ନୂଆଦିଲ୍ଲୀ: କରୋନା ଭାଇରସ୍ ଯୋଗୁ ଏବେ ସବୁ ଦେଶ ଲକ୍ଡାଉନ୍ ହୋଇ ଯାଇଥିବାରୁ ଲୋକମାନେ ଘର ଭିତରେ ରହୁଛନ୍ତି। ସେଥିପାଇଁ ଚାରିଆଡେ ରାସ୍ତାଘାଟ ଶୂନଶାନ୍ ହୋଇଯାଇଛି। ଲୋକେ କେହି ପଦାକୁ ବାହାରୁ ନାହାନ୍ତି। ତେଣୁ ପ୍ରକୃତିର ବିଭିନ୍ନ ରୂପକୁ ଏବେ ଦେଖିବାକୁ ମିଳୁଛି। ବିଭିନ୍ନ ଅଞ୍ଚଳରେ ଏବେ ଲୋକେ ରାସ୍ତାରେ ନଥିବାରୁ ବନ୍ୟଜନ୍ତୁମାନେ ବେଶ୍ ଆନନ୍ଦରେ ରାସ୍ତା ଉପରେ ବିଚରଣ କରୁଛନ୍ତି। ଠିକ୍ ଏଭଳି ଏକ ଦୃଶ୍ୟ ଦେଖିବାକୁ ମିଳିଛି ନଏଡା ସେକ୍ଟର-୧୮ ଅଞ୍ଚଳରେ। ଆଶ୍ଚର୍ଯ୍ୟଜନକଭାବେ ଏଠାରେ ରାଜରାସ୍ତା ଉପରେ ନୀଳଗାଈ ବେଶ୍ ନିର୍ଭୟରେ ବୁଲୁଥିବାର ଦେଖିବାକୁ ମିଳିଛି।
ନୀଳଗାଈ ବୁଲୁଥିବାର ଏମିତି ଏକ ଭିଜୁଆଲକୁ ଜଣେ ସାମ୍ବାଦିକ ସୋସିଆଲ୍ ମିଡିଆରେ ଶେୟାର କରିଛନ୍ତି। ୨୫ ସେକେଣ୍ଡର ଏହି ଭିଡିଓରେ ଦେଖିବାକୁ ମିଳିଛି କି ରାସ୍ତାରେ ଥିବା ଏକ ମଲ୍ ପାଖ ଦେଇ ନୀଳଗାଈ ବେଶ୍ ଆରାମରେ ଧୀରେ ଧୀରେ ଯାଉଛି। ଏଇ ଭିଡିଓଟିକୁ ଲୋକେ ଖୁବ୍ ପ୍ରଶଂସା କରିଛନ୍ତି। କିଛି ଲୋକ ଏହାକୁ ପ୍ରକୃତିର ସୁନ୍ଦରତା କହିଥିବାବେଳେ ଅନ୍ୟ କେତେଜଣ କହିଛନ୍ତି ଲୋକେ ନଥିବାବେଳେ ଜୀବଜନ୍ତୁମାନେ ବୁଲିବା ପାଇଁ ଟିକେ ସ୍ବାଧୀନତା ପାଇଛନ୍ତି।