ବରଗଡ଼ ଅଫିସ୍,୧୦।୪: ଲକ୍ ଡାଉନ୍ ପରେ ଦାଦନ ଶ୍ରମିକଙ୍କ ସମସ୍ୟା ବଢ଼ି ଯାଇଛି । ସେମାନଙ୍କ ସାଙ୍ଗରେ ରହିଥିବା ପିଲାଛୁଆଙ୍କ ଅବସ୍ଥା ଆହୁରି ବିପନ୍ନ ହୋଇ ପଡ଼ିଛି । ଛତିଶଗଡ଼ରୁ ବରଗଡ଼କୁ ଦାଦନ ଖଟିବା ପାଇଁ ଆସିଥିବା ଜଣେ ମହିଳା ଶ୍ରମିକ ରଜନୀ ପଟେଲଙ୍କ ଏକବର୍ଷର ପୁଅ ସୌର୍ଯ୍ୟ ଅସୁସ୍ଥ ହୋଇ ପଡ଼ିଥିଲେ। ମା’ କ୍ଷୀର ହେଉ ନ ଥିବା ଯୋଗୁ ରଜନୀ ତାଙ୍କୁ ଚିନି ପାଣି ପିଆଉଥିଲେ। ତେବେ ଶୁକ୍ରବାର ଶିଶୁର ଅବସ୍ଥା ଗୁରୁତର ହୋଇ ପଡ଼ିଥିଲା । ଶ୍ରମିକମାନଙ୍କୁ ରନ୍ଧାଖାଦ୍ୟ ଯୋଗାଇବା ପାଇଁ ଯାଇଥିବାବେଳେ ତାହା ସ୍ବେଚ୍ଛାସେବୀ ବିକାଶ ଅଗ୍ରୱାଲ ଏବଂ ଆଲୋକ ପ୍ରଧାନଙ୍କ ଦୃଷ୍ଟିରେ ପଡ଼ିଥିଲା । ଏହାପରେ ଉଭୟ ସ୍ବେଚ୍ଛାସେବୀ ଅସୁସ୍ଥ ଶିଶୁକୁ ତା ମା’ଙ୍କ ସହିତ ବରଗଡ଼ର ମହିଳା ଡାକ୍ତର ସୁସ୍ମିତା ଦାଶଙ୍କ ପାଖକୁ ଆଣିଥିଲେ । ଡା. ଦାଶ ମାଗଣାରେ ଚିକିତ୍ସା କରିବା ସହିତ ଶିଶୁକୁ ଔଷଧ ଆଦି ପ୍ରଦାନ କରିଥିଲେ । ଏହା ସହିତ ଶିଶୁର ମାଙ୍କୁ ମଧ୍ୟ ସହାୟତା ପ୍ରଦାନ କରିବା ସହ ୩ ଦିନ ପରେ ପୁଣି ସ୍ବାସ୍ଥ୍ୟ ପରୀକ୍ଷା କରିବା ପାଇଁ ତାଙ୍କ ପାଖକୁ ଆଣିବା ପାଇଁ କହିଥିଲେ। ଅସୁସ୍ଥ ଶିଶୁ ପ୍ରତି ସ୍ବେଚ୍ଛାସେବୀଙ୍କ ଏଭଳି ସହଯୋଗ ଏବଂ ଡା. ଦାଶଙ୍କ ବଦାନ୍ୟତାକୁ ବିଭିନ୍ନ ମହଲରେ ପ୍ରଶଂସା କରାଯାଇଛି ।
