ଲକ୍ଷ୍ନୌ: କରୋନା ଭୂତାଣୁ ସମଗ୍ର ବିଶ୍ୱରେ କାୟା ବିସ୍ତାର କରିଥିବା ବେଳେ ଲୋକେ ପରିବାର ସହ ଘରେ ରହିବାକୁ ସରକାର ବାରମ୍ବାର ପରାମର୍ଶ ଦେଉଛନ୍ତି। କିନ୍ତୁ କିଛି ଲୋକ ବାହାରକୁ କାମ କରିବାକୁ ଯାଇ ଲକ୍ଡାଉନ୍ରେ ଫସି ଯାଇଛନ୍ତି। ଏପରି ଏକ ଘଟଣା ଉତ୍ତରପ୍ରଦେଶର ବରେଲିରେ ଦେଖିବାକୁ ମିଳିଛି। ଏଠାକାର ତମନ୍ନା ନାମକ ଜଣେ ୯ମାସର ଗର୍ଭବତୀ ମହିଳା ତାଙ୍କ ସ୍ବାମୀଙ୍କ ଫେରିବା ବାଟକୁ ଚାହିଁ ରହିଥିଲେ। ମାତ୍ର ତାଙ୍କ ସ୍ବାମୀ ନଏଡାରେ ଲକ୍ଡାଉନ୍ରେ ଫସିଯାଇଥିଲେ। ଏପଟେ ତମନ୍ନାଙ୍କର ପ୍ରସବ ଯନ୍ତ୍ରଣା ହେବାରୁ ସେ ଏକ ଭିଡିଓ ପ୍ରସ୍ତୁତ କରି ସ୍ଥାନୀୟ ପୋଲିସର ସହାୟତା ମାଗିବା ସହ ନଏଡା ପୋଲିସର ମଧ୍ୟ ସହାୟତା ମାଗିଥିଲେ। ଏହି ଭିଡିଓ ଦେଖି ବରେଲିର ଏସ୍ଏସ୍ପି ଶୈଳେଶ ପାଣ୍ଡେ ନଏଡା ଏସ୍ଏସ୍ପି ରଣବିଜୟ ସିଂଙ୍କ ସହାୟତା ମାଗିଥିଲେ। ରଣବିଜୟ ତୁରନ୍ତ ଗର୍ଭବତୀ ମହିଳାଙ୍କ ସ୍ବାମୀଙ୍କ ସମ୍ପର୍କରେ ଖବର ନେଇ ଯୋଗାଯୋଗ କରିଥିଲେ। ଶେଷରେ ତମନ୍ନାଙ୍କ ସ୍ବାମୀଙ୍କ ପତ୍ତା ପାଇ ନଏଡା ପୋଲିସ ନିଜ ଗାଡ଼ିରେ ବସାଇ ବରେଲି ଆଣିଥିଲା। ବରେଲି ପୋଲିସ ଶୈଳେଶ ପାଣ୍ଡେ ତୁରନ୍ତ ତମନ୍ନାଙ୍କୁ ହସ୍ପିଟାଲରେ ଭର୍ତ୍ତି କରାଇଥିଲେ।
ଏହି ଘଡ଼ିସନ୍ଧି ମୁହୂର୍ତ୍ତରେ ତମନ୍ନା ସ୍ବାମୀଙ୍କୁ ପାଖରେ ପାଇବା ସହ ଏକ ପୁତ୍ର ସନ୍ତାନକୁ ଜନ୍ମ ଦେଇଛନ୍ତି। ଦ୍ୱିତୀୟ ଥର ଆଉ ଏକ ଭିଡିଓ ପ୍ରସ୍ତୁତ କରି ସେ ବରେଲି ଏବଂ ନଏଡା ପୋଲିସକୁ ଧନ୍ୟବାଦ ଜଣାଇଛନ୍ତି। ସେ କହିଛନ୍ତି, ପୋଲିସ ଭଗବାନଠାରୁ କମ୍ ନୁହନ୍ତି। ଖାଲି ଏତିକି ନୁହେଁ, ସେ ତାଙ୍କ ପୁଅର ନାଁ ରଣବିଜୟ ରଖିଛନ୍ତି। ଏହି ଭିଡିଓ ଏବେ ସୋସିଆଲ ମିଡିଆରେ ବେଶ୍ ଭାଇରାଲ ହେବାରେ ଲାଗିଛି।