ଛତ୍ରପୁର,୨୬ା୪(ଡି.ଏନ୍.ଏ.) : ଗଞ୍ଜାମ ଜିଲାରେ ରବିବାରଠାରୁ ଲକ୍ଡାଉନ୍ ନିୟମରେ ସାମାନ୍ୟ କୋହଳ କରିଛନ୍ତି ଜିଲାପାଳ ବିଜୟ ଅମୃତା କୁଲାଙ୍ଗେ। ମହାନଗର ନିଗମରେ ଥିବା ମାର୍କେଟ କମ୍ପ୍ଲେକ୍ସ ଓ ଆବାସିକ ମାର୍କେଟ କମ୍ପ୍ଲେକ୍ସ ଖୋଲାରହିବ। ଏନେଇ ଜିଲାପାଳ ନିର୍ଦ୍ଦେଶନାମା ଜାରି କରିଛନ୍ତି। ତେବେ ୫୦ ପ୍ରତିଶତ ଏଥିରେ କର୍ମଚାରୀ ରହିବେ ଅପରପକ୍ଷରେ ସମସ୍ତ ଅତ୍ୟାବଶ୍ୟକ ସାମଗ୍ରୀ, ପଞ୍ଜିକୃତ ମାଛ, ମାଂସ, ଅଣ୍ଡା ଦୋକାନ ପୂର୍ବଭଳି ସକାଳ ୭ଟାରୁ ମଧ୍ୟାହ୍ନ ୧୨ଟା ପର୍ଯ୍ୟନ୍ତ ହିଁ ଖୋଲା ରହିବ। ଔଷଧ ଦୋକାନ ୨୪ ଘଣ୍ଟା ଖୋଲିବ। ମାସ୍କ ପିନ୍ଧିବା ଓ ସାମାଜିକ ଦୂରତ୍ୱକୁ ଜିଲାପାଳ ବାଧ୍ୟତାମୂଳକ କରିଛନ୍ତି । ଏଥିରେ ଖିଲାପ କଲେ ଆଇନ ଅନୁଯାୟୀ କଡ଼ା କାର୍ଯ୍ୟାନୁଷ୍ଠାନ ନିଆଯିବ ବୋଲି ଜିଲାପାଳ କହିଛନ୍ତି। ସରକାରୀ ଜମିରେ ଦୋକାନ ଖୋଲିପାରିବନି। ବରିଷ୍ଠ ନାଗରିକ ଓ ଶିଶୁ ଘରେ ରହିବାକୁ ଜିଲାପାଳ ପରାମର୍ଶ ଦେଇଛନ୍ତି। ଏଥିସହ ଘରକୁ ଘର ଯାଇ ଅତ୍ୟାବଶ୍ୟକ ସାମଗ୍ରୀ ଦୋକାନୀମାନେ ପହଞ୍ଚାଇବା ଉପରେ ଜିଲାପାଳ ଗୁରୁତ୍ୱାରୋପ କରିଛନ୍ତି। ପୂର୍ବଭଳି ଜିଲାରେ ମଦ, ମଲ୍, ଫାଷ୍ଟଫୁଡ୍, ଚା’ ଓ ପାନ ଦୋକାନ ବନ୍ଦ ରହିବ।