ଗଞ୍ଜାମ, ୧।୪(ଡି.ଏନ୍.ଏ.): ଗଞ୍ଜାମ-ହୁମା ୧୬ ନଂ. ଜାତୀୟ ରାଜପଥ ପାର୍ଶରେ କେନ୍ଦ୍ର ସରକାରଙ୍କ ୧୪୭୨ ଏକର ଲୁଣ ଚାଷ ଜମି ରହିଛି । ସେଥିମଧ୍ୟରୁ ହୁମା ଓ ବିଞ୍ଚଣାପଲ୍ଲୀ ଲବଣ ଉତ୍ପାଦନ ବିକ୍ରୟ ସମବାୟ ସମିତି ୭୨୯ ଏକର ଜମି ଲିଜ୍ ସୂତ୍ରରେ ଆଣି ସ୍ଥାନୀୟ ଅଞ୍ଚଳରେ ଚାଷୀଙ୍କୁ ଦିଆଯାଇଛି l ଏହି ଚାଷ ଖରା ଦିନେ ହୋଇଥାଏ । ଚଳିତ ମାସ ତଥା ଏହି ସମୟରେ ସମୁଦ୍ର ପାଣି ଜମିକୁ ଆଣି ୪ / ୫ ଦିନ ଶୁଖାଇବା ପରେ ମାଟିକୁ ଗୋଡ଼ରେ ଚକଟି ସେଥିରୁ ଲୁଣ ଉତ୍ପାଦନ କରାଯାଇଥାଏ। ମାତ୍ର କରୋନା ଯୋଗୁ ଏହି ଲୁଣ ଚାଷ ପ୍ରଭାବିତ ହୋଇଛି। ସ୍ଥାନୀୟ ଅଞ୍ଚଳ ତଥା ଗଞ୍ଜାମ ବ୍ଲକର ହୁମା ସମେତ ଲକ୍ଷ୍ମୀପୁର, ମୟୂରପଦା, ନୀଳାଦ୍ରିପୁର, ଖଟୁଆକୁଦା, କଣ୍ଟିଆଗଡ଼, ବିଞ୍ଚଣାପଲି, ପୁଇଁତୋଳା, ସୂର୍ଯ୍ୟ ନାରାୟଣପୁର ଆଦି ଗ୍ରାମର ଲୁଣ ଚାଷୀମାନେ ଜମିରେ ସମୁଦ୍ର ପାଣି ମଡ଼େଇ ସାରିଥିବା ବେଳେ ଲକ୍ଡାଉନ ଯୋଗୁ ଜମିକୁ ଯାଇପାରୁ ନାହାନ୍ତି । ବର୍ତ୍ତମାନ ଜମିରେ ଲୁଣ ହେଇଗଲାଣି । ସେଗୁଡିକୁ କିପରି ଜମିରୁ ବାହାର କରିବେ ସେନେଇ ଏବେ ଚାଷୀ ଚିନ୍ତାରେ ପଡ଼ିଛନ୍ତି ।
ପ୍ରକାଶ ଯେ, ପ୍ରାକୃତିକ ବିପର୍ଯ୍ୟୟ ଓ ଅଦିନିଆ ବର୍ଷା ଯୋଗୁ ଗତ ୪ ବର୍ଷ ହେଲା ଲୁଣ ଚାଷୀ କ୍ଷତି ସହିଛନ୍ତି। ତେଣୁ ସରକାର କିମ୍ବା ଜିଲା ପ୍ରଶାସନ ଏଥିପ୍ରତି ଦୃଷ୍ଟି ଦେବା ପାଇଁ ପୁଇଁତୋଳା ଗ୍ରାମର ଲୁଣ ଚାଷୀ ବୃନ୍ଦାବନ ସାହୁ ଓ ଲକ୍ଷ୍ମୀପୁର ଗ୍ରାମର ଯୁଧିଷ୍ଠିର ରେଡ୍ଡୀ ଦାବି କରିଛନ୍ତି ।