କଟକ ଅଫିସ୍,୧୨।୪: କରୋନା ଭୂତାଣୁ ସଂକ୍ରମଣକୁ ରୋକିବା ପାଇଁ ଉଭୟ କେନ୍ଦ୍ର ଏବଂ ରାଜ୍ୟ ସରକାରଙ୍କ ତରଫରୁ ଲକ୍ଡାଉନ୍ ଘୋଷଣା କରାଯାଇଛି। ଏହାର ପ୍ରଭାବ ଜନଜୀବନ ଉପରେ ଗଭୀର ଭାବେ ପଡ଼ିିଛି। ବିଶେଷ ଭାବେ ପରିବା ଚାଷୀମାନେ ଏବେ ପ୍ରବଳ କ୍ଷତି ସହୁଛନ୍ତି। ଅମଳ ସମୟରେ ବିକ୍ରିକୁ ନେଇ ସେମାନେ ଚିନ୍ତାରେ ଅଛନ୍ତି।
ବିଶ୍ୱବାସୀଙ୍କ ଜୀବନଯାତ୍ରାକୁ କରୋନା ସମ୍ପୂର୍ଣ୍ଣ ଭାବେ ପ୍ରଭାବିତ କରିଛି। ଏହି ଦୁଃଖଦାୟକ ପରିସ୍ଥିତିରୁ ପରିବା ଚାଷୀ ବାଦ୍ ପଡ଼ି ନାହାନ୍ତି। ମାର୍ଚ୍ଚ ୨୨ ତାରିଖ ଜନତା କର୍ଫ୍ୟୁ ଓ ତାପରେ ଲକ୍ଡାଉନ ଘୋଷଣା ହେବା ଫଳରେ ପରିବା ଚାଷୀମାନେ ମୁଣ୍ଡରେ ହାତ ଦେଇ ବସିଛନ୍ତି। ସେମାନେ ଘରୋଇ ହାତ ଉଧାରି ଓ ବେପାରୀମାନଙ୍କଠାରୁ ଋଣ ଆଣି ପରିବା ଚାଷରେ ବିନିଯୋଗ କରିଥିଲେ। ଫେବୃୟାରୀ ଓ ମାର୍ଚ୍ଚରେ ଅଦିନିଆ କୁଆପଥର ବର୍ଷା ଯୋଗୁ ଫସଲ ନଷ୍ଟ ହୋଇ ସେମାନଙ୍କ ମେରୁଦଣ୍ଡକୁ ଦୋହଲାଇ ଦେଇଥିଲା। ବର୍ତ୍ତମାନ ପରିବା ଅମଳ ସମୟ, ବିକ୍ରିବଟା ନ ଥିବାରୁ ଚାଷୀମାନଙ୍କୁ ନିରାଶ କରିଛି।
ସୂଚନାଯୋଗ୍ୟ, କଟକ ଜିଲାରେ ପ୍ରଚୁର ପରିମାଣରେ ପରିବା ଚାଷ ହୋଇଥାଏ। ଓଡ଼ିଶାକୁ ପରିବା ଯୋଗାଇବାରେ କଟକ ଅଗ୍ରଣୀ ଜିଲା ଭାବେ ପରିଚିିତ। ବର୍ତ୍ତମାନ ବାଇଗଣ, ବିନ୍, ଝୁଡ଼ଙ୍ଗ, କଖାରୁ, ଭେଣ୍ଡି, ଜହ୍ନି, କଲରା, ପୋଟଳ, ବିଲାତି ଓ କାକୁଡ଼ି ଆଦି ପ୍ରଚୁର ପରିମାଣରେ ଅମଳ ହେଉଛି। ଲକ୍ଡ଼ାଉନ୍ ଘୋଷଣା ହେବାପରେ ବେପାରୀମାନେ ନିଜ ଅଞ୍ଚଳରୁ ବଜାରକୁ ଅଧିକ ପରିମାଣର ପରିବା ଆଣିବା ଉପରେ କଟକଣା ଜାରି ହୋଇଛି। ଦୋକାନ ବଜାର ଓ ଆଞ୍ଚଳିକ ହାଟଗୁଡ଼ିକୁ ମଧ୍ୟ ବନ୍ଦକରି ଦିଆଯାଇଛି। ଅନ୍ୟପଟେ ପୋଲିସ ଜୁଲମ ଭୟରେ ଚାଷୀମାନେ ବଜାରକୁ ବେପାର କରିବାକୁ ଯାଇପାରୁ ନାହାନ୍ତି। ଫଳରେ ସେମାନେ ପ୍ରବଳ କ୍ଷତିର ସମ୍ମୁଖୀନ ହେଉଛନ୍ତି। ବର୍ତ୍ତମାନ ପରିବା ଚାଷୀଙ୍କ ହାତ ଉଧାରି ବେପାରୀ ଓ ସାର ଦୋକାନୀର ଟଙ୍କା ପରିଶୋଧ କରିବାର ଆଶା ମଉଳିଯାଇଛି। ପୂର୍ବ ଘୋଷିତ ୨୧ ଦିନର ଲକ୍ଡ଼ାଉନ୍କୁ ପୁନର୍ବାର ୧୬ ଦିନ ବୃଦ୍ଧି ହେବା ଫଳରେ ଚାଷୀ ମୁଣ୍ଡରେ ଚଡ଼କ ପଡ଼ିଛି। ଲକ୍ଡ଼ାଉନ୍ ସରିବା ବେଳକୁ ପରିବା ଅମଳ ହେବାର ନିର୍ଦ୍ଦିଷ୍ଟ ସମୟ ସୀମା ମଧ୍ୟ ସରିଯାଇଥିବ। ଏ ପରିସ୍ଥିତିରେ ଚାଷୀମାନେ ମାନସିକ ଭାରସାମ୍ୟ ହରାଇ ଆମତ୍ହତ୍ୟା ରାସ୍ତାକୁ ଆବୋରି ନେଇପାରନ୍ତି ବୋଲି ଏସ୍ୟୁସିଆଇ(ସି) କଟକ ଜିଲା ସମ୍ପାଦକ ବିଶ୍ୱାବସୁ ଦାସ ଏକ ପ୍ରେସ୍ ବିବୃତିରେ ପ୍ରକାଶ କରିଛନ୍ତି। ସରକାର ସମସ୍ତ ଚାଷୀ ପରିବାକୁ ଚିହ୍ନଟକରି ପ୍ରତ୍ୟେକଙ୍କୁ ଉପଯୁକ୍ତ କ୍ଷତିପୂରଣ ଯୋଗାଇଦେବାକୁ ସେ ସରକାରଙ୍କ ପାଖରେ ଦାବି କରିଛନ୍ତି।