ନୂଆଦିଲ୍ଲୀ,୧।୪: ଦେଶରେ କରୋନା ସଂକ୍ରମଣ ରୋକିବା ପାଇଁ ଭାରତ ସରକାରଙ୍କ ପକ୍ଷରୁ ୨୧ ଦିନିଆ ଲକ୍ଡାଉନ୍ ଘୋଷଣା କରାଯାଇଛି। ଲକ୍ଡାଉନ୍ ସମୟରେ କେତେକ ଘରେ ବସି ରାମାୟଣ ଦେଖୁଥିବାବେଳେ ବାହାର ରାଜ୍ୟକୁ କାମଧନ୍ଧା ପାଇଁ ଯାଇଥିବା ଲୋକେ ଭିଟାମାଟିକୁ ଫେରିବାର ପ୍ରୟାସ ଜାରି ରଖିଛନ୍ତି। ଏନେଇ କଂଗ୍ରେସ ପକ୍ଷରୁ କପିଲ୍ ସିବଲ୍ ଟୁଇଟ୍ କରି ଏଭଳି ମାର୍ମିକ ମନ୍ତବ୍ୟ ଦେଇଛନ୍ତି। ସିବଲଙ୍କ ଏହି ମନ୍ତବ୍ୟ ବହୁ ୟୁଜରଙ୍କୁ ବେଶ୍ ଭାବୁକ କରିଛି। ଗୋଟିଏ ସମୟରେ ଭାରତର ଦୁଇଟି ଭିନ୍ନ ଭିନ୍ନ ଦୃଶ୍ୟ କିଭଳି ମନରେ ଭାବାବେଗ ସୃଷ୍ଟି କରୁଛି ତାହା ସିବଲ ଦର୍ଶାଇଛନ୍ତି। କିଛି ଲୋକ ଘରେ ବନ୍ଦ ରହି ସାମାଜିକ ଦୂରତା ଅବଲମ୍ବନ କରୁଥିବା ସମୟରେ ଗରିବ ନିଜ ଘରକୁ ଫେରିବା ପାଇଁ ବାହାରେ ରହି ସଂଘର୍ଷ କରୁଛନ୍ତି। ସେମାନେ ବିନା ଖାଦ୍ୟ ବିନା ଆଶ୍ରୟରେ ବେଶ୍ ସଙ୍କଟ ଦେଇ ଗତି କରୁଛନ୍ତି ବୋଲି ସିବଲ କହିଛନ୍ତି।