ପାପଡ଼ାହାଣ୍ଡି,୮ା୪(ଡି.ଏନ୍.ଏ.) : କରୋନା ଭୂତାଣୁ ଯୋଗୁ ଚାରିଆଡ଼େ ଲକ୍ଡାଉନ୍। ଗାଁଠୁ ସହର ଯାଏ ସମସ୍ତେ ଘରେ। ଗାଁରେ କଟକଣା ଯୋଗୁ ଲୋକେ ବାହାରକୁ ବାହାରି ପାରୁନାହାନ୍ତି। ପ୍ରଶାସନ ପକ୍ଷରୁ ଲୋକଙ୍କୁ ଖାଦ୍ୟ ସୁରକ୍ଷା ଯୋଜନାରେ ଚାଉଳ ବିତରଣ କରାଯାଉଛି। ସେହିପରି କାମ ଧନ୍ଦା ନ ଥିବାରୁ ଦୈନନ୍ଦିନ ସାମଗ୍ରୀ କିଣିବା ଲୋକଙ୍କ ପକ୍ଷେ କଷ୍ଟକର ହୋଇପଡ଼ିଛି। ଏପରି ସ୍ଥିତିରେ ନବରଙ୍ଗପୁର ଜିଲା ପାପଡ଼ାହାଣ୍ଡି ବ୍ଲକ ପ୍ରଶାସନ ଗତ ଦୁଇଦିନ ଧରି ୨୩ଟି ପଞ୍ଚାୟତର ନୂତନ ୪୬୫ ହିତାଧିକାରୀଙ୍କୁ ଘରେ ନେଇ ଭତ୍ତା ପ୍ରଦାନ କରିଛନ୍ତି। ବିଏସ୍ଏସ୍ଓ ନଗେନ୍ଦ୍ର ପଟ୍ଟନାୟକଙ୍କ ତତ୍ତ୍ୱାବଧାନରେ ବ୍ଲକ ପଞ୍ଚାୟତ ଅଧିକାରୀ, କନିଷ୍ଠ ଯନ୍ତ୍ରୀ ଓ ସରପଞ୍ଚଙ୍କ ଜରିଆରେ ଘରେ ଘରେ ଭତ୍ତା ପ୍ରଦାନ କରାଯାଇଛି। ଲକ୍ଡାଉନ୍ ସମୟରେ ଏହି ଭତ୍ତା ସେମାନଙ୍କ ଆବଶ୍ୟକ ପୂରଣରେ ସହାୟକ ହେବ ବୋଲି କିଛି ହିତାଧିକାରୀ କହିଛନ୍ତି ।