ବମ୍ବେ: ମନ ପସନ୍ଦର ସାଥୀଟିଏ ମିଳିଗଲେ ତାକୁ ନିଜର କରିନେବାକୁ ଇଚ୍ଛା ହୁଏ। ଗୋଟିଏ ଦିନ ଗୋଟିଏ ବର୍ଷ ପରି ଲାଗେ। ଏପରି ସମୟରେ ଅପେକ୍ଷାର ମାନେ କିଛି ନ ଥାଏ। ଠିକ୍ ଏଭଳି କିଛି ଘଟିଛି ବଲିଉଡ୍ ତଥା ଦକ୍ଷିଣ ଭାରତୀୟ ଅଭିନେତା ରାଣା ଦଗ୍ଗୁବତୀଙ୍କ କ୍ଷେତ୍ରରେ। ପ୍ରେମିକା ମିହିକା ବଜାଜ ହଁ କହିବା ପରେ ଏବେ ରାଣା ନିର୍ବନ୍ଧ କରିଥିବା ଘୋଷଣା କରିଛନ୍ତି। ଚାରିଆଡେ ଲକ୍ଡାଉନ୍ ଚାଲିଥିବା ସତ୍ତ୍ୱେ ରାଣା ନିଜ ଜୀବନକାହାଣୀକୁ ଆଗକୁ ନେଇ ନିର୍ବନ୍ଧ କରିନେଇଛନ୍ତି।
ଗୁରୁବାର ନିଜର ଇନ୍ଷ୍ଟା ପୃଷ୍ଠାରେ ଉଭୟ ରାଣା ଏବଂ ମିହିକା ନିର୍ବନ୍ଧୋତ୍ସବର କିଛି ଫଟୋ ଶେୟାର କରିଛନ୍ତି। ଫଟୋଗୁଡ଼ିକରେ ଉଭୟ ବେଶ୍ ଖୁସି ଥିବା ନଜର ଆସୁଛନ୍ତି। ରାଣା ଧଳା ଧୋତି ଏବଂ କୁର୍ତ୍ତା ପିନ୍ଧିଥିବା ବେଳେ ମିହିକା କମଳା-ଗୋଲାପୀ ରଙ୍ଗର ସାଢ଼ୀ ପିନ୍ଧିଛନ୍ତି।
ପୂର୍ବରୁ ରାଣା ମିହିକାଙ୍କୁ ପ୍ରପୋଜ୍ କରିଥିଲେ। ଏଥିରେ ହଁ ଭରିଥିଲେ ମିହିକା। ପରେ ଅର୍ଥାତ ୧୨ ମେ’ରେ ରାଣା ଏକ ପୋଷ୍ଟ କରି ପ୍ରଶଂସକଙ୍କ ସହ ନିଜର ଖୁସି ବାଣ୍ଟିଥିଲେ। ଏବେ ରାଣାଙ୍କ ନିର୍ବନ୍ଧ ନେଇ ପୋଷ୍ଟ କରିବା ପରେ ତାଙ୍କୁ ପ୍ରଶଂସକଙ୍କ ଶୁଭେଚ୍ଛାର ସୁଅ ଛୁଟିବାରେ ଲାଗିଛି।
ରାଣା ବ୍ଲକବଷ୍ଟର ବାହୁବଲୀ ସିରିଜ୍ରେ ଭଲ୍ଲାଲ ଦେବ ଭୂମିକାରେ ଅଭିନୟ କରି ବେଶ୍ ପ୍ରଶଂସା ସାଉଁଟିଛନ୍ତି। ସେହିଭଳି ବଲିଉଡ୍ ଫିଲ୍ମ ‘ହାଉସ୍ଫୁଲ୍ ୪’, ଦ ଗାଜି ଆଟାକ୍, ବେବି ଏବଂ ଦମ୍ ମାରୋ ଦମ୍ରେ ମଧ୍ୟ କାମ କରିଛନ୍ତି।