ଭବାନୀପାଟଣା/ଜୟପାଟଣା,୧୯।୪(ସ୍ବ.ପ୍ର/ଡି.ଏନ୍.ଏ.): କଳାହାଣ୍ଡି ଜିଲା ଦକ୍ଷିଣ ବନଖଣ୍ଡ ଅର୍ନ୍ତଗତ ଜୟପାଟଣା ରେଞ୍ଜ ବଟକର୍ଲାକୋର୍ଟ ଓ ପାବଲି ଗ୍ରାମରେ ରବିବାର ବନ ବିଭାଗ ପକ୍ଷରୁ ଚଢାଉ କରି ବିପୁଳ ପରିମାଣରେ ଶାଗୁଆନ କାଠ ଜବତ କରଯାଇଛି। ଏହାର ଆନୁମାନିକ ମୂଲ୍ୟ ଲକ୍ଷାଧିକ ଟଙ୍କା ହେବ । ଏହି ଘଟଣାରେ ପାବଲୀ ଗ୍ରାମର ଜଣଙ୍କୁ ଅଟକ ରଖାଯାଇ ପଚରାଉଚୁରା କରାଯାଉଛି। ତଦନ୍ତ ପରେ ମୁଖ୍ୟ କାଠ ମାଫିଆଙ୍କୁ ଗିରଫ କରାଯିବ ବୋଲି ବିଭାଗୀୟ ଅଧିକାରୀ ପ୍ରକାଶ କରିଛନ୍ତି। ଏହି ଚଢାଉରେ ଭବାନୀପାଟଣା ଡିଭିଜନ ମୋବାଇଲ ସ୍କାଡର ବନପାଳ ପଦ୍ମଲୋଚନ ଶବର, ଜୟପାଟଣା ରେଞ୍ଜର କେଶବ ଚନ୍ଦ୍ର ଶବର, ଡେପୁଟି ରେଞ୍ଜର ନବୀନ କୁମାର ପଣ୍ଡା, ବନପାଳ ସୁରେନ୍ଦ୍ର ବେହେରା, ସୌରେନ୍ଦ୍ର ବାଗ ପ୍ରମୁଖ ସାମିଲ ହୋଇଥିଲେ।
