ଆରଡ଼ି,୧୭।୯(ଡି.ଏନ.ଏ.): ଲଘୁଚାପ ଜନିତ ଲଗାଣ ବର୍ଷା ଯୋଗୁ ବୈତରଣୀ ନଦୀରେ ବନ୍ୟା ପରିସ୍ଥିତି ସୃଷ୍ଟି ହୋଇଛି। ଫଳରେ ଭଦ୍ରକ ଜିଲା ଚାନ୍ଦବାଲି ବ୍ଲକ ଅଧୀନ ଓଳଗ, ସୁନ୍ଦରପୁର, ଆରଡ଼ି, ନାନ୍ଦପୁର ଆଦି ପଞ୍ଚାୟତର ୨୫ ଗାଁ ପ୍ରଭାବିତ ହୋଇଛି। ଓଳଗ ପଞ୍ଚାୟତର ବୋଡ଼କ, ଆରଡ଼ି ପଞ୍ଚାୟତର ମୁଆଁ ଓ ସନ୍ତରା ଗାଁ ବାହ୍ୟଜଗତରୁ ବିଚ୍ଛିନ୍ନ ହୋଇଯାଇଛି। ଏସବୁ ପଞ୍ଚାୟତର ଶତାଧିକ ହେକ୍ଟର ଚାଷଜମି ପାଣିରେ ବୁଡ଼ିଛି। ଆରଡ଼ି-ଯାଜପୁର ରାସ୍ତାର ବୋଡ଼କ ନିକଟରେ ରାସ୍ତା ଉପରେ ୩ଫୁଟ୍ ଓ ଆରଡ଼ି-ଚାନ୍ଦବାଲି ରାସ୍ତାର ମୁଆଁ ନିକଟରେ ୪ ଫୁଟ୍ ଉଚ୍ଚରେ ବନ୍ୟାଜଳ ପ୍ରବାହିତ ହେଉଛି। ଫଳରେ ଯାତାୟାତ ବାଧାପ୍ରାପ୍ତ ହୋଇଛି। ସୁନ୍ଦରପୁର ପଞ୍ଚାୟତର ଦୋହରାପାଟଣା ମଳିକସାହି ନିକଟରେ ନଦୀବନ୍ଧରେ ଘଳିଆ ପଡ଼ିବାରୁ ଗାଁ ଭିତରେ ବନ୍ୟାଜଳ ପଶିଛି। ଚାନ୍ଦବାଲି ବିଡିଓ ଜ୍ୟୋତି ବିକାଶ ଦାଶ ବନ୍ୟା ପ୍ରଭାବିତ ବୋଡ଼କ, ମୁଆଁ, ସନ୍ତରା ଆଦି ଗାଁ ବୁଲି ଦେଖିଛନ୍ତି। ପାଣିଘେରରେ ଥିବା ଏସବୁ ଗାଁର ପ୍ରାୟ ୫୦ ପରିବାରକୁ ଶୁଖିଲା ଖାଦ୍ୟ ଯୋଗାଇଦେବାର ବ୍ୟବସ୍ଥା କରିଛନ୍ତି। ଆଖଣ୍ଡଳମଣି-ଭଦ୍ରକ ରାସ୍ତାର ଅସୁରାଳି, କେଠାର ନିକଟରେ ୧ ଫୁଟ୍ର ପାଣି ସୁଅ ଚାଲିଛି।