ଖୋର୍ଦ୍ଧା ଅଫିସ,୨୫।୩: କରୋନା ଭୂତାଣୁ ସଂକ୍ରମଣ ରୋକିବା ଲାଗି ସରକାର ବିଭିନ୍ନ ସତର୍କତା ଅବଲମ୍ବନ କରୁଛନ୍ତି। କେନ୍ଦ୍ର ସରକାର ମଙ୍ଗଳବାର ମଧ୍ୟରାତ୍ରରୁ ସମ୍ପୂର୍ଣ୍ଣ ଲକ୍ଡାଉନ ଘୋଷଣା କରିବା ପରେ ବୁଧବାର ବଜାରରୁ ଆଳୁ ଓ ପିଆଜ ଉଭାନ୍ ହୋଇଯାଇଥିବା ଦେଖିବାକୁ ମିଳୁଛି। ଅନ୍ୟପଟେ ବଜାରରେ ପନିପରିବା ଦର ଆକାଶଛୁଆଁ ହୋଇଛି। ଏହାକୁ ନେଇ ଗ୍ରାହକ ଅସନ୍ତୋଷ ପ୍ରକାଶ କରିଛନ୍ତି। ପ୍ରଶାସନର ଅବହେଳାରୁ ଦର ଅନିୟନ୍ତ୍ରିତ ରହିଥିବା ଅଭିଯୋଗ ହେଉଛି।
ଅନ୍ୟପଟେ ଲକ୍ଡାଉନକୁ ଦୃଷ୍ଟିରେ ରଖି କେତେକ ବେପାରୀ ଗୋଦାମରେ ଆଳୁ ଓ ପିଆଜ ଷ୍ଟକ୍ ରଖିବା ଆରମ୍ଭ କରିଦେଇଛନ୍ତି। ଏ ନେଇ କୁବେରପୁରୀ ବ୍ୟବସାୟୀ ସଂଘ ସମ୍ପାଦକ ଶକ୍ତି ଶଙ୍କର ମିଶ୍ର କହିଛନ୍ତି, ବର୍ତ୍ତମାନ ଆଳୁ ଓ ପିଆଜ ଯଥେଷ୍ଟ ଆମଦାନୀ ହୋଇଛି। କଳାବଜାର ରୋକିବା ଦାୟିତ୍ୱ ପ୍ରଶାସନର। ପ୍ରଶାସନ ଏ ନେଇ ତୁରନ୍ତ ହସ୍ତକ୍ଷେପ କରିବା ଆବଶ୍ୟକ ବୋଲି ସେ କହିଛନ୍ତି।
ନାକାବନ୍ଦୀ, ପୋଲିସ କଟକଣା ଯୋଗୁ ଗ୍ରାମାଞ୍ଚଳ ବ୍ୟବସାୟୀ ବଜାରକୁ ଆସିପାରୁନାହାନ୍ତି। ଏହାର ପ୍ରଭାବ ସାଧାରଣ ଖାଉଟିଙ୍କ ଉପରେ ପଡୁଛି। ଏ ନେଇ ପ୍ରଶାସନ ଗୁରୁତ୍ୱ ଦେବା ଜରୁରୀ ବୋଲି ମତ ପ୍ରକାଶ ପାଇଛି। ଜିଲାପାଳ ସୀତାଂଶୁ ରାଉତ କୁହନ୍ତି, ଏ ସମ୍ପର୍କରେ ଆଲୋଚନା ଚାଲିଛି। ଏଥିପ୍ରତି ପ୍ରଶାସନ ସଚେତନ ରହିଛି ।