ଗଣ୍ଡତୁରୁମ, ୬।୯ (ଡି.ଏନ୍.ଏ.): ଗଲା ମଙ୍ଗଲବାରନୁ ଲାଗି ରହିଥିବାର ଲଘୁଚାପ ବରଷାରେ ବରଗଡ଼ ଜିଲା ଭେଡ଼େନ ବ୍ଲକରେ ଲୁକ୍କର ବହୁତ୍ କ୍ଷୟକ୍ଷତି ହେଇଛେ। ବରଷାରେ ଅନେକ ଗରିବ୍ ଖଟିଖିଆ ଲୁକ୍କର ମାଏଟ୍ କୁରିଆ, ଗୁହାଲମାନ୍ ଭାଂଗି ଯାଇଛେ। ଏନ୍ତାଥି ସେମାନକର ଧାନ୍, ଚାଉଲ ଜିନିଷପାତି ବରଷା ପାଏନ୍ରେ ଭିଜି ଯାଇଛେ। ଇଆଡ଼େ ଅନେକ ଲୁକ୍କର ଗୁହାଲ ଭାଂଗିଯିବାର ଲାଗି ଗାଈବଲଦ, ଛେଲମେଢ଼ି କେନ୍ଠାନେ ରଖବେ ସେ ଚିନ୍ତାରେ ସେମାନେ ଘାରି ହେଉଛନ୍। ଅନେକ ପରିବାରର ଘର ଭାଂଗିଯିବାର ଲାଗି ସେମାନେ ନିଜର ଲାଗେଲେସର ଘରମାନକେ ମୁଡ଼ ଗୁଁଜିଛନ୍। ସେନ୍ତା ଆରକେତେ ଗଁାରେ ଲୁକ୍କର ବାରନ୍ଡା, କ୍ଲବଘରେ ଆଶ୍ରେ ନେଇଛନ୍। ହେଲେ ଗାଈବଲଦ, ଛେଲମେଢ଼ି ଗୁହାଲ ଅଭାବୁ ଏହେଦେ ବି ବରଷାରେ ଭିଜୁଛନ୍। ଇ ଅସାହା ଦୁଖି ପରିବାରମାନେ ବରଷା ପାଏନ୍ରୁ ବଁଚ୍ବାର ଲାଗି ପଲିଥିନ୍ ଖଁଡ଼େ ପାଏବାକେ ରାଜସ୍ବ ନିରୀକ୍ଷକକଁର ଅଫିସକେ ଯାଇ ନିରାଶ ହେଇ ଘରକେ ଫିରୁଥିବାର କହିଛନ୍। ମହୁଲପାଲି ପଁଚେତ୍ର ବୁଦେଲବାହାଲ ଗଁାର ସୁରେଶ ଭୁଏ, ଉର୍କୁଲୁ ଭୁଏ, ପ୍ରମୋଦ କୁମୁରା, ରାଧେଶ୍ୟାମ ଭୁଏ, ମୁରଲୀ ଭୁଏ, ଗଣ୍ଡତୁରୁମ ଗଁାର ଜୟରାମ ରାଉତିଆ, କଏରା ରାଉତିଆ, ହେମବନ୍ତ ଷଡ଼ଙ୍ଗୀ, କପିଳ ସୁନା, ରାତ୍ର ବଣ୍ଡକି, ବ୍ରାହ୍ମଣତୁରୁର ତାରାଚାନ୍ଦ ସେଟ, ଦିଲୀପ ଦାଶ, ନାମ ମେହେର ସମେତ ମେହେନା, ଭୁତଲୋଡ଼, ଜାମପାଲି, ପଧାନପାଲି, କେଶଡ଼ିହି, ଟିହିକିପାଲି ଗଁାର ଅନେକ ଲୁକ୍କର ଘର ଗୁଟାମୁଟା ଭାଂଗି ଯାଇଛେ। ବଡ଼ଭାରି ହିସାବେ ମହୁଲପାଲି ଗଁାର ରୂପେଶ ପେରା ଆର ସମ୍ପଦ ଛୁଟିକଁର ଘର ଭାଂଗି ବିପଦ ଅବସ୍ତାରେ ରହିଛେ। ଇ ଦୁଇ ପରିବାରର ଲୋକ୍ ଉପେ ଶୂଇନ୍ ହେଇ ଭଂଗା ଘରେ ବିପଦ୍ ଅବସ୍ତାରେ ରହୁଛନ୍। ସେନ୍ତା ଖପରି ହିଟା ବରଷାରେ ଗଣ୍ଡତୁରୁମ କେନାଲରେ ଘାଇ ହେବାର ସଂଗେ ଫଟାମୁଣ୍ଡା ନାଲର ଉଛ୍ଲା ପାଏନ୍ ପଶି ଶତାଧିକ ଏକର ଜମିରେ ବାଲି ପାଟି ଦେଇଛେ। ଇ ବାବ୍ଦେ ମତାମତ ନେବାର ଲାଗି ଭେଡ଼େନ ତହସିଲଦାରକୁଁ ତାକର ମୋବାଇଲ ନମ୍ବରରେ ଯୋଗାଯୋଗ କରାଯାଇଥିଲେ ବି ମୋବାଇଲ ସୁଇଚ୍ ଅଫ୍ ଥିବାରଲାଗି ମତାମତ ନାଇଁ ମିଲିପାରି। ହେଲେ ଥାନୀୟ ପରଶାସନ ଅଂଚଲବାସୀକର କ୍ଷୟକ୍ଷତିର ସଠିକ୍ ଆକଲନ କରି ଯେତେ ଜଲଦି ହେବା ସରକାରୀ ସାହାଯ୍ ଯୁଗେଇ ଦେବାକେ ଅଂଚଲବାସୀ ଦାବି କରିଛନ୍।