ପୁରୀ ଅଫିସ,୩୦ା୩: ସମଗ୍ର ଦେଶରେ ଏବେ ୨୧ ଦିନିଆ ଲକ୍ଡାଉନ ଚାଲିଛି। କରୋନା ଭାଇରସ୍ ମୁକାବିଲା ପାଇଁ ଏଭଳି ଏକ ପଦକ୍ଷେପ ନିଆଯାଇଛି। ପୁରୀ ଜିଲା ପ୍ରଶାସନ ଲକ୍ଡାଉନ କଟକଣାକୁ କିପରି କଡ଼ାକଡ଼ି ଭାବେ ପାଳନ କରାଯିବ ସେ ଦିଗରେ ଉଦ୍ୟମ ଜାରି ରଖିଛି। କିନ୍ତୁ ରବିବାର ମାଛ ମାର୍କେଟରେ ଲକ୍ଡାଉନ ନିୟମକୁ ଖୋଲାଖୋଲି ଉଲ୍ଲଂଘନ କରିଛନ୍ତି ମାଛ ବ୍ୟବସାୟୀ ଓ ଗ୍ରାହକ। ସାମାଜିକ ଦୂରତାକୁ ଭୁଲି ଗୋଟିଏ ଦୋକାନରେ ଲାଗିଥିଲା ଗହଳି। ମାଛ ନେବା ପାଇଁ ମୁହଁକୁ ମୁହଁ ଯୋଡ଼ିି ଛିଡା ହୋଇଥିଲେ ଗ୍ରାହକ।
କରୋନା ମୁକାବିଲା ପାଇଁ ସାମାଜିକ ଦୂରତା ରକ୍ଷା ଉପରେ ଅଧିକ ଗୁରୁତ୍ୱ ଦିଆଯାଇଛି। କେଉଁଠି ଯେପରି ଲୋକଙ୍କ ଗହଳି ନ ହେବ ସେଥିପାଇଁ ସାମାଜିକ କାର୍ଯ୍ୟକ୍ରମ ବନ୍ଦ ରହିଛି। ଏଥିପାଇଁ ଦେଶବ୍ୟାପୀ ଲକ୍ଡାଉନ ହୋଇଛି। କେବଳ ଅତ୍ୟାବଶ୍ୟକ ସାମଗ୍ରୀ କିଣିବା ପାଇଁ ଲୋକଙ୍କୁ ଘରୁ ବାହାରିବାକୁ ଅନୁମତି ଥିବାବେଳେ ଅନେକେ ଏହାର ଫାଇଦା ନେଉଛନ୍ତି। ଅତ୍ୟାବଶ୍ୟକ ସାମଗ୍ରୀ କିଣିବା ବାହାନାରେ ବିଭିନ୍ନ ଦୋକାନରେ ଭିଡ଼ ଜମାଉଛନ୍ତି। ତେଣୁ ପରିବା ହାଟ, ଦୋକାନ ସମ୍ମୁଖରେ ଗ୍ରାହକ ଛିଡ଼ା ହେବା ପାଇଁ ଚିହ୍ନ ଦିଆଯାଇଛି। ମାତ୍ର ମାଛ ମାର୍କେଟରେ ଏପରି କରାଯାଇ ନାହିଁ। ରବିବାର ସହରର ବିଭିନ୍ନ ମାଛ ମାର୍କେଟରେ ପୂର୍ବଭଳି ଭିଡ଼ ଦେଖିବାକୁ ମିଳିଥିଲା। ବ୍ୟବସାୟୀ ନା ଗ୍ରାହକ କେହି ବି ସାମାଜିକ ଦୂରତାକୁ ରକ୍ଷା କରି ନ ଥିଲେ। ଲକ୍ଡାଉନ ନିୟମକୁ ଖୋଲାଖୋଲି ଉଲ୍ଲଂଘନ କରିଥିଲେ। ଗୋଟିଏ ମାଛ ଦୋକାନ ସମ୍ମୁଖରେ ୧୦/୧୫ ଜଣ ଗହଳି କରି ଛିଡ଼ା ହୋଇଥିବା ଦେଖିବାକୁ ମିଳିଥିଲା। ଜଣେ ମାଛ ବ୍ୟବସାୟୀ କହିଛନ୍ତି, ଆମେ ଗ୍ରାହକଙ୍କୁ ଗୋଟିଏ ମିଟର ଦୂରତା ରକ୍ଷା କରିବା ଲାଗି କହୁଛୁ। ମାତ୍ର ସେମାନେ ଶୁଣୁନାହାନ୍ତି। ଆମେ କ’ଣ କରିବୁ ବୋଲି ସେ କହିଥିଲେ। ତେବେ ମାଛ ମାର୍କେଟ ଉପରେ ପ୍ରଶାସନ ପକ୍ଷରୁ ନଜର ଦିଆଯିବା ଦରକାର ବୋଲି ଅନେକ ବୁଦ୍ଧିଜୀବୀ କହିଛନ୍ତି।