ନୂଆଦିଲ୍ଲୀ,୧୪।୪(ପି.ଟି.)- କୋଭିଡ୍-୧୯ ମୁକାବିଲା ପାଇଁ ଦେଶରେ ଚାଲିଥିବା ଲକ୍ଡାଉନ୍ ଅବଧି ମେ ୩ ତାରିଖରୁ ବୃଦ୍ଧି ପାଇଥିବା ବେଳେ ହକି ଇଣ୍ଡିଆ ମଧ୍ୟ ଏ ସଂକ୍ରାନ୍ତରେ ଏକ ଗୁରୁତ୍ୱପୂର୍ଣ୍ଣ ନିଷ୍ପତ୍ତି ନେଇଛି। ସାରା ଦେଶରେ ଆୟୋଜନ ହେବାକୁ ଥିବା ସବୁପ୍ରକାର ଜାତୀୟ ଚାମ୍ପିୟନଶିପ୍କୁ ହକି ଇଣ୍ଡିଆ ଅନିର୍ଦ୍ଦିିଷ୍ଟ କାଳ ପାଇଁ ସ୍ଥଗିତ ରଖଛି। ପୁନଃ ନିର୍ଦ୍ଧାରିତ କାର୍ଯ୍ୟସୂଚୀ ଅନୁଯାୟୀ ଏହି ଟୁର୍ନାମେଣ୍ଟଗୁଡିକ ଏପ୍ରିଲ ୨୯ରୁ ଆରମ୍ଭ ହୋଇ ଜୁଲାଇ ୩ ତାରିଖ ପର୍ଯ୍ୟନ୍ତ ଚାଲୁ ରହିବାର କାର୍ଯ୍ୟକ୍ରମ ଥିଲା। ତେବେ ବର୍ତ୍ତମାନ ଏଗୁଡିକୁ ସ୍ଥଗିତ ରଖାଯାଇଛି ବୋଲି ହକି ଇଣ୍ଡିଆ ତରଫରୁ କୁହାଯାଇଛି।
ହକି ସହିତ ଜଡିତ ରହୁଥିବା ସବୁ ବ୍ୟକ୍ତିବିଶେଷ, ଖେଳାଳି, କୋଚ, ଆୟୋଜକ, ପ୍ରଶଂସକ ଓ ଅଫିସିଆଲଙ୍କ ବୃହତ୍ତର ସ୍ବାର୍ଥକୁ ଦୃଷ୍ଟିରେ ରଖି ୨୦୨୦ରେ ବାକିଥିବା ହକି ଇଣ୍ଡିଆ ଜାତୀୟ ଚାମ୍ପିୟନଶିପ୍ଗୁଡିକୁ ବାତିଲ କରିବାକୁ ନିଷ୍ପତ୍ତି ନେଇଛୁ ବୋଲି ହକି ଇଣ୍ଡିଆ ଅଧ୍ୟକ୍ଷ ମହମ୍ମଦ ମୁସ୍ତାକ ଅହମ୍ମଦ କହିଛନ୍ତି। ଅନିର୍ଦ୍ଦିଷ୍ଟ କାଳ ପାଇଁ ଏହି ଟୁର୍ନାମେଣ୍ଟଗୁଡିକୁ ବାତିଲ କରାଯାଇଛି ଓ କୋଭିଡ୍-୧୯ ପରିସ୍ଥିତିରେ ଉନ୍ନତି ଆସିବା ପରେ ଓ ସ୍ଥିତି ସ୍ବାଭାବିକ ହେବା ପରେ ନୂଆ ତାରିଖ ନେଇ ଘୋଷଣା ହେବ ବୋଲି ସେ ସ୍ପଷ୍ଟ କରିଛନ୍ତି। ସର୍ବସାଧାରଣଙ୍କ ସ୍ବାସ୍ଥ୍ୟକୁ ଦୃଷ୍ଟିରେ ରଖି କେନ୍ଦ୍ର ସରକାର ଓ ରାଜ୍ୟ ସରକାରଙ୍କ ବିଭିନ୍ନ ବିଭାଗ ସହ ମିଳିତ ଭାବେ କାର୍ଯ୍ୟକରୁଛୁ ଓ ଆବଶ୍ୟକ ଆଗୁଆ ପଦକ୍ଷେପ ନେଉଛୁ ବୋଲି ସେ କହିଛନ୍ତି। ଏ ସଂକ୍ରାନ୍ତରେ ସବୁ ଅଂଶଗ୍ରହଣକାରୀ ମେମ୍ବର ୟୁନିଟ୍ ପୋର୍ଟାଲ ଓ ଖେଳାଳିଙ୍କ ବିବରଣୀକୁ ଅପଡେଟ୍ କରିବାକୁ କୁହାଯାଇଛି। ଏହି କଷ୍ଟକର ନିଷ୍ପତ୍ତି ନେବାରେ ସହଯୋଗ କରିଥିବାରୁ ସବୁ ଆୟୋଜକ ମେମ୍ବର ୟୁନିଟ୍କୁ ସେ ଧନ୍ୟବାଦ ଜଣାଇଛନ୍ତି।
ସ୍ଥଗିତ ରଖାଯାଇଥିବା ଟୁର୍ନାମେଣ୍ଟଗୁଡିକରେ ୧୦ମ ହକି ଇଣ୍ଡିଆ ଜୁନିୟର ମହିଳା ନ୍ୟାଶନାଲ ଚାମ୍ପିୟନଶିପ୍ ୨୦୨୦, ୧୦ମ ହକି ଇଣ୍ଡିଆ ଜୁନିୟର ପୁରୁଷ ନ୍ୟାଶନାଲ ଚାମ୍ପିୟନଶିପ୍, ୧୦ମ ହକି ଇଣ୍ଡିଆ ସବ୍ ଜୁନିୟର ମହିଳା ନ୍ୟାଶନାଲ ଚାମ୍ପିୟନଶିପ୍, ୧୦ମ ହକି ଇଣ୍ଡିଆ ସବ୍ ଜୁନିୟର ପୁରୁଷ ଚାମ୍ପିୟନଶିପ୍, ୧୦ମ ହକି ଇଣ୍ଡିଆ ସିନିୟର ପୁରୁଷ ନ୍ୟାଶନାଲ ଚାମ୍ପିୟନଶିପ୍ ଭଳି ଟୁର୍ନାମେଣ୍ଟ ସାମିଲ ରହିଛି।