ଓ୍ବାଶିଂଟନ୍: କରୋନା ଭାଇରସ୍ ସମଗ୍ର ବିଶ୍ୱରେ କାୟା ବିସ୍ତାର କରିଚାଲିଛି। ଏହାକୁ ରୋକିବା ପାଇଁ ଅଧିକାଂଶ ଦେଶରେ ଲକ୍ଡାଉନ୍ ଘୋଷଣା କରାଯାଇଛି। ଏଥିରୁ ମଧ୍ୟ ବାଦ୍ ପଡ଼ିନି ଆମେରିକା। ଏଠାରେ ମଧ୍ୟ ଲକ୍ଡାଉନ୍ ଜାରି ହୋଇଛି। ଏଭଳି ପରିସ୍ଥିତିରେ ଲୋକମାନେ କରୋନା ସଂକ୍ରମଣରୁ ରକ୍ଷା ପାଇବା ପାଇଁ ସତର୍କତା ଅବଲମ୍ବନ କରୁଛନ୍ତି। ଆମେରିକାର ମେରିଲ୍ୟାଣ୍ଡର ଏକ ମଦ ଦୋକାନ ସାମାଜିକ ଦୂରତାର ସମସ୍ତ ନିୟମ ଅନୁସରଣ କରି ଗ୍ରାହକଙ୍କୁ ମଦ ବିତରଣ କରିବାର ଏକ ନୂତନ ଉପାୟ ଅବଲମ୍ବନ କରୁଛି।
ବାସ୍ତବରେ, ଏକ କୁକୁର କ୍ୱାରାଣ୍ଟାଇନ୍ ସମୟରେ ଲୋକମାନଙ୍କୁ ମଦ ପରିବହନ କରୁଛି। ସୋଡା ନାମକ ଏହି କୁକୁରକୁ ମଦ ଦୋକାନରେ ସାହାଯ୍ୟ କରିବା ପାଇଁ ରଖାଯାଇଛି। କୁକୁର ମାଧ୍ୟମରେ ଗ୍ରାହକଙ୍କ ନିକଟରେ ମଦ ସହଜରେ ପହଞ୍ଚିପାରୁଛି। ‘ଷ୍ଟୋନ୍ ଅର୍ବାନ ଓ୍ବାଇନାରୀ’ ପକ୍ଷରୁ ନିଜର ଫେସ୍ବୁକ୍ ପେଜ୍ରେ କୁକୁରର ଫଟୋ ଏବଂ ଭିଡିଓଗୁଡ଼ିକୁ ଶେୟାର କରାଯାଇଛି। ଯାହାକୁ ଲୋକେ ବେଶ୍ ପସନ୍ଦ କରିଛନ୍ତି।
ଲୋକଙ୍କ ନିକଟରେ ମଦ ପହଞ୍ଚାଇବା ଲାଗି ସୋଡା ପିଠିରେ ଏକ କଷ୍ଟମାଇଜ୍ କପଡ଼ା ବନ୍ଧା ଯାଇଛି। ଯେଉଁଥିରେ ଏକ ସମୟରେ ଦୁଇଟି ମଦ ବୋତଲ ରଖାଯାଇପାରିବ। ଫଳରେ ଗ୍ରାହକଙ୍କର ଯେମିତି କୌଣସି ଅସୁବିଧା ନ ହୁଏ ସେଥିପ୍ରତି ବିଶେଷ ଧ୍ୟାନ ଦିଆଯାଇଛି। କରୋନା ସମୟରେ ସାମାଜିକ ଦୂରତା ରକ୍ଷା କରିଥିବା ଲୋକଙ୍କୁ ମଦଦୋକାନ ମାଲିକଙ୍କ ଏହି କୌଶଳ ବେଶ୍ ସୁହାଉଛି।
