ପୁରୀ ଅଫିସ, ୬।୮: ରାଷ୍ଟ୍ରୀୟ ସ୍ବୟଂସେବକ ସଂଘ (ଆର୍ଏସ୍ଏସ୍) ଯେଉଁ ଲକ୍ଷ୍ୟ ଓ ଉଦ୍ଦେଶ୍ୟ ନେଇ ଆରମ୍ଭ ହୋଇଥିଲା, ଏବେ ସେଥିରୁ ଦୂରେଇଯାଉଛି ବୋଲି କହିଛନ୍ତି ଜଗଦ୍ଗୁରୁ ଶଙ୍କରାଚାର୍ଯ୍ୟ ନିଶ୍ଚଳାନନ୍ଦ ସରସ୍ବତୀ। ସୋମବାର ଶଙ୍କରାଚାର୍ଯ୍ୟ ମଠରେ ଆୟୋଜିତ ଖବରଦାତା ସମ୍ମିଳନୀରେ ସେ ଆର୍ଏସ୍ଏସ୍ ଉପରେ ବର୍ଷିଛନ୍ତି। ସେ କହିଥିଲେ, ଆର୍ଏସ୍ଏସ୍ ଅଯଥା ଧାର୍ମିକ, ସାଂସ୍କୃତିକ ଓ ରାଜନୀତି କ୍ଷେତ୍ରରେ ହସ୍ତକ୍ଷେପ ନ କରି ସେବା କାର୍ଯ୍ୟରେ ମନୋନିବେଶ କରୁ। ୨୦୨୦ରେ ଆରଏସ୍ଏସ୍ ଦ୍ୱାରା ସେନା ସ୍କୁଲ ଖୋଲାଯିବା ନେଇ ପ୍ରଶ୍ନର ଉତ୍ତରରେ ସଂଘ ଚାଳକ ମୋହନ ଭାଗବତ୍ଙ୍କୁ ଏ ସଂକ୍ରାନ୍ତରେ ପଚାରିଲେ ତାହା କହିପାରିବେ ବୋଲି ପ୍ରକାଶ କରିଥିଲେ। ଶଙ୍କରାଚାର୍ଯ୍ୟ ଆହୁରି କହିଛନ୍ତି ଯେ, ସ୍ବତନ୍ତ୍ର ଭାରତରେ ଭାରତୀୟମାନେ ସ୍ବତନ୍ତ୍ର ନୁହନ୍ତି। ବିଦେଶୀ କୂଟନୀତି ଦ୍ୱାରା ଭାରତ ପରିଚାଳିତ ହେଉଛି। ହିନ୍ଦୁ ଓ ମୁସଲମାନଙ୍କ ମଧ୍ୟରେ ବିଭେଦ ସୃଷ୍ଟି କରି ଇଂରେଜମାନେ ଦେଶକୁ ବିଭାଜନ କରି ପାକିସ୍ତାନ ସୃଷ୍ଟି କରିବାରେ ସଫଳ ହୋଇଥିଲେ। ପାକିସ୍ତାନରେ ଆତଙ୍କବାଦୀଙ୍କୁ ସୃଷ୍ଟି କରିବା ପଛରେ ବିଦେଶୀ ଖ୍ରୀଷ୍ଟିଆନଙ୍କ ହାତ ରହିଛି। ଭାରତ ସ୍ବାଧୀନ ହେବା ପରଠାରୁ କେତେଜଣ ପ୍ରଧାନମନ୍ତ୍ରୀ ଦେଶକୁ ୯ଥର ବିଭାଜନ କରିଛନ୍ତି। ବିଖଣ୍ଡିତ ଭାରତରେ ହିନ୍ଦୁମାନଙ୍କ କୌଣସି ଅସ୍ତିତ୍ୱ ନାହିଁ। ଆଇପିଏସ୍ ଏବଂ ଆଇଏଏସ୍ ପାଠ୍ୟକ୍ରମ ବିଦେଶୀ ରାଷ୍ଟ୍ର ଦ୍ୱାରା ଲାଗୁ କରାଯାଇଛି। ଦେଶର ବିକାଶ କ୍ଷେତ୍ରରେ ଆଇପିଏସ୍ ଏବଂ ଆଇଏଏସ୍ମାନଙ୍କ ରାଷ୍ଟ୍ରୀୟତାର ଅଭାବ ରହିଛି। ଭାରତର ବୈଦିକ ସଂସ୍କୃତି, ବୈଦିକ ଗଣିତ ବିଶ୍ୱକୁ ମାର୍ଗଦର୍ଶନ କରୁଛି। ବିଦେଶରେ ଏହାର ଆଦର ରହିଛି। ଅଥଚ ଭାରତର ମେଧାଶକ୍ତିକୁ ଭାରତରେ ଉପେକ୍ଷା କରାଯାଉଛି। ଭାରତୀୟଙ୍କ ବୁଦ୍ଧି ବିଚାର ବଳରେ ବିଦେଶୀ ରାଷ୍ଟ୍ରର ଅର୍ଥନୈତିକ ବିକାଶ ସମୃଦ୍ଧି ଲାଭ କରିଛି। ମାତ୍ର ଭାରତର ଅର୍ଥନୀତି ପତ୍ତନ ଘଟୁଛି। ଏଥିଲାଗି ବିଚାରବିମର୍ଷ ଜରୁରୀ। ଶଙ୍କରାଚାର୍ଯ୍ୟଙ୍କ ମାର୍ଗଦର୍ଶନକୁ ବିଶ୍ୱ ଗ୍ରହଣ କରୁଛି। ଅଥଚ ଭାରତରେ ଶଙ୍କରାଚାର୍ଯ୍ୟଙ୍କୁ ଉପେକ୍ଷା କରାଯାଉଛି। ଧାର୍ମିକ କ୍ଷେତ୍ରରେ ତାଙ୍କୁ ଗୁରୁତ୍ୱ ଦିଆଯାଉନାହିଁ। ଭାରତ ଅତିଥି ଦେବୋ ଭବଃ ନୀତିରେ ବିଶ୍ୱାସ କରେ। ତେଣୁ ଆମେ ଦଲାଇଲାମାଙ୍କୁ ଶରଣ ଦେଲୁ। ଏହା ପ୍ରଭାବରେ ଚାଇନାର ଆତଙ୍କବାଦୀ ଭାରତରେ ପଶିବାର ସୁଯୋଗ ପାଇଲେ। ଚାଇନା ଆମ ଦେଶର ଶତ୍ରୁ। ଭାରତରେ ଚାଇନାର ସମସ୍ତ ସାମଗ୍ରୀ ବର୍ଜନ କରାଯାଉ। ଚାଇନାକୁ କୌଣସି କଞ୍ଚାମାଲ ଦିଆ ନ ଯାଉ। ଭାରତର ପ୍ରାକୃତିକ ଖଣିଜ ସମ୍ପଦକୁ ଭାରତ ନିଜେ ବ୍ୟବହାର କରୁ। ସେ କହିଲେ ଯେ, ଶଙ୍କରାଚାର୍ଯ୍ୟ ପଦରେ ଆସୀନ ହେବା ପରେ ଏବଂ ଏହା ପୂର୍ବରୁ ମୁଁ ଖ୍ରୀଷ୍ଟିଆନମାନଙ୍କୁ ବିରୋଧ କରିନାହିଁ କି କରୁନାହିଁ। ସେମାନଙ୍କୁ ସ୍ନେହ, ଶ୍ରଦ୍ଧା ପୂର୍ବକ ସନ୍ଦେଶ ଦେବାକୁ ଚାହେଁ ଯେ, ଦେଶର ଷଡ଼ଯନ୍ତ୍ରରୁ କ୍ଷାନ୍ତ ରୁହନ୍ତୁ। ସୀମାବର୍ତ୍ତୀ ଅଞ୍ଚଳରେ ଲୋକଙ୍କୁ ସୁଶିକ୍ଷିତ, ସଂସ୍କୃତି ସମ୍ପନ୍ନ ଓ ରାଷ୍ଟ୍ରୀୟତା ଭାବ ଜାଗ୍ରତ କରାଯାଉ। ଏହାଦ୍ୱାରା ରାଷ୍ଟ୍ରୀୟ ଭାବନାର ଗଙ୍ଗା ପ୍ରବାହିତ ହେବ।