ପୁରୀ ଅଫିସ, ୨୮ା୪: କରୋନା ମୁକାବିଲା ପାଇଁ ବର୍ତ୍ତମାନ ଲକ୍ଡାଉନ ଚାଲିଛି। ଏହି ପ୍ରାଣଘାତୀ ଭୂତାଣୁ କବଳରୁ କିପରି ନିସ୍ତାର ମିଳିବ ସେଥିପାଇଁ ସମସ୍ତେ ଚିନ୍ତିତ ଥିବାବେଳେ କେତେଜଣ ମୁନାଫାଖୋର ବ୍ୟକ୍ତି ଏହି ସମୟରେ ବେଆଇନ ନିଶା କାରବାର ଜାରି ରଖିଛନ୍ତି। ଏହା ଉପରେ ସତର୍କ ଦୃଷ୍ଟି ରଖିବାକୁ ଜିଲାପାଳ ବଲୱନ୍ତ ସିଂ ପୋଲିସ ଏବଂ ଅବକାରୀ ବିଭାଗକୁ ନିର୍ଦ୍ଦେଶ ଦେଇଥିଲେ। ତେଣୁ ଅବକାରୀ ଅଧୀକ୍ଷକ ଅମରେନ୍ଦ୍ର ଜେନାଙ୍କ ତତ୍ତ୍ବାବଧାନରେ ବିଭିନ୍ନ ସ୍ଥାନରେ ବିଭାଗ ପକ୍ଷରୁ ଚଢାଉ କରାଯାଉଛି। ମଙ୍ଗଳବାର ଭୋର ୫ଟାରେ ଅବକାରୀ ନିରୀକ୍ଷକ, ଜିଲା ଭ୍ରାମ୍ୟମାଣ ଅଧିକାରୀ ଏବଂ କର୍ମଚାରୀମାନେ ପାଟ୍ରୋଲିଂ କରୁଥିଲେ। ଏକ ଗାଡ଼ିିରେ ଗଞ୍ଜେଇ ଚୋରାଚାଲାଣ ହେଉଥିବା ସୂଚନା ପାଇ ଏହି ଟିମ୍ ପୁରୀ ସଦର ଥାନା ଅନ୍ତର୍ଗତ ବାଲିପୁଟ ନିକଟ ରାସ୍ତାରେ ଜଗି ରହିଥିଲେ। ଏହି ସମୟରେ ଏକ କାର୍ (ନଂ.ଏମ୍ପି ୦୪ସିବି-୬୫୦୧)କୁ ଅଟକାଇ ଯାଞ୍ଚ କରିବାରୁ ଡିକିରୁ ବହୁଗୁଡ଼ିଏ ଗଞ୍ଜେଇ ପ୍ୟାକେଟ୍ ମିଳିଥିଲା। ଗାଡ଼ି ଓ ଗଞ୍ଜେଇ ଜବତ କରିବା ସହ ଏହାର ଚାଳକ ନିମାପଡ଼ା ଥାନା ଅନ୍ତର୍ଗତ ନଅଁନ୍ତରାର ଦେବାଶିଷ ସ୍ବାଇଁଙ୍କୁ ଗିରଫ କରାଯାଇଛି। ପରେ ଦେବାଶିଷଙ୍କୁ ପୁରୀ ଜିଲା ଦୌରାଜଜ୍ଙ୍କ କୋର୍ଟରେ ହାଜର କରାଯାଇଥିଲା। ୪୪ କିଗ୍ରା ଗଞ୍ଜେଇ ଜବତ ହୋଇଥିବା ବିଭାଗ ପକ୍ଷରୁ କୁହାଯାଇଛି। ଏହି ଚଢାଉରେ ଅବକାରୀ ଇନ୍ସପେକ୍ଟର ବିକାଶ କୁମାର ନାୟକ, ଏସ୍ଆଇ ବନ୍ଦନା ପଟ୍ଟନାୟକ, ଏସ୍ଆଇ ବିନୋଦ କୁମାର ବାସ୍କେ, ଏଏସ୍ଆଇ ସୁଶାନ୍ତ କୁମାର ମହାପାତ୍ରଙ୍କ ସମେତ ସନ୍ତୋଷ କୁମାର ନାୟକ, ପ୍ରଦୀପ୍ତ କୁମାର ପଣ୍ଡା, ଅଭିଜିତ ପ୍ରଧାନ, ସଞ୍ଜୀବ ହୁସ୍କି ପ୍ରମୁଖ ସାମିଲ ଥିଲେ।