ନୂଆଦିଲ୍ଲୀ,୨୯-୯: ରିଜର୍ଭ ବ୍ୟାଙ୍କ ଲକ୍ଷ୍ମୀ ବିଳାସ ବ୍ୟାଙ୍କ ବିରୋଧରେ ପ୍ରମ୍ପଟ କରେକ୍ଟିଭ ଆକ୍ସନ(ପିସିଏ)କାର୍ଯ୍ୟାନୁଷ୍ଠାନ ଗ୍ରହଣ କରିଛି। ବ୍ୟାଙ୍କର ନିର୍ଦ୍ଦେଶକଙ୍କ ବିରୋଧରେ ଠକେଇ ଅଭିଯୋଗ ଆସିବାରୁ ଏଭଳି କାର୍ଯ୍ୟାନୁଷ୍ଠାନ ହୋଇଥିବା ଏହା ଷ୍ଟକ ଏକ୍ସଚେଞ୍ଜକୁ ଶନିବାର ସୂଚନା ଦେଇଛି। ଦିଲ୍ଲୀ ପୋଲିସର ଅର୍ଥନୈତିକ ଅପରାଧ ଶାଖା ଉକ୍ତ ଅଭିଯୋଗ ଉପରେ ତଦନ୍ତ କରୁଛି। ବୃହତ୍ତ ପରିମାଣର ଏନ୍ପିଏ, ବିପଦ ପରିଚାଳନା ଲାଗି ପର୍ଯ୍ୟାପ୍ତ ପୁଞ୍ଜି ଅଭାବ ଏବଂ ଲଗାତାର ୨ ବର୍ଷ ଧରି ଆସେଟ ଉପରେ ନକାରାତ୍ମକ ରିଟର୍ନ ଭଳି ଅସୁବିଧାକୁ ବିଚାର କରି କେନ୍ଦ୍ରୀୟ ବ୍ୟାଙ୍କ ଏଭଳି କାର୍ଯ୍ୟାନୁଷ୍ଠାନ ନେଇଛି। ବ୍ୟାଙ୍କ ବୋର୍ଡ ବିରୋଧରେ ଠକେଇ ଏବଂ ଅର୍ଥ ହେରଫେରର ନେଇ ଗୁରୁତର ଅଭିଯୋଗ ଆସିଛି। ଇଣ୍ଡିଆ ବୁଲ୍ସ ହାଉସିଂ ଫାଇନାନ୍ସ ଏବଂ ଲକ୍ଷ୍ମୀ ବିଳାସ ବ୍ୟାଙ୍କ ମିଶ୍ରଣ ନେଇ ପ୍ରସ୍ତାବ ରହିଥିବା ବେଳେ ଏଭଳି କାର୍ଯ୍ୟାନୁଷ୍ଠାନ ଉକ୍ତ ବ୍ୟାଙ୍କ ଲାଗି ସମସ୍ୟା ସୃଷ୍ଟି କରିବା ନେଇ ଆଶଙ୍କା କରାଯାଉଛି। ମିଶ୍ରଣ ପ୍ରସ୍ତାବ ବର୍ତ୍ତମାନ ରିଜର୍ଭ ବ୍ୟାଙ୍କର ମଞ୍ଜୁରୀ ଅପେକ୍ଷାରେ ରହିଛି।
ଆର୍ଥତ୍କ ବର୍ଷ ୨୦୧୯ରେ ବ୍ୟାଙ୍କର ନେଟ୍ ଏନ୍ପିଏ ୭.୪୯% ରହିଛି। ସେହିଭଳି ପୁଞ୍ଜି ପର୍ଯ୍ୟାପ୍ତତା ଅନୁପାତ ୭.୨୨% ଏବଂ ସମ୍ପତ୍ତିରୁ ରିଟର୍ନ (-)୨.୩୨% ରହିଛି। ୨୦୧୮-୧୯ ଆର୍ଥତ୍କ ବର୍ଷରେ ବ୍ୟାଙ୍କ ୮୯୪.୧୦ କୋଟି କ୍ଷତି ସହିଛି। ପିସିଏ କାର୍ଯ୍ୟାନୁଷ୍ଠାନ ଦ୍ୱାରା ବ୍ୟାଙ୍କର ପର୍ଫରମାନ୍ସ ବୃଦ୍ଧି, ଦୈନଦିନ କାର୍ଯ୍ୟ ପ୍ରଣାଳୀରେ ଦକ୍ଷତା, ଜମା ଗ୍ରହଣ ଏବଂ ପୁନଃ ନେଣଦେଣରେ ସୁଧାର ଆସିବା ନେଇ ବ୍ୟାଙ୍କ ଆଶାବାଦି ରହିଛି। କେବଳ ଲକ୍ଷ୍ମୀ ବିଳାସ ବ୍ୟାଙ୍କ ନୁହେଁ ରାଷ୍ଟ୍ରାୟତ୍ତ ୟୁନାଇଟେଡ୍ ବ୍ୟାଙ୍କ ଅଫ୍ ଇଣ୍ଡିଆ, ଇଣ୍ଡିଆନ ଓଭରସିଜ୍ ବ୍ୟାଙ୍କ, ସେଣ୍ଟ୍ରାଲ ବ୍ୟାଙ୍କ ଅଫ୍ ଇଣ୍ଡିଆ, ଆଇଡିବିଆଇ ବ୍ୟାଙ୍କ ଏବଂ ୟୁକୋ ବ୍ୟାଙ୍କ ମଧ୍ୟ ପିସିଏ ପରିସରରେ ଅଛନ୍ତି। ଏହି ମାମଲାରେ ତଦନ୍ତକାରୀ ଏଜେନ୍ସିଗୁଡିକୁ ସମସ୍ତ ପ୍ରକାରର ସହାୟତା ଯୋଗାଇ ଦିଆଯିବ ବୋଲି ବ୍ୟାଙ୍କ ପକ୍ଷରୁ କୁହାଯାଇଛି।