ବେଙ୍ଗାଲୁରୁ,୧୭।୪: ସାରା ଦେଶରେ କରୋନା ଭାଇରସ୍ ପ୍ରକୋପ ଜାରି ରହିଛି। କରୋନା ସହ ମୁକାବିଲା ପାଇଁ ସାରାଦେଶରେ ଲକ୍ଡାଉନ୍ ଘୋଷଣା କରାଯାଇଛି। ଏଥିସହ ସାମାଜିକ ଦୂରତ୍ୱ ବନାଇ ରଖିବା ପାଇଁ ସରକାରଙ୍କ ପକ୍ଷରୁ ସମସ୍ତଙ୍କୁ ଅପିଲ୍ ମଧ୍ୟ କରାଯାଉଛି। ହେଲେ ଏହାକୁ ସାଧାରଣ ଜନତା ତ ଛାଡ଼ ରାଜନେତା ମଧ୍ୟ ମାନୁ ନ ଥିବା ଦେଖିବାକୁ ମିଳିଛି। କିଛି ଏଭଳି ଦୃଶ୍ୟ ଦେଖିବାକୁ ମିଳିଛି ବେଙ୍ଗାଲୁରୁରେ। କର୍ନାଟକର ପୂର୍ବତନ ମୁଖ୍ୟମନ୍ତ୍ରୀ ଏଚ୍.ଡି କୁମାରସ୍ବାମୀ ଲକ୍ଡାଉନ୍ ନିୟମ ଉଲ୍ଲଂଘନ କରିବା ସହ ଆଡ଼ମ୍ବରରେ ପୁଅର ବିବାହ କରିଥିବା ଜଣାପଡ଼ିଛି। ସୂଚନାଯୋଗ୍ୟ, ଶୁକ୍ରବାର ରାମନଗର ଜିଲାରେ ଥିବା ଫାର୍ମ ହାଉସ୍ରେ କୁମାରସ୍ବାମୀ ପୁଅ ନିଖିଲ ଓ ରେବତୀଙ୍କ ବିବାହ ଅନୁଷ୍ଠିତ ହୋଇଥିଲା। ଏହି ବିବାହକୁ ସମ୍ପୂର୍ଣ୍ଣ ବ୍ୟକ୍ତିଗତ ରଖାଯାଇଥିବା ବେଳେ ଏଥିରେ ପରିବାରର ମାତ୍ର ୭୦ଜଣ ସାମିଲ ହେବେ ବୋଲି ଜିଲା ପ୍ରଶାସନକୁ ସୂଚନା ଦିଆଯାଇଥିଲା। ବିବାହ କାର୍ଯ୍ୟକ୍ରମ ରୀତିନୀତି ଅନୁସାରେ ହୋଇଥିଲା। ଏହି ସମୟରେ ସାମାଜିକ ଦୂରତ୍ୱକୁ ଧ୍ୟାନରେ ରଖାଯାଇ ଅତିଥିଙ୍କ ବସିବା ପାଇଁ ଚେୟାରର ଆୟୋଜନ କରାଯାଇଥିଲା।
କିନ୍ତୁ ଠିକ୍ ମଙ୍ଗଳସୂତ୍ର ପିନ୍ଧାଇବା ସମୟରେ ଅର୍ଥାତ୍ ପରିବାରର ସମସ୍ତ ଲୋକ ବର କନ୍ୟାଙ୍କୁ ଘେରିଯାଇଥିଲେ। ପ୍ରାୟ ୧ଘଣ୍ଟା ଧରି ସେମାନେ ବର କନ୍ୟାଙ୍କୁ ଘେରି ରହିଥିବା ନଜର ଆସିଛି। ଏହି ସମୟର ଦୃଶ୍ୟ ଏବେ ସୋସିଆଲ ମିଡିଆରେ ଭାଇରାଲ ହେବାରେ ଲାଗିଛି। ଯାହା ଏବେ ଚର୍ଚ୍ଚାର ପରିସରକୁ ଆସିଛି। ସୂଚନା ମୁତାବକ ପୁର୍ବରୁ କୁମାରସ୍ବାମୀଙ୍କୁ ଏହି ବିବାହ ସ୍ଥଗିତ କରିବାକୁ ପରାମର୍ଶ ଦିଆଯାଇଥିଲା। ହେଲେ ସେ ଜ୍ୟୋତିଷଙ୍କ କଥା ମାନି ଲକ୍ଡାଉନ୍ ଓ କରୋନା ସଙ୍କଟ ମଧ୍ୟରେ ଆଡ଼ମ୍ବରରେ ପୁଅ ନିଖିଲର ବିବାହ କରାଇଥିଲେ। ଅପରପକ୍ଷେ ଏହି ବିବାହ କାର୍ଯ୍ୟକ୍ରମ ଉପରେ ସ୍ଥାନୀୟ ପୋଲିସ ନଜର ରଖିବା ସହ ନିୟମ ଉଲ୍ଲଂଘନ ହେଲେ କାର୍ଯ୍ୟାନୁଷ୍ଠାନ ଗ୍ରହଣ କରିବ ବୋଲି ପୂର୍ବରୁ କର୍ନାଟକ ସରକାର ନିର୍ଦ୍ଦେଶ ଦେଇଥିଲେ। ଲକ୍ଡାଉନ୍ ସମୟରେ ଏଭଳି କେତେକ ଫଟୋ ସାମ୍ନାକୁ ଆସିଛି ଯେଉଁଥିରେ ଭିଡିଓ କନ୍ଫରେନ୍ସିଂରେ ଯୁବକ ଯୁବତୀ ବିବାହ କରୁଥିବା ଦେଖିବାକୁ ମିଳିଛି। ହେଲେ ରାଜନେତାଙ୍କ ଏହି ସାହି ବିବାହ ଆୟୋଜନ ସବୁ ମହଲରେ ଏବେ ପ୍ରଶ୍ନବାଚୀ ସୃଷ୍ଟି ହୋଇଛି।