ଗଣିଆ,୮ା୯ (ଡି.ଏନ.ଏ.): ଗତ ୩ଦିନ ଧରି ଲଘୁଚାପଜନିତ ଲଗାଣ ବର୍ଷା ଯୋଗୁ ମହାନଦୀର ଜଳସ୍ତର ବୃଦ୍ଧି ପାଇବାରେ ଲାଗିଛି । ହୀରାକୁଦ ନଦୀବନ୍ଧରୁ ବନ୍ୟାଜଳ ପ୍ରବାହିତ ହେଉଥିବା ବେଳେ ତଳିଆ ଅଞ୍ଚଳରେ ବର୍ଷା ଲାଗିରହିଥିବାରୁ ଜଳସ୍ତର ଧୀରେ ଧୀରେ ବଢିବାରେ ଲାଗିଛି। ହୀରାକୁଦ ନଦୀବନ୍ଧ ବୁର୍ଲା ଡିଭିଜନର ଗଣିଆ ବ୍ଲକ ବଡମୂଳଠାରେ ଥିବା ଗେଜ୍ ସାଇଟ୍ରୁ ମିଳିଥିବା ସୂଚନା ଅନୁଯାୟୀ, ଶନିବାର ମଧ୍ୟାହ୍ନ ୧୨ଟା ସମୟରେ ମହାନଦୀରେ ୩୧ଫୁଟ ୩ଇଞ୍ଚ ଜଳ ପ୍ରବାହିତ ହେଉଥିଲା। ଏହାର ୩ଘଣ୍ଟା ପରେ ଅପରାହ୍ନ ୩ଟା ସମୟରେ ଏହା ୩୨ଫୁଟ ୬ଇଞ୍ଚକୁ ବୃଦ୍ଧି ପାଇଥିଲା। ଏଠାରେ ବିପଦସଙ୍କେତ ୩୫ଫୁଟ ରହିଥିବା ଜଣାପଡିଛି। ତଳିଆ ଅଞ୍ଚଳରେ ବର୍ଷା ଜାରି ରହିଲେ ଗଣିଆ ବ୍ଲକରେ ବନ୍ୟା ପରିସ୍ଥିତି ସୃଷ୍ଟି ହେବା ଆଶଙ୍କା ରହିଛି ା ଏହା ଦ୍ୱାରା ଛାମୁଣ୍ଡିଆ, ରାସଙ୍ଗ, ବେଲପଡା ଓ କିସୋରପ୍ରସାଦ ପଞ୍ଚାୟତର ବହୁ ଗ୍ରାମରେ ବନ୍ୟା ପରିସ୍ଥିତି ଦେଖାଦେବା ଆଶଙ୍କା ରହିଛି ବୋଲି ନଦୀକୂଳିଆ ଗ୍ରାମବାସୀ ଆଲୋଚନା କରୁଛନ୍ତି। ଶନିବାର ଅପରାହ୍ନରେ ଗଣିଆ ବ୍ଲକର ରାସଙ୍ଗ, ଛାମୁଣ୍ଡିଆ ପତୁରିଆ ଆଦି ଗ୍ରାମର ଗହୀର ବିଲରେ ବନ୍ୟାଜଳ ପ୍ରବେଶ କରୁଥିବା ଦେଖିବାକୁ ମିଳିଛି ା ବନ୍ୟା ହେଲେ ଗଣିଆ-ବଡମୂଳ ରାସ୍ତାର ରାସଙ୍ଗଠାରୁ କେନ୍ଦୁପଲ୍ଲୀ, ମଣିଭଦ୍ରାଠାରୁ ବୃତଙ୍ଗ, ମାଳିସାହି ଠାରୁ ଛାମୁଣ୍ଡିଆ ଓ ଛାମୁଣ୍ଡିଆଠାରୁ ବଡମୂଳ ପର୍ଯ୍ୟନ୍ତ ରାସ୍ତା ଉପରେ ପାଣି ପ୍ରବାହିତ ହୋଇଥାଏ ା ଫଳରେ ଏହି ରାସ୍ତା ଦେଇ ଯାତାୟାତ ବାଧାପ୍ରାପ୍ତ ହୋଇଥାଏ ା ତେବେ ସମ୍ଭାବ୍ୟ ବନ୍ୟା ମୁକାବିଲା ପାଇଁ ବ୍ଲକ ପ୍ରଶାସନ ସଜାଗ ଥିବା ଜଣାପଡିଛି ା ଅପରପକ୍ଷେ ବନ୍ୟାହେଲେ ବ୍ଲକର ବଡମୂଳ, ଛାମୁଣ୍ଡିଆ ଅଞ୍ଚଳ ଜଳବନ୍ଦୀ ହୋଇ ରହୁଥିବା ବେଳେ ଏଠାରେ କୌଣସି ଓଡ୍ରାଫ ଟିମ୍କୁ ନିୟୋଜିତ କରାଯାଉନାହିଁ ା ହେଲେ ଗଣିଆଠାରେ ୨ଟି ଓଡ୍ରାଫ୍ ଟିମ୍ ରହୁଥିବା ଦେଖିବାକୁ ମିଳିଛି ା ଏଥିପ୍ରତି ବ୍ଲକ ପ୍ରଶାସନ ଦୃଷ୍ଟି ଦେବାକୁ ସ୍ଥାନୀୟ ଅଞ୍ଚଳବାସୀଙ୍କ ତରଫରୁ ଦାବି ହେଉଛି।