ୟାବଶ୍ୟକ ସାମଗ୍ରୀ କିଣିବା ବାହାନାରେ ବିଭିନ୍ନ ସମୟରେ ବଜାରକୁ ଯାଉଥିବା ଦେଖିବାକୁ ମିଳୁଛି। କଡ଼ାକଡ଼ି ଯାଞ୍ଚ ଯୋଗୁଁ କିଛି ମାତ୍ରାରେ ଲୋକେ ଜରୁରୀ କାମ ନ ଥିଲେ ପଦାକୁ ବାହାରୁ ନ ଥିବା ପୋଲିସ ପକ୍ଷରୁ ସୂଚନା ଦିଆଯାଇଛି।