ମାଲକାନଗିରି,୨୩ା୬ (ସ୍ବ.ପ୍ର.)- ମାଲକାନଗିରି ଜିଲାରେ ୨ ଦିନ ଧରି ଲଗାଣ ବର୍ଷା ଜାରି ରହିଛି। ଫଳରେ ଜିଲାର ମାଥିଲି ବ୍ଲକର ୨ଟି ପଞ୍ଚାୟତ ବାହ୍ୟଜଗତରୁ ବିଚ୍ଛିନ୍ନ ହୋଇଯାଇଥିବା ଜଣାପଡିଛି। ବର୍ଷା ଯୋଗୁ ମହୁପଦର ନିକଟରେ ଥିବା ଡାଇଭର୍ସନ ରୋଡ ଧୋଇ ହୋଇଯିବାରୁ ମହୁପଦର ଓ କମାରପାଲି ପଞ୍ଚାୟତ ବାହ୍ୟଜଗତରୁ ବିଛିନ୍ନ ହୋଇଛି। ଲୋକେ ନାହିଁ ନ ଥିବା ଅସୁବିଧାର ସମ୍ମୁଖୀନ ହେଉଛନ୍ତି। ଛତିଶଗଡ଼ ଲୋକେ ମଧ୍ୟ ଓଡ଼ିଶାର ଏହି ଅଞ୍ଚଳକୁ ଯାତାୟାତ କରିପାରୁନାହାନ୍ତି। ପୋଟେରୁ, କାଙ୍ଗୁରୁକୋଣ୍ଡା, ପାଙ୍ଗାମ, ଏମଭି-୧୧, କୋରକୋଣ୍ଡା, ଏମଭି-୩୭, ସପ୍ତଧାରା, ସିଲେରୁ, ସତୀଗୁଡା ଓ ଚିତ୍ରକୋଣ୍ଡା ଜଳଭଣ୍ଡାରରେ ଜଳସ୍ତର ବୃଦ୍ଧିପାଇଛି। ଜିଲାରେ ଶନିବାର ବର୍ଷା ପରିମାଣ ହାରାହାରି ୧୬.୫୭ମି.ମି. ଥିବା ରେକର୍ଡ କରାଯାଇଛି। ମାଥିଲି ବ୍ଲକରେ ୨୧.୦୦ମିମି, ମାଲକାନଗିରି ୦୯ ମିମି, ଖଇରପୁଟ ୨୫ ମିମି, କୁଡୁମୁଲୁଗୁମ୍ମା ୨୨ମିମି, କୋରାକୋଣ୍ଡା ୦୪ ମିମି, କାଲିମେଳା ୦୨ ମିମି ଓ ପଡିଆ ବ୍ଲକରେ ସର୍ବାଧିକ ୩୩ ମିମି ବର୍ଷା ରେକର୍ଡ କରାଯାଇଛି। ତେବେ ରବିବାର ବର୍ଷା କମିବା ପରେ ସ୍ଥତିରେ ଟିକେ ସୁଧାର ଆସିଛି। ଅନ୍ୟପକ୍ଷରେ ମୌସୁମୀ ଆରମ୍ଭରୁ ସାମାନ୍ୟ ବର୍ଷାରେ ଯଦି ଜିଲାରେ ଏପରି ପରିସ୍ଥିତି ସୃଷ୍ଟି ହୁଏ ଆଗାମୀ ଦିନରେ କ୍ରମାଗତ ବର୍ଷା ହେଲେ କି ପ୍ରକାର ପରିସ୍ଥିତି ସୃଷ୍ଟି ହେବ ତାହା ଚିନ୍ତାଜନକ ହେଲାଣି। ଜିଲା ପ୍ରଶାସନ ମୁକାବିଲା ପାଇଁ ସଜାଗ ରହିବା ଆବଶ୍ୟକ ବୋଲି ସାଧାରଣରେ ମତ ପ୍ରକାଶ ପାଉଛି।