ବେଜିଂ,୧୨।୪: କରୋନା ଭାଇରସ ସଂକ୍ରମଣକୁ ନେଇ ଚାଇନାର ଉହାନ ସହରରେ ଲାଗିଥିବା ୭୮ ଦିନିଆ ଲକ୍ଡାଉନ୍ ଏବେ ଶେଷ ହୋଇଛି। ଏହାପରେ ସେଠାରେ ସାଧାରଣ ଜୀବନଯାତ୍ରା ସ୍ବାଭାବିକ ହେବା ସହ ସହର ବଜାର ସବୁ ଖୋଲାଥିବା ଦେଖିବାକୁ ମିଳିଛି। ଚାଇନା ସରକାରଙ୍କ ସୂଚନା ଅନୁଯାୟୀ, କରୋନା ଭାଇରସ ସଂକ୍ରମଣରେ ଉହାନ ସହରରେ ୨,୬୦୦ଲୋକଙ୍କ ମୃତ୍ୟୁ ହୋଇଛି। ଏବେ ଲକ୍ଡାଉନ ଖୋଲିଥିବାରୁ ପ୍ରିୟଜନଙ୍କ ଅନ୍ତିମ ସଂସ୍କାର ପାଇଁ ସେଠାରେ ଲମ୍ବା ଲାଇନ ଲାଗିଥିବା ଜଣାପଡିଛି। ସିଏନ୍ଏନ୍ର ଏକ ରିପୋର୍ଟ ଅନୁଯାୟୀ, ଉହାନରେ ୨୫ ଜାନୁୟାରୀରୁ ଅନ୍ତିମ ସଂସ୍କାର ଉପରେ ପ୍ରତିବନ୍ଧକ ଲଗାଇ ଦିଆଯାଇଥିଲା। ଏବେ ଲକ୍ଡାଉନ୍ ଖୋଲିବାରୁ ପୁଣିଥରେ ଅନ୍ତିମ ସଂସ୍କାର ପ୍ରକ୍ରିୟା ଆରମ୍ଭ କରାଯାଇଛି। ଏହି ଲାଇନରେ ଥିବା ଜଣେ ବ୍ୟକ୍ତି କହିଛନ୍ତି କରୋନା ସଂକ୍ରମଣ ସମୟରେ ତାଙ୍କର ୭୬ ବର୍ଷ ପିତାଙ୍କର ଗୋଡ ଭାଙ୍ଗିଯିବାରୁ ସେ ତାଙ୍କୁ ହସ୍ପିଟାଲରେ ଭର୍ତ୍ତି କରିଥିଲେ। ହେଲେ ସେଠାରେ ସେ କରୋନାରେ ସଂକ୍ରମିତ ହେବାରୁ ତାଙ୍କର ମୃତ୍ୟୁ ହୋଇଥିଲା। ହେଲେ ଲକ୍ଡାଉନ ଥିବାରୁ ସେ ତାଙ୍କ ପିତାଙ୍କର ଅନ୍ତିମ ସଂସ୍କାର କରିପାରି ନ ଥିଲେ। ଏବେ ସେ ପ୍ରାୟ ୫ଶହ କିଲୋମିଟର ଅତିକ୍ରମ କରି ନିଜ ପିତାଙ୍କ ଅନ୍ତିମ ସଂସ୍କାର କରିବାକୁ ଆସିଥିବା କହିଛନ୍ତି। ସୂଚନାଯୋଗ୍ୟ, ଉହାନରେ ଯେତେବେଳେ କରୋନା ସଂକ୍ରମିତଙ୍କୁ ହସ୍ପିଟାଲରେ ଭର୍ତ୍ତି କରାଯାଉଥିଲା ସେତେବେଳେ ତାଙ୍କର ପରିବାର ସହ ଆଉ କୌଣସି ସମ୍ପର୍କ ରହୁ ନ ଥିଲା। ଏମିତିକି ମୃତ୍ୟୁ ପରେ ବି ପରିବାର ଲୋକେ ସେମାନଙ୍କୁ ଶେଷ ଦର୍ଶନ କରିପାରୁ ନ ଥିଲେ। ଏବେ ଏମିତି ସଂକ୍ରମିତଙ୍କୁ ସ୍ବତନ୍ତ୍ର ଭାବେ ସଂସ୍କାର କରାଯିବାର ବ୍ୟବସ୍ଥା କରାଯାଇଥିବା ଜଣାପଡିଛି।