ଯୋଡ଼ା,୧୫।୪(ଡି.ଏନ୍.ଏ.): କେନ୍ଦୁଝର ଜିଲା ଯୋଡା ସହରର ବାଂଶପାଣି ରୋଡ୍ ନିକଟରେ ଥିବା ଏକ ବିଦେଶୀ ମଦ ଦୋକାନରେ ସିଲ୍ ଭଙ୍ଗାଯାଇଛି। ଅବକାରୀ ବିଭାଗର ଜଣେ ଅଧିକାରୀ ଏକୁଟିଆ ଆସି ଏହି ଦୋକାନରେ ପୂର୍ବରୁ ଥିବା ସିଲକୁ ଭାଙ୍ଗି ପୁଣି ସିଲ୍ କରୁଥିବା ଦେଖିବାକୁ ମିଳିଥିଲା। ଏନେଇ ଅବକାରୀ ଅଧିକାରୀ ନିରାକାର ଦେହୁରୀଙ୍କୁ ପଚାରିବାରୁ ପୂର୍ବରୁ କରାଯାଇଥିବା ସିଲ୍କୁ କେହି ଭାଙ୍ଗି ଦେଇଥିବାରୁ ସେ ପୁଣି ସିଲ କରିବାକୁ ଆସିଥିବା କହିଥିଲେ। ତେବେ ଦୋକାନ ଭିତରେ ଦୋକାନୀ କ’ଣ କରୁଥିଲେ ଓ ଷ୍ଟକ ସମ୍ପର୍କରେ ତାଙ୍କୁ ପଚାରିବାରୁ ସେ କୌଣସି ଉତ୍ତର ଦେଇ ନ ଥିଲେ। ସ୍ଥାନୀୟ ଲୋକଙ୍କ କହିବା ଅନୁଯାୟୀ,ସିଲ୍ ଭାଙ୍ଗିବା ପରେ ଏକ କାର୍ରେ ବହୁ ପରିମାଣର ବିଦେଶୀ ମଦ ଏଠାରୁ ଯୋଡ଼ା ସହର ଆଡ଼କୁ ଚାଲିଯାଇଥିଲା। ଅନ୍ୟପକ୍ଷେ ଲକଡାଉନ୍ ଫଳରେ ଚୋରା ମଦ ବ୍ୟବସାୟୀମାନେ ଚଢା ଦରରେ ମଦ ବିକ୍ରି କରୁଛନ୍ତି। ଏହାର ତଦନ୍ତ ଶୀଘ୍ର କରାଯିବ ବୋଲି ଯୋଡ଼ା ଥାନା ଅଧିକାରୀ ରାଇସେନ୍ ମୁର୍ମୁ କହିଛନ୍ତି।