ରାଇକିଆ,୨୫।୩(ଡି.ଏନ୍.ଏ.): ସାରା ଦେଶରେ ଲକ୍ଡାଉନ୍ ଲାଗୁ ହେବା ପରେ ଏହାର ପ୍ରଭାବ ଦେଖିବାକୁ ମିଳିଛି କନ୍ଧମାଳ ଜିଲା ରାଇକିଆ ଅଞ୍ଚଳରେ। ଦୋକାନ ବଜାର ବନ୍ଦ ରହିବା ସହ ଯାନବାହନ ଚଳାଚଳ ସମ୍ପୂର୍ଣ୍ଣ ବନ୍ଦ ରହିଛି। ଏପରିକି ଦୁଇ ଚକିଆ ଯାନକୁ ମଧ୍ୟ ଆଦୌ ଛଡ଼ା ଯାଉନାହିଁ। ଅନ୍ୟପକ୍ଷରେ ଦୁଇଦିନ ହେଲା ମଙ୍ଗଳ ବିଭାଗର ବିଭିନ୍ନ ହଷ୍ଟେଲରୁ ଛାତ୍ରୀଛାତ୍ରଙ୍କୁ ଘରକୁ ଛଡ଼ା ଯାଉଥିବା ବେଳେ ଏହାକୁ ନେଇ ଅଭିଭାବକ ଅସୁବିଧାର ସମ୍ମୁଖୀନ ହୋଇଛନ୍ତି। ରାଇକିଆ ପୋଲିସର କଡ଼ା ଯାଞ୍ଚ ଯୋଗୁ କିଛି ଅଭିଭାବକ ହଷ୍ଟେଲରେ ପହଞ୍ଚିବାରେ ଅସୁବିଧା ସମ୍ମୁଖୀନ ହୋଇଛନ୍ତି। ଆବଶ୍ୟକୀୟ ପ୍ରମାଣପତ୍ର ନ ଥିଲେ ଛଡ଼ା ଯାଉନାହିଁ। ଯାନବାହନ ଚଳାଚଳ ହେଉ ନ ଥିବାରୁ ଦୂରଦୂରାନ୍ତକୁ ଚାଲିଚାଲି ଘରେ ପହଞ୍ଚିଛନ୍ତି। ଏ ନେଇ ରାଇକିଆ ମଙ୍ଗଳ ସମ୍ପ୍ରସାରଣ ଅଧିକାରୀ ପ୍ରତାପ ମହାନ୍ତି କହିଛନ୍ତି, ପ୍ରଥମେ ଷ୍ଟାଇପେଣ୍ଡ୍ ବ୍ୟାଙ୍କରୁ ଟଙ୍କା ଉଠାଇବା ବେଳେ ସମସ୍ୟା ହୋଇଥିଲା। ପରେ ଛାତ୍ରୀଛାତ୍ରଙ୍କୁ ଟଙ୍କା ଦେଇ ଛାଡ଼ିଲା ବେଳେ ମଧ୍ୟ ବିଳମ୍ବ ଘଟୁଛି। ଅନ୍ୟପକ୍ଷରେ ଅଭିଭାବକମାନେ ପିଲାଙ୍କୁ ନେବା ପାଇଁ ପହଞ୍ଚିବାରେ ଅସୁବିଧାର ସମ୍ମୁଖୀନ ହେଉଛନ୍ତି। ରାସ୍ତାରେ ବିଭିନ୍ନ ପ୍ରକାର ଯାଞ୍ଚର ସମ୍ମୁଖୀନ ହେବାକୁ ପଡୁଥିବାରୁ ଅଦ୍ୟାବଧି ସବୁ ପିଲାଙ୍କୁ ଛାଡ଼ିବା ସମ୍ଭବପର ହୋଇପାରିନାହିଁ।
