ଲକ୍ଷ୍ନୌ: ଲକ୍ଷ୍ନୌ ନଗର ନିଗମ(ଏଲ୍ଏମ୍ସି) ସହରରେ କଠିନ ବର୍ଜ୍ୟ ପରିଚାଳନା ପାଇଁ ନୂତନ ପଦକ୍ଷେପ ଗ୍ରହଣ କରିଛି। ଏଲ୍ଏମ୍ସି ରେଡ଼ିଓ ଫ୍ରିକ୍ୱେନ୍ସି ଆଇଡେଣ୍ଟିଫିକେସନ୍(ଆର୍ଏଫ୍ଆଇଡି)ଟେକ୍ନୋଲୋଜି ମାଧ୍ୟମରେ ବାର୍ କୋଡ୍ ବ୍ୟବହାର କରାଯାଇ ପ୍ରତ୍ୟେକ ଘରୁ ବର୍ଜ୍ୟ ସଂଗ୍ରହ କରାଯିବ। ପୁଣେ ନଗର ନିଗମରେ ଏଭଳି ବ୍ୟବସ୍ଥା କରାଯାଇଛି । ଏହାପରେ ଲକ୍ଷ୍ନୌରେ ଏହାକୁ ଲାଗୁ କରାଯାଉଛି ବୋଲି କହିଛନ୍ତି ନିଗମର ଅଧ୍ୟକ୍ଷ। ୧୦ ଲକ୍ଷ ଟଙ୍କା ବିନିମୟରେ ପୁଣେର ଏକ ଫାର୍ମରୁ ଏହି ଜ୍ଞାନକୌଶଳ ଅଣାଯାଇଛି। ବାର୍ କୋଡ୍ରେ ପ୍ରତ୍ୟେକ ଘରର ଜିପିଏସ୍ ଲୋକେଶନ୍ ରହିବ। ଏହାଦ୍ୱାରା କଣ୍ଟୋ୍ରଲ ରୁମ୍ରୁ ସହଜରେ ଏହି ବ୍ୟବସ୍ଥାକୁ ପରିଚାଳନା କରିହେବ। ଏଲ୍ଏମ୍ସି ପ୍ରଥମେ ଗୀତାପାଲି ଓ୍ବାର୍ଡରୁ ଏହି ସ୍ମାର୍ଟ ବ୍ୟବସ୍ଥା ଆରମ୍ଭ କରିବ। ପ୍ରତ୍ୟେକ ଘର ଆଗରେ ଏକ ବାର୍ କୋଡ୍ ଲଗାଯିବ। କର୍ମଚାରୀମାନେ ନିୟମିତ ତାଙ୍କ ସ୍ମାର୍ଟଫୋନରେ ସେହି କୋଡ୍କୁ ସ୍କାନ କରିବେ। ସ୍କାନ କରିବା କ୍ଷଣି ତାହା ଏଲ୍ଏମ୍ସରି କଣ୍ଟ୍ରୋଲ ରୁମ୍ ସେହି ଘରର ଠିକଣା ଜାଣିପାରିବ। ଏହାପରେ ସଫାଇ କର୍ମଚାରୀମାନେ ଘର ନିକଟରେ ପହଞ୍ଚି ବର୍ଜ୍ୟ ସଂଗ୍ରହ କରିପାରିବ। ଏଲ୍ଏମ୍ସି ଗୀତାପଲ୍ଲୀର ୪୯,୦୦୦ ଘରେ ବାର୍ କୋଡ୍ ଲଗାଯାଇ ପ୍ରଥମେ ବର୍ଜ୍ୟ ସଂଗ୍ରହ କରିିବ । ଏହାପରେ ଲକ୍ଷ୍ନୌର ସମସ୍ତ ୧୧୦ ଓ୍ବାର୍ଡରେ ସ୍ମାର୍ଟ ବର୍ଜ୍ୟ ସଂଗ୍ରହ ବ୍ୟବସ୍ଥା କରାଯିବ । ଏବେ ଏଲ୍ଏମ୍ସି ସହ ଇକୋଗ୍ରୀନ ନାମକ ଘରୋଇ ସଂସ୍ଥା ପ୍ରତ୍ୟେକ ଘରୁ ବର୍ଜ୍ୟ ସଂଗ୍ରହ କରିବା ଲାଗି ଏହାର ୩୦୦ କର୍ମଚାରୀଙ୍କୁ ନିଯୁକ୍ତି ଦେଇଛି। ଯେଉଁ କର୍ମଚାରୀଙ୍କର ସ୍ମାର୍ଟଫୋନ ନାହିଁ ତାଙ୍କୁ ଏଲଏମ୍ସି ବି ସ୍ମାର୍ଟଫୋନ ଯୋଗାଇ ଦେଇଛି। ପ୍ରତିଦିନ କାମ ସରିଲା ପରେ ସେମାନଙ୍କଠାରୁ ସୁପର୍ଭାଇଜର ଫୋନ ଆଣି ଏଲଏମସିରେ ଜମା ଦେବାକୁ କୁହାଯାଇଛି।