ଲଣ୍ଡନ,୫।୬(ପି.ଟି.): କୋଭିଡ୍-୧୯ କାରଣରୁ ସାରା ବିଶ୍ୱରେ ଲକ୍ଡାଉନ୍ ଜାରି ରହିଛି। ଏହି ଲକ୍ଡାଉନ୍ ସମୟରେ ଜଣାଶୁଣା ସୋସିଆଲ ମିଡିଆ ‘ଇନ୍ଷ୍ଟାଗ୍ରାମ୍’ରେ ପୋଷ୍ଟ କରି ଭାରତୀୟ ଅଧିନାୟକ ବିରାଟ କୋହଲି ଘରେ ବସି କୋଟି କୋଟି ଟଙ୍କା ଆୟ କରିଛନ୍ତି। ଏ ଦୃଷ୍ଟିକୋଣରୁ ଦେଖିବାକୁ ଗଲେ କୋହଲି ବିଶ୍ୱରେ ଶ୍ରେଷ୍ଠ ଆୟକାରୀ ଆଥଲେଟଙ୍କ ତାଲିକାରେ ଟପ୍ ୧୦ ଜଣଙ୍କ ମଧ୍ୟରେ ସ୍ଥାନ ପାଇଛନ୍ତି। କୋହଲି ଷଷ୍ଠ ସ୍ଥାନରେ ରହି ଏକମାତ୍ର କ୍ରିକେଟର ଭାବେ ଶ୍ରେଷ୍ଠ ୧୦ରେ ସ୍ଥାନ ପାଇଛନ୍ତି।
ମାର୍ଚ୍ଚ ୧୨ରୁ ମେ ୧୪ ତାରିଖ ମଧ୍ୟରେ କୋହଲି ଘରେ ବସି ପ୍ରାୟୋଜିତ ପୋଷ୍ଟ ମାଧ୍ୟମରେ ୩, ୭୯, ୨୯୪ ପାଉଣ୍ଡ ବା ୩.୬ କୋଟି ଟଙ୍କା ଆୟ କରିଛନ୍ତି। ୩ଟି ଇନ୍ଷ୍ଟାଗ୍ରାମ ପୋଷ୍ଟ ମାଧ୍ୟମରେ ସେ ଏହି ଅର୍ଥ ଆମଦାନୀ କରିଛନ୍ତି। ପ୍ରତି ପୋଷ୍ଟରେ ତାଙ୍କୁ ୧.୨ କୋଟି ଟଙ୍କା ମିଳିଥିଲା। ଇନ୍ଷ୍ଟାଗ୍ରାମ୍ରେ କୋହଲିଙ୍କର ୬.୨ କୋଟି ଫଲୋଅର ରହିଛନ୍ତି।
ଏହି ତାଲିକାରେ ପର୍ତ୍ତୁଗାଲ ଫୁଟବଲ ସୁପରଷ୍ଟାର କ୍ରିଷ୍ଟିଆନୋ ରୋନାଲ୍ଡୋ ତାଲିକାର ଶୀର୍ଷ ସ୍ଥାନରେ ରହିଛନ୍ତି। ସେ ପାଖାପାଖି ୧୭.୯ କୋଟି ଟଙ୍କା ଆୟ କରିଛନ୍ତି। ଇନ୍ଷ୍ଟାଗ୍ରାମରେ ରୋନାଲ୍ଡୋଙ୍କ ୨୨ କୋଟି ଫଲୋଅର ଅଛନ୍ତି। ଇନ୍ଷ୍ଟାଗ୍ରାମ୍ରେ ସେ ବିଶ୍ୱର ୧ ନମ୍ବର ଲୋକପ୍ରିୟ ବ୍ୟକ୍ତି। ସେହିପରି ଏହି ତାଲିକାରେ ଆର୍ଜେଣ୍ଟିନା ଫୁଟବଲ ତାରକା ମେସି ଦ୍ୱିତୀୟ ଓ ବ୍ରାଜିଲ ଫୁଟବଲର ନେମାର ତୃତୀୟ ସ୍ଥାନରେ ରହିଛନ୍ତି। ୧୫.୧ କୋଟି ଫଲୋଅର ସହ ବାର୍ସିଲୋନ ତାରକା ମେସି ୪ଟି ପୋଷ୍ଟ କରି ୧୨.୩ କୋଟି ଟଙ୍କା ଆୟ କରିଛନ୍ତି। ସେହିପରି ନେମାର ୪ଟି ପୋଷ୍ଟ କରି ୧୧.୪ କୋଟି ଟଙ୍କା ଆୟ କରିଛନ୍ତି। ସେହିପରି ଇଂଲଣ୍ଡ ପୂର୍ବତନ କ୍ରିକେଟର ଡେଭିଡ ବେକ୍ହାମ ଲକ୍ଡାଉନ୍ ଅବଧିରେ ୩ଟି ପୋଷ୍ଟ କରି ୩.୮ କୋଟି ଟଙ୍କା ଆୟ କରି ତାଲିକାର ପଞ୍ଚମ ସ୍ଥାନରେ ରହିଛନ୍ତି। ଇନ୍ଷ୍ଟାଗ୍ରାମ୍ରେ ତାଙ୍କର ୬.୩ କୋଟି ଫଲୋଅର ରହିଛନ୍ତି। ବାସ୍କେଟବଲ ଖେଳାଳି ତଥା ଏନ୍ବିଏ ତାରକା ଶାକ୍ୱିଲି ଓ’ନିଲ ୧.୭ କୋଟି ଫଲୋଅର ସହ ମୋଟ ୧୬ଟି ପୋଷ୍ଟ କରି ୫.୫ କୋଟି ଟଙ୍କା ଆୟ କରି ଚତୁର୍ଥ ସ୍ଥାନରେ ରହିଛନ୍ତି। ସେହିପରି ସ୍ବୀଡେନ ଫୁଟବଲର ଜ୍ଲଟାନ ଇବ୍ରାହିମୋଭିକ୍ ୧୮୪, ୪୧୩ ପାଉଣ୍ଡ, ପୂର୍ବତନ ଏନ୍ବିଏ ତାରକା ଡ୍ବାୟନ ଓ୍ବେଡ ୧୪୩,୧୪୬ ପାଉଣ୍ଡ, ବ୍ରାଜିଲ ଫୁଟବଲର ଡାନି ଆଲଭେସ ୧୩୩, ୬୯୪ ପାଉଣ୍ଡ ଓ ବକ୍ସର ଆନ୍ଥୋନୀ ଜୋଶୁଆ ୧୨୧,୫୦୦ ପାଉଣ୍ଡ ଅର୍ଥ ଉପାର୍ଜନ କରି ଟପ୍ରେ ସ୍ଥାନ ପାଇଛନ୍ତି।
