ଦଶମନ୍ତପୁର,୧୬ା୪(ଡି.ଏନ୍.ଏ.): କୋରାପୁଟ ଜିଲା ଦଶମନ୍ତପୁର ବ୍ଲକ ଚିକାମ୍ବ ପଞ୍ଚାୟତ ଉପର ଗଦଳା ଗାଁରେ ଲକ୍ଡାଉନ ବେଳେ ମଦ କାରବାର ବନ୍ଦ ନ ହେବା ପ୍ରତିବାଦରେ ତାତିଛନ୍ତି ସ୍ବୟଂ ସହାୟକ ଗୋଷ୍ଠୀର ମହିଳା। ଗୁରୁବାର ସେମାନେ ଗାଁରେ ମଦଭାଟି ଭଙ୍ଗାରୁଜା କରିବା ସହ ପୋଚ ଢାଳିଛନ୍ତି।
ଉଲ୍ଲେଖଯୋଗ୍ୟ, ଉପରଗଦଳା ଗାଁରେ ବ୍ୟାପକ ମଦ କାରବାର ହେଉଥିବା ବାରମ୍ବାର ଅଭିଯୋଗ ହୋଇଆସୁଛି। ଏହା ପ୍ରତିବାଦରେ ଗାଁର ୪ଟି ସ୍ବୟଂ ସହାୟକ ଗୋଷ୍ଠୀ ୩ ଦିନ ତଳେ ଥାନାରେ ଏତଲା ଦେଇଥିଲେ। ଅବକାରୀ ବିଭାଗ ଓ ସ୍ଥାନୀୟ ଥାନା ଏସ୍ଆଇ ବି.କେ. ପଣ୍ଡା ଗାଁରେ ଚଢ଼ାଉ ମଧ୍ୟ କରିଥିଲେ। କିନ୍ତୁ ଗାଁର ଜଣେ ମଦ ବ୍ୟବସାୟୀ ଏହାକୁ ବେଖାତିର କରି ପୁଣି ୪ ଡ୍ରମ ମହୁଲି ଫାସ ପକାଇଥିଲେ। ଖବର ପାଇ ସ୍ବୟଂ ସହାୟକ ଗୋଷ୍ଠୀର ମହିଳାମାନେ ତାଙ୍କ ଘରେ ପହଞ୍ଚତ୍ ମହୁଲ ପୋଚକୁ ଗାଁ ଦାଣ୍ତରେ ଢାଳିଥିଲେ। ସବୁ ମଦ ବେପାରୀଙ୍କ ଘରେ ଚଢ଼ାଉ କରି ସେମାନେ ମଦ ସରଞ୍ଜାମ, ସାମଗ୍ରୀ ନଷ୍ଟ କରିବା ସହ ଗାଁରେ ଥିବା ୪ଟି ଦେଶୀ ମଦଭାଟିକୁ ଭଙ୍ଗାରୁଜା କରିଛନ୍ତି। ଗିର୍ଲିଗୁମ୍ମା ପଞ୍ଚାୟତ ଫୁଣ୍ଡାଗୁଡ଼ା ଗ୍ରାମର ଜଣେ ମଦ ବ୍ୟବସାୟୀ ମଧ୍ୟ ଖୋଲାଖୋଲି ବାଇକରେ ଦେଶୀମଦ ଧରି ବିକୁଥିବା ମହିଳାମାନେ କହିଛନ୍ତି।