ଝାରସୁଗୁଡ଼ା ଅଫିସ,୨୬।୩: ସମଗ୍ର ଦେଶରେ କରୋନା କଟକଣା ଯୋଗୁ ଯାନବାହନ ସମେତ ହୋଟଲଗୁଡ଼ିକ ବନ୍ଦ ରହିଛି। ଏପରିସ୍ଥିତିରେ ବହୁ ସ୍ଥାନରେ ଲୋକେ ଫସି ରହିଛନ୍ତି। ଦୁଇ ଓଳି ଖାଇବାକୁ ମଧ୍ୟ ପାଉନାହାନ୍ତି। ସେହିପରି ରାସ୍ତା କଡ଼ରେ ଭିକ୍ଷାବୃତ୍ତି କରୁଥିବା ଲୋକେ ମଧ୍ୟ ଖାଇବାକୁ ନ ପାଇ ହଇରାଣ ହରକତ ହେଉଥିବା ଦେଖିବାକୁ ମିଳୁୁଛି। ତେବେ ଏଭଳି ଲୋକଙ୍କ ପାଇଁ ସହାୟତାର ହାତ ବଢ଼ାଇଛନ୍ତି ଝାରସୁଗୁଡ଼ା ସହରର କିଛି ଯୁବ ସମାଜସେବୀ। ସହରର କମଲ ଶାହା, ଆଦର୍ଶ କେଡିଆ ଓ ଅନିଲ ଅଗ୍ରୱାଲା ପ୍ରମୁଖ ଲକ୍ଡାଉନ୍ ହେବା ଦିନଠାରୁ ଏଭଳି ମହତ କାର୍ଯ୍ୟ କରୁଛନ୍ତି। ପ୍ରତିଦିନ ସକାଳେ ଓ ସନ୍ଧ୍ୟାରେ ରାସ୍ତାରେ ଡ୍ୟୁଟି କରୁଥିବା ପୋଲିସ କର୍ମଚାରୀଙ୍କୁ ଚା’ ଓ ଜଳଖିଆ ପ୍ରଦାନ କରୁଛନ୍ତି। ସେହିପରି ଦିନବେଳା ଓ ରାତିରେ ସହରର ବିଭିନ୍ନ ସ୍ଥାନରେ ଅସହାୟ ଭାବେ ଘୂରି ବୁଲୁଥିବା ବ୍ୟକ୍ତି, ବିଭିନ୍ନ ମନ୍ଦିର, ରେଳ ଷ୍ଟେଶନ, ବସଷ୍ଟାଣ୍ଡ ଓ ରାସ୍ତାକଡ଼ରେ ବସି ରହୁଥିବା ଲୋକଙ୍କୁ ରନ୍ଧା ଖାଦ୍ୟ ଯୋଗାଉଛନ୍ତି। ଏଭଳି ଜରୁରିକାଳୀନ ପରିସ୍ଥିତିରେ ବହୁ ସ୍ଥାନରେ ଲୋକେ ବିଭିନ୍ନ ସ୍ଥାନରେ ଫସି ରହିଛନ୍ତି। ଏଣୁ ପରସ୍ପର ମଧ୍ୟରେ ଆଲୋଚନା କରି ଏହି କାର୍ଯ୍ୟ ଆରମ୍ଭ କରାଯାଇଛି। ଯୁବଗୋଷ୍ଠୀଙ୍କ ଏପରି କାର୍ଯ୍ୟକୁ ପ୍ରଶାସନ ସମେତ ବିଭିନ୍ନ ମହଲରୁ ପ୍ରଶଂସା କରାଯାଇଛି।