ନୂଆଦିଲ୍ଲୀ, ୫ା୬:ମହାମାରୀ କରୋନା କାୟାବିସ୍ତାର କରିବାରେ ଲାଗିଛି। ଭାରତରେ ଏବେ କରୋନା ଭୂତାଣୁ ଆକ୍ରାନ୍ତଙ୍କ ସଂଖ୍ୟା ୨ଲକ୍ଷ ୧୮ ହଜାର ଟପିଲାଣି। ୬,୧୦୪ ଜଣଙ୍କ ଜୀବନ ମଧ୍ୟ ଗଲାଣି। କୌଣସି ସଫଳ ଔଷଧ ବାହାରି ନ ଥିବାବେଳେ ଦେଶରେ ଲକ୍ଷାଧିକ ରୋଗୀ ସୁସ୍ଥ ହେବା ନିଶ୍ଚିତ ଭାବେ ଖୁସି ଆଣିଦେଇଛି। ଦେଶରେ ଏବେ ଆକ୍ଟିଭ୍ ମାମଲା ୧,୦୭, ୭୦୪ ରହିଥିବା ବେଳେ ସୁସ୍ଥ ହେଲେଣି ୧,୦୪,୬୧୮ ବ୍ୟକ୍ତି। ମହାରାଷ୍ଟ୍ରରେ ୭୪, ୮୬୦ ସଂକ୍ରମିତ ହୋଇଥିବା ବେଳେ ୩୨, ୩୦୪ ଜଣ ସୁସ୍ଥ ହୋଇଛନ୍ତି। ଏଠାରେ ୨,୫୮୭ ଜଣ ପ୍ରାଣ ହରାଇଛନ୍ତି। ତାମିଲନାଡ଼ୁରେ ୨୭,୨୫୯ ଭୂତାଣୁ ଆକ୍ରାନ୍ତ ଥିବାବେଳେ ସୁସ୍ଥ ଲୋକଙ୍କ ସଂଖ୍ୟା ୧୫ ହଜାର ପାଖାପାଖି ପହଞ୍ଚିଲାଣି। ଏଠାରେ ମୃତ୍ୟୁସଂଖ୍ୟା ୨୩୧କୁ ବୃଦ୍ଧଓି ପାଇଛି। ରାଜଧାନୀ ଦିଲ୍ଲୀରେ ୨୩, ୬୪୫ ରୋଗୀଙ୍କ ମଧ୍ୟରୁ ୯,୫୦୦ରୁ ଅଧିକ ବ୍ୟକ୍ତି ସୁସ୍ଥହୋଇ ଘରକୁ ଫେରିଛନ୍ତି। ୬୧୫ ଜଣ କରୋନାରେ ମୃତ୍ୟୁବରଣ କରିଛନ୍ତି। ଗୁଜରାଟ, ମଧ୍ୟପ୍ରଦେଶ, ରାଜସ୍ଥାନ, ଉତ୍ତରପ୍ରଦେଶରେ ସଂକ୍ରମିତଙ୍କ ସଂଖ୍ୟା ଯଥାକ୍ରମେ ୧୮,୧୧୭; ୮,୫୮୮; ୯,୭୨୦ ଓ ୯,୨୩୭ ରହିଥିବା ବେଳେ ସୁସ୍ଥ ହୋଇଥିବା ବ୍ୟକ୍ତିଙ୍କ ସଂଖ୍ୟା ୧୨, ୨୧୨; ୫,୪୪୫; ୬,୮୧୯ ଓ ୫୪୪୦କୁ ବୃଦ୍ଧିପାଇଛି। ଅନ୍ୟ ରାଜ୍ୟଗୁଡ଼ିକରେ ମଧ୍ୟ ରୋଗୀମାନେ ସୁସ୍ଥ ହେବାରେ ଲାଗିଛନ୍ତି। ଦେଶରେ ପ୍ରବାସୀଙ୍କ ଆଗମନ ପରେ କରୋନା ଆକ୍ରାନ୍ତଙ୍କ ସଂଖ୍ୟା ଦ୍ରୁତ ଗତିରେ ବଢ଼ିବାରେ ଲାଗିଛି। ଗତ ୨୦ ଦିନ ମଧ୍ୟରେ ଲକ୍ଷାଧିକ ସଂକ୍ରମିତ ହୋଇଛନ୍ତି। ଗତ ୨୪ ଘଣ୍ଟା ମଧ୍ୟରେ ୩, ୯୦୪ ନୂଆ ମାମଲା ସାମ୍ନାକୁ ଆସିଛି। ୬୪ ଜଣଙ୍କ ଜୀବନ ଯାଇଛି। ରୋଗୀସଂଖ୍ୟା ବୃଦ୍ଧି ସହ ସୁସ୍ଥବ୍ୟକ୍ତିଙ୍କ ସଂଖ୍ୟା ବୃଦ୍ଧିପାଇବା ସମସ୍ତଙ୍କୁ ଆଶ୍ୱସ୍ତି ଆଣିଦେଇଛି।