ଭୋପାଳ,୨୫।୫: ମଧ୍ୟପ୍ରଦେଶରେ ଅଧିକାଂଶ ସ୍ଥାନରେ ବିବାହ ପାଇଁ ଘୋଡ଼ାର ବ୍ୟବହାର କରାଯାଇଥାଏ। ଆଉ ଘୋଡ଼ାକୁ ଭଡାରେ ଲଗାଇ ଦି ପଇସା ରୋଜଗାର କରୁଥିବା ଘୋଡ଼ା ମାଲିକମାନେ ଏବେ ବହୁ କ୍ଷତି ସହିଥିବା କହିଛନ୍ତି। କରୋନା ଭାଇରସ ସଂକ୍ରମଣ ଯୋଗୁ ଦେଶରେ ଲକ୍ଡାଉନ୍ ପିରିୟଡ ବଢିବାରେ ଲାଗିଛି। ଅନ୍ୟପଟେ ବିବାହ କାର୍ଯ୍ୟ ଏକ ପ୍ରକାର ବନ୍ଦ ରହିଥିବା ବେଳେ ବିନା ପ୍ରସେଶନରେ ବିବାହ କରିବାକୁ କେବଳ ଅନୁମତି ମିଳିଛି। ଏପରି ସ୍ଥଳେ ଯେଉଁ କେତୋଟି ହାତଗଣତି ବିବାହ କରାଯାଉଛି ସେଥିରେ ଲୋକେ ଘୋଡ଼ାକୁ ଆଉ ଖୋଜୁ ନାହାଁନ୍ତି। ତେଣୁ ପୂର୍ବରୁ ବିବାହ କାର୍ଯ୍ୟରେ ଘୋଡ଼ାକୁ ଭଡାରେ ଲଗାଉଥିବା ମାଲିକମାନେ ଏକ ପ୍ରକାର ହାତ ବାନ୍ଧି ବସିଛନ୍ତି। ଘୋଡ଼ା ମାଲିକ କୁହନ୍ତି ଆମେ ବର୍ଷ ସାରା ବିବାହ ଋତୁକୁ ଅନାଇ ବସିଥାଉ। ହେଲେ ଏବର୍ଷ ଲକ୍ଡାଉନ ଯୋଗୁ ବିବାହ ନ ହୋଇ ଥିବାରୁ ରୋଜଗାର ମଧ୍ୟ ନାହିଁ।