କୋକସରା, ୧୮ା୪(ଡି.ଏନ.ଏ.) – ପ୍ରଥମେ କରାବର୍ଷା ଓ ତାର କିଛିଦିନ ପରେ ଲକ୍ଡାଉନ କଳାହାଣ୍ଡି ଜିଲା କୋକସରା ବ୍ଲକର ପନିପରିବା ଓ ତରଭୁଜ ଚାଷୀଙ୍କ ପାଇଁ କାଳ ସାବ୍ୟସ୍ତ ହୋଇଛି । ଏଥିଯୋଗୁ ଶତାଧିକ ଚାଷୀ ବିଶେଷ ଭାବେ କ୍ଷତିଗ୍ରସ୍ତ ହୋଇଛନ୍ତି । ପନିପରିବା ସହିତ ତରଭୁଜ ଚାଷ କରି ଲାଭବାନ ହେବାକୁ ଚାଷୀମାନେ ଆଶା ବାନ୍ଧିଥିଲେ । ଏଥିପାଇଁ ଧାରକରଜ କରି ଚାଷ କାମ ଆରମ୍ଭ କରିଥିଲେ । ହେଲେ ଭାଗ୍ୟ ସାଥ୍ ଦେଲାନି । ଚାଷ ଆରମ୍ଭର କିଛିଦିନ ପରେ କରାବର୍ଷା ମାଡରେ ଚାଷ ନଷ୍ଟ ହୋଇଥିଲା । ତଥାପି ଚାଷୀମାନେ ମନକୁ ବୁଝାଇ ପୁଣିଥରେ ଉଜୁଡି ଯାଉଥିବା ଚାଷକୁ ସଜାଡି ଥିଲେ । ଜମିରେ ଦିନରାତି ଏକା କରି ପନିପରିବା ସହିତ ତରଭୁଜ ଫଳାଇବାକୁ ଚେଷ୍ଟା କରିଥିଲେ । ସେମାନଙ୍କ ଝାଳବୁଝା ପରିଶ୍ରମ ଯୋଗୁ ଫସଲ ବି ଭଲ ହୋଇଥିଲା । ହେଲେ କରୋନା ଆତଙ୍କ ଏଡ଼ାଇବାକୁ ସରକାର ପକ୍ଷରୁ ଲକ୍ଡାଉନ ଘୋଷଣା ହେବା ପରେ ଚାଷୀମାନଙ୍କ ଚିନ୍ତା ବଢ଼ିଛି । ବ୍ୟବସାୟୀମାନେ ପନିପରିବା ନେବାକୁ ଆସୁନାହାନ୍ତି । ଫଳରେ ବିକ୍ରି ନ ହୋଇ ପନିପରିବା ଜମିରେ ସେମିତି ପଡି ରହିଛି । ତରଭୁଜର ଅବସ୍ଥା ବି ସେମିତି । ପ୍ରତିଦିନ ପନିପରିବା ସହିତ ତରଭୁଜ ପଚି ନଷ୍ଟ ହେଉଛି ।
କୋକସରା ବ୍ଲକ ଏକ ଅଣ ଜଳସେଚିତ ଅଞ୍ଚଳ । ବ୍ଲକର ୪ ପଞ୍ଚାୟତର କେତେକ ଗ୍ରାମ ଡାଲୁଆ । ଏହାବ୍ୟତୀତ ବ୍ଲକର ଅନ୍ୟ ପଞ୍ଚାୟତରେ ଖରିଫ ଋତୁ ଧାନ ଅମଳ ସରିବା ପରେ ମୁଖ୍ୟତଃ ଚାଷୀମାନେ ଡାଲି ଜାତୀୟ ଫସଲ କରିଥାନ୍ତି । ମୁଟ୍ରାନଦୀକୂଳିଆ ଅଞ୍ଚଳଥିବା ବଡପୋଡାଗୁଡା, ବାବେକୋରହା, ଭାଳିଆଯୋର, କାଉଡୋଲା ସୁନାମାଳ, ଗମ୍ଭାରିଗୁଡା, ମଜୁରସାଇ, ଫୁଫଗାଁ, ଡଙ୍ଗରିଗୁଡା ଓ କମଳନଦୀ କୂଳ ଆଦି ଅଞ୍ଚଳର ଚାଷୀମାନେ କୋବି, ଟମାଟୋ,ବାଇଗଣ, ଲଙ୍କା ମାଖନ, ଭେଣ୍ଡି, କଲରା, ମକା, ପିଆଜ , ତରଭୁଜ ଆଦି ଚାଷକରି ଜୀବାକା ନିର୍ବାହ କରିଥାନ୍ତି । ଚଳିତ ବର୍ଷ ମଧ୍ୟ ଶତାଧିକ ଚାଷୀଙ୍କ ପନିପରିବା ଚାଷ ଭଲ ହୋଇଥିଲା । ପ୍ରଥମେ କରାମାଡ ରେ ଚାଷ ନଷ୍ଟହୋଇ ଥିବାବେଳେ ଏବେ ଲକ୍ ଡାଉନ ଯୋଗୁ ବିକ୍ରି ବନ୍ଦ ହୋଇଯାଇଛି । ଫଳରେ ଚାଷୀମାନେ ମୁଣ୍ଡରେ ହାତ ଦେଇ ବସିଛନ୍ତି । ଚାଷୀମାନେ କିପରି ଋଣ ପରିଶୋଧ କରିବେ ସେନେଇ ଚିନ୍ତାରେ ପଡିଛନ୍ତି । ଡଙ୍ଗରିଗୁଡାର ସହଦେବ ମାଝି କୁହନ୍ତି, ମୁଁ ୫ ଏକର ଜମିରେ ତରଭୁଜ ଚାଷ କରିଥିଲି । ଚଳିତ ବର୍ଷ ଲକ୍ଷାଧିକ ଟଙ୍କା ଲାଭ ହେବ ବୋଲି ଆଶା କରିଥିଲି । ସେଥିପାଇଁ ଦିନରାତି ତରଭୁଜ ବାଡିରେ ଶୋଇ ଭାଲୁ, ହେଟାବାଘ ଆଦି ବନ୍ୟଜନ୍ତୁଙ୍କ କବଳରୁ ତରଭୁଜ ଚାଷକୁ ବଞ୍ଚାଇ ରଖିଥିଲି । ହେଲେ ଲକ୍ଡାଉନ ଯୋଗୁ ମୋ ପରି ଅନେକ ଚାଷୀଙ୍କ ଆଶା ଭାଙ୍ଗି ଯାଇଛି । ଏବେ ମୁଖ୍ୟ ବଜାର ସହ କୋକସରା, ଆମପାଣି, ଲଡୁଗାଁ ଆଦି ସାପ୍ତାହିକ ବଜାର ୩ ସପ୍ତାହ ହେଲା ବନ୍ଦ ରହିଛି । ଗାଡ଼ି ମୋଟର ବନ୍ଦ ଯୋଗୁ ଅନ୍ୟ ଜିଲାର ବ୍ୟବସାୟୀମାନେ ଆସି ପାରୁନାହାନ୍ତି । ଫଳରେ ଜମିରେ ତରଭୁଜ ପଚି ନଷ୍ଟ ହେଉଛି । ସେହିପରି ଡଙ୍ଗରିଗୁଡ ଚାଷୀ ଉମାକାନ୍ତ କେତକୀଙ୍କ ତରଭୁଜ ଓ ପନିପରିବା ପଚି ନଷ୍ଟ ହେଉଥିବା କହିଛନ୍ତି । ସୁନାମାଳର ଚାଷୀ ଶୁକ୍ରୁ ଭାଟି, ଜୟସେନ ଭାଟି, ଭଳ ରୋତି , ବୈରାଗୀ ସାହୁ, ସୀମା ନାଏକ, ବିଦୁ ହଂସ ଆଦି ଚାଷୀଙ୍କ ପିଆଜ, ମକା , ପନିପରିବା ଆଦି ଲକ୍ ଡାଉନ ଯୋଗୁ ବିକ୍ରି ନ ହୋଇ ପଡି ରହିଥିବା ଅଭିଯୋଗ କରିଛନ୍ତି । ଏପରି ଚାଷୀଙ୍କୁ ସରକାର କ୍ଷତିପୂରଣ ଦେବାକୁ ଚାଷୀମାନେ ଦାବି କରିଛନ୍ତି । ଏନେଇ କୋକସରା ବ୍ଲକ ସହକାରୀ ଉଦ୍ୟାନ ଅଧିକାରୀ ତପନ କୁମାର ପାତ୍ର କୁହନ୍ତି, ପନିପରିବା ଚାଷ ପାଇଁ ବିଭାଗ ପକ୍ଷରୁ କୌଣସି କ୍ଷତିପୂରଣ ଦେବାର ବ୍ୟବସ୍ଥା ନାହିଁ । ଏ ନେଇ ଚାଷୀମାନେ ତହସିଲ କାର୍ଯ୍ୟାଳୟରେ ଆବେଦନ କରି ପାରିବେ ବୋଲି ସେ କହିଛନ୍ତି ।