କର୍ଲାମୁଣ୍ଡା, ୧୩ା୪(ଡି.ଏନ.ଏ.) ଲକ୍ଡାଉନ ଯୋଗୁଁ କଳାହାଣ୍ଡି ଜିଲା କର୍ଲାମୁଣ୍ଡା ବ୍ଲକ ଅଞ୍ଚଳର ପରିବା ଓ ତରଭୁଜ ଚାଷୀ ସଙ୍କଟରେ ପଡିଛନ୍ତି। ଚଳିତ ବର୍ଷ ଅନୁକୂଳ ପାଗ ଯୋଗୁ ଭଲ ଫସଲ ହୋଇଥିଲେ ମଧ୍ୟ ଲକ୍ଡାଉନ ଜନିତ କଟକଣା ଯୋଗୁ ଏ ସବୁ ଏବେ କ୍ଷେତରେ ସଢୁଛି। ଉତ୍ପାଦିତ ସାମଗ୍ରୀ ବିକ୍ରି କରି ନ ପାରି ଚାଷୀ ଆର୍ଥିକ ଦୁର୍ଗତି ମଧ୍ୟକୁ ଚାଲିଯାଇଛି। ମାତ୍ର ତିନି ଚାରି ମାସରେ ତରଭୁଜ ଚାଷରୁ ବେଶ ଅର୍ଥ ରୋଜଗାରର ଆଶାଥିଲା। ହେଲେ କରୋନା ସବୁ କିଛି ବିଗାଡି ଦେଲା ବୋଲି ବ୍ଲକ ଅଧୀନ ବିଜାପାଟି ଗାଁର ଚାଷୀ କୁମୁଦ ଚୌଧୁରୀ କହିଛନ୍ତି । ସେହିପରି ତରଭୁଜ ଚାଷ କରି ବିକ୍ରି କରିପାରୁ ନ ଥିବା କହିଛନ୍ତି କୁସୁର୍ଲାର ଚାଷୀ ମାନ ରଣା ଓ କେରଣାପଲାର କୁଞ୍ଜ ରଣା। ପରମାନନ୍ଦପୁରର ପୂର୍ଣ୍ଣ ମାଝୀ ତିନି ଏକର ଜମିରେ ପରିବା ଚାଷ କରିଛନ୍ତି। ହେଲେ ଲକଡାଉନ ସମୟ କଟକଣା ଯୋଗୁଁ ତାହା ବିକ୍ରି ହୋଇ ପାରୁ ନ ଥିବା ସେ କହିଛନ୍ତି। ସୂଚନାଯୋଗ୍ୟ ଯେ, ଏହି ବ୍ଲକର ସବୁଠୁ ବଡ଼ ସାପ୍ତାହିକ ହାଟ ରିସିଡ଼ା ଓ କୁସୁର୍ଲାଠାରେ ହୋଇଥାଏ। ଏହି ଦୁଇଟି ହାଟ ବନ୍ଦ ହେବା ଦ୍ୱାରା ଚାଷୀମାନେ ପରିବାଗୁଡିକ ବିକ୍ରି କରିବା ଅସମ୍ଭବ ହୋଇପଡିଛି। ଏ ନେଇ କର୍ଲାମୁଣ୍ଡା ତହସିଲଦାର ବାସନ୍ତୀ ସେଠଙ୍କୁ ପଚାରିବାରୁ ଚାଷୀମାନେ ସାମାଜିକ ଦୂରତା ରକ୍ଷା କରି ସାମଗ୍ରୀ ବିକ୍ରୟ କରିବାରେ କିଛି ବାଧା ନାହିଁ ବୋଲି କହିଛନ୍ତି।