ନୂଆଦିଲ୍ଲୀ,୮।୬: କରୋନା ସଂକ୍ରମଣରୁ ଦୂରେଇ ରହିବା ପାଇଁ ସରକାରଙ୍କ ପକ୍ଷରୁ ଦେଶବ୍ୟାପୀ ଲକ୍ଡାଉନ୍ ଜାରି ହୋଇଛି। ଧୀରେଧୀରେ ଅର୍ଥ ବ୍ୟବସ୍ଥାରେ ସୁଧାର ଆଣିବା ପାଇଁ ସରକାରଙ୍କ ପକ୍ଷରୁ ଅନ୍ଲକ୍ ଆରମ୍ଭ ହୋଇଛି। ଲକ୍ଡାଉନ୍ ଯୋଗୁ ଏକୁଟିଆ ରହୁଥିବା ପରିବାର ସଦସ୍ୟ ଅଧିକ ବିସାଦ ଗ୍ରସ୍ତ ହୋଇପଡ଼ିଥିବା ଏକ ସର୍ଭେ ରିପୋର୍ଟରେ ଉଲ୍ଲେଖ କରାଯାଇଛି। ଆଇଆଇଏମ୍ ଇନ୍ଦୋରରେ ହୋଇଥିବା ଏହି ସର୍ଭେ ରିପୋର୍ଟରେ କୁହାଯାଇଛି ଯେ, କରୋନା ସଙ୍କଟ ସମୟରେ ଯୌଥ ପରିବାରରେ କମ୍ ମାନସିକ ଦୁଶ୍ଚିନ୍ତା ସୃଷ୍ଟି ହୋଇଛି। ଯୌଥ ପରିବାରରେ ସଦସ୍ୟମାନେ ପରସ୍ପର ମଧ୍ୟରେ କଥାବାର୍ତ୍ତା ହେବା ଯୋଗୁ ସେମାନେ ଅବସାଦ ମୁକ୍ତ ରହିଛନ୍ତି। ଲକ୍ଡାଉନ୍ ସମୟରେ ଇଣ୍ଟରନେଟ୍ର ବହୁଳ ବ୍ୟବହାର ହୋଇଛି। ଫଳରେ ଦେଶରେ ପ୍ରତିଦିନ ୧୫ରୁ ୧୮ ହଜାର ଟିବି ଡାଟା ବ୍ୟବହୃତ ହୋଇଥିବା ରିପୋର୍ଟରେ କୁହାଯାଇଛି। ସର୍ବାଧିକ ଲୋକ ୟୁଟ୍ୟୁବ୍ ଏବଂ ଓ୍ବେବ୍ ସିରିଜ୍ ପାଇଁ ଇଣ୍ଟରନେଟ୍ ବ୍ୟବହାର କରିଛନ୍ତି। ଗ୍ରାମାଞ୍ଚଳରେ ଇଣ୍ଟରନେଟ୍ ବ୍ୟବହାର ଲକ୍ଡାଉନ୍ରେ ଦୁଇଗୁଣା ବଢ଼ିଛି। ରାଜସ୍ଥାନରେ ସବସ୍କ୍ରାଇବରଙ୍କ ସଂଖ୍ୟାରେ ୬୦ ପ୍ରତିଶତ ବୃଦ୍ଧି ପାଇଛି। ଲୋକେ ଓ୍ବାର୍କ ଫ୍ରମ୍ ହୋମ୍ ଏବଂ ଭର୍ଚୁଆଲ୍ ମିଟିଂରେ ଇଣ୍ଟରନେଟ୍ ବ୍ୟବହାର କରିଛନ୍ତି। ଏଥିପାଇଁ ୫୦-୬୦ ପ୍ରତିଶତ ବ୍ରୋଡବ୍ୟାଣ୍ଡ ବ୍ୟବହାର କରିଥିବାବେଳେ ୪୦ ପ୍ରତିଶତ ମୋବାଇଲ୍ ଇଣ୍ଟରନେଟ୍କୁ ପ୍ରାଥମିକତା ଦେଇଛନ୍ତି। ଲକ୍ଡାଉନ୍ରେ ଦେଶରେ ଅନ୍ଲାଇନ୍ ଶିକ୍ଷା ବଜାର ୧୫୦ କୋଟି ଟଙ୍କାରେ ପହଞ୍ଚିଛି। ଏହି କ୍ଷେତ୍ରରେ ୯୫ ଲକ୍ଷ ଛାତ୍ରୀଛାତ୍ର ଅନ୍ଲାଇନ୍ରେ ପାଠପଢ଼ାରେ ଯୋଗ ଦେଇଥିବା ରିପୋର୍ଟରେ ପ୍ରକାଶ ପାଇଛି। ସୂଚନାଯୋଗ୍ୟ, ଇନ୍ଦୋର ଆଇଆଇଏମ୍ର ପ୍ରଫେସର ଯତିନ୍ ପାଣ୍ଡେ ଏବଂ କଲୋନେଲ୍ ଗୁରୁରାଜ ଗୋପିନାଥ ପାମିଡ଼ିଙ୍କ ଦ୍ୱାରା ଏହି ସର୍ଭେ ସମ୍ପନ୍ନ କରାଯାଇଛି।