କୁର୍ନୁଲ,୧।୪: କରୋନା ଭାଇରସ୍କୁ ନେଇ ସାରା ଦେଶରେ ଆତଙ୍କ ଖେଳିଯାଇଛି। କରୋନା ପାଇଁ ଏପର୍ଯ୍ୟନ୍ତ କୌଣସି ଔଷଧ ବାହାରି ନ ଥିବା ବେଳେ ଏଥିରୁ ବର୍ତ୍ତିବା ପାଇଁ କେବଳ ସାମାଜିକ ଦୂରତ୍ୱ ଏକମାତ୍ର ଉପାୟ। ଫଳରେ କରୋନାକୁ ବ୍ୟାପିବାରୁ ରୋକିବା ପାଇଁ ସାରାଦେଶରେ ଲକ୍ଡାଉନ୍ ଜାରି କରାଯାଇଛି। ଦେଶର ଅଧିକାଂଶ ଲୋକ ଏହାକୁ ପାଳନ କରୁଥିବା ବେଳେ ଆଉ କେତେକ ପାଳନ କରୁ ନ ଥିବା ଦେଖିବାକୁ ମିଳୁଛି। ତେଣୁ ଏନେଇ ଲୋକଙ୍କୁ ସଚେତନ କରାଇବା ପାଇଁ ପୋଲିସ ପକ୍ଷରୁ ଭିନ୍ନ ଉପାୟ କରାଯାଉଛି। କିଛି ଏଭଳି ନିଆରା ଦୃଶ୍ୟ ଦେଖିବାକୁ ମିଳିଛି ଆନ୍ଧ୍ରପ୍ରଦେଶ କୁର୍ନୁଲ ଜିଲାର ଧୋନେ ଅଞ୍ଚଳରେ। ଲୋକଙ୍କୁ ସାମାଜିକ ଦୂରତ୍ୱ ବିଷୟରେ ସଚେତନ କରାଇବା ପାଇଁ ରାଜରାସ୍ତାକୁ ଓହ୍ଲାଇଥିଲେ ଖୋଦ ଯମରାଜ। ବୁଧବାର ସ୍ଥାନୀୟ କଳାକାରମାନେ ଯମରାଜା, ଚିତ୍ରଗୁପ୍ତ ଓ କରୋନା ବେଶରେ ପୋଲିସଙ୍କ ସହ ମିଶି ରାସ୍ତାରେ ବୁଲି ବୁଲି ଲୋକଙ୍କୁ କରୋନା ବିଷୟରେ ସଚେତନ କରିବା ଲକ୍ଡାଉନ୍ ପାଳନ କରିବା ପାଇଁ ପରାମର୍ଶ ଦେଇଥିଲେ। ଯଦି କିଏ ଘରୁ ବାହାରନ୍ତି ତେବେ ତାଙ୍କୁ ଯମରାଜା ଉଠେଇ ନେଇଯିବେ ବୋଲି ଚେତାବନୀ ଦେବା ସହ ଏହି ମାଧ୍ୟମରେ ସମସ୍ତଙ୍କୁ ଏକ ବାର୍ତ୍ତା ଦେଇଥିଲେ।
