କଟକ ଅଫିସ,୨।୪: କରୋନା ମୁକାବିଲା ପାଇଁ ସାରା ରାଜ୍ୟରେ ଲକ୍ଡାଉନ ସ୍ଥିତି ଜାରି ରହିଛି। ଏହି ସମୟରେ ଲୋକଙ୍କୁ ଘରେ ରହିବାକୁ ପରାମର୍ଶ ଦିଆଯାଉଛି। ହେଲେ ଲକ୍ଡାଉନ୍ ଯୋଗୁ ଅନେକେ ଲୋକ ଅସୁବିଧାର ସମ୍ମୁଖୀନ ହେଉଛନ୍ତି। ସେମାନଙ୍କୁ ସାହାଯ୍ୟ କରିବାକୁ ବିଭିନ୍ନ ସ୍ବେଚ୍ଛାସେବୀ, ସରକାରୀ ଅନୁଷ୍ଠାନ, ପୋଲିସ ଆଗେଇ ଆସୁଥିବା ଦେଖାଯାଉଛି। ଇତିମଧ୍ୟରେ ଲୋକଙ୍କୁ ଅତ୍ୟାବଶ୍ୟକ ସେବା ଯୋଗାଇ ଦେଉଥିବା ଭାରତୀୟ ଡାକ ବିଭାଗ ମଧ୍ୟ ଏଭଳି ଘଡ଼ିସନ୍ଧି ମୁହୂର୍ତ୍ତରେ ଲୋକଙ୍କ ପାଖରେ ପହଞ୍ଚି ବିଭିନ୍ନ ସେବା ପ୍ରଦାନ କରୁଛି। ବିଶେଷକରି ବିଭିନ୍ନ ସ୍ଥାନରୁ ଡାକରେ ଆସୁଥିବା ମେଡ଼ିସିନ ଲୋକଙ୍କ ଘରେ ନେଇ ଡାକ ବିଭାଗ ପହଞ୍ଚାଉଛି । ସେହିପରି ବୟୋଜ୍ୟେଷ୍ଠ ବ୍ୟକ୍ତିଙ୍କୁ ଏଇପିଏସ୍(ଆଧାର ଏନେବୁଲ୍ଡ ପେମେଣ୍ଟ ସିଷ୍ଟମ) ଜରିଆରେ ପେନସନ୍ ଯୋଗାଇ ଦିଆଯାଉଛି। ଏହାଛଡ଼ା ଗୁରୁବାର ପୋଷ୍ଟ ଅଫିସ କଲ୍ୟାଣ ପାଣ୍ଠିରୁ କଟକ ନଗର ମଣ୍ଡଳ ନିସହାୟମାନଙ୍କୁ ଖାଦ୍ୟ ସମାଗ୍ରୀ ଚାଉଳ, ଡାଲି, ଅଟା, ଛତୁଆ, ବିସ୍କୁଟ, ସାବୁନ ଆଦି ବଣ୍ଟନ କରାଯାଇଥିଲା। କଟକ ନଗର ମଣ୍ଡଳର ବରିଷ୍ଠ ଡାକ ଅଧୀକ୍ଷକ ସୁଚିସ୍ମିତା ସ୍ବାଇଁଙ୍କ ନିର୍ଦ୍ଦେଶାନୁସାରେ ସହକାରୀ ଡାକ ଅଧିକ୍ଷକ ଅସିତ୍ କୁମାର ନାୟକଙ୍କ ତତ୍ତ୍ୱାବଧାନରେ ବିଡାନାସି, ଚଣ୍ଡି ଛକ, ବକ୍ସି ବଜାର, ବାରବାଟୀ ଷ୍ଟାଡିୟମ ଆଦି ବିଭିନ୍ନ ଜାଗାରେ ଗରିବ ଏବଂ ନିସହାୟଙ୍କୁ ଖାଦ୍ୟ ସାମଗ୍ରୀ ବିତରଣ କରାଯାଇଥିବା ସୂଚନା ମିଳିଛି।