ଲଣ୍ଡନ, ୭।୮- ଆଘାତଜନିତ ସମସ୍ୟା ଇଂଲଣ୍ଡ ଦ୍ରୁତ ବୋଲର ଓଲି ଷ୍ଟୋନ୍ ଲଡର୍ସରେ ଖେଳାଯିବାକୁ ଥିବା ଅଷ୍ଟ୍ରେଲିଆ ବିପକ୍ଷ ୨ୟ ଆଶେସ ଟେଷ୍ଟରୁ ବାଦ୍ ପଡ଼ିଛନ୍ତି। ଓ୍ବର୍କଶାୟର ପକ୍ଷରୁ ପ୍ରତିନିଧିତ୍ୱ କରୁଥିବା ଷ୍ଟୋନ୍ ଏଜ୍ବାଷ୍ଟନରେ ଅଭ୍ୟାସ କରୁଥିବାବେଳେ ପିଠି ଯନ୍ତ୍ରଣାଜନିତ ଆଘାତ ପାଇଥିଲେ ଏବଂ ତାଙ୍କୁ ୨ ସପ୍ତାହ ଲାଗି ବିଶ୍ରାମ ଦିଆଯାଇଛି। ଫଳରେ ଅଗଷ୍ଟ ୧୪ରୁ ଆରମ୍ଭ ହେବାକୁ ଥିବା ଆଶେସ ସିରିଜର ୨ୟ ମ୍ୟାଚ୍ରୁ ସେ ବାଦ୍ ପଡ଼ିବା ନିଶ୍ଚିତ ହୋଇଛି। ୨୫ ବର୍ଷୀୟ ଡାହାଣହାତୀ ଦ୍ରୁତ ବୋଲର ଓଲି ଆୟର୍ଲାଣ୍ଡ ବିପକ୍ଷ ଏକମାତ୍ର ଟେଷ୍ଟରେ ପଦାର୍ପଣ କରିଥିଲେ। ପ୍ରଥମ ମ୍ୟାଚ୍ରେ ପରାଜୟବରଣ କରିଥିବା ଘରୋଇ ଇଂଲଣ୍ଡ ଦଳ ପାଇଁ ଷ୍ଟୋନ୍ ବାଦ୍ ପଡ଼ିବା ଶକ୍ତ ଧକ୍କା ସଦୃଶ ହୋଇଛି। ପୂର୍ବରୁ ମଙ୍ଗଳବାର ସମାନ ଆଘାତଜନିତ କାରଣ ଲାଗି ବରିଷ୍ଠ ଦ୍ରୁତ ବୋଲର ଜେମ୍ସ ଆଣ୍ଡରସନ ୨ୟ ଟେଷ୍ଟରୁ ବାଦ୍ ପଡ଼ିଥିଲେ। ଆଣ୍ଡରସନଙ୍କ ସ୍ଥାନରେ ଷ୍ଟୋନ ଖେଳିବା ଏକପ୍ରକାର ନିଶ୍ଚିତ ହୋଇଥିଲା। ଅନ୍ୟତମ ଦ୍ରୁତ ବୋଲର ମାର୍କ ଉଡ୍ ପୁରା ସିଜନରୁ ବାଦ୍ ପଡ଼ିସାରିଥିବାବେଳେ ଏବେ ଜୋଫ୍ରା ଆର୍ଚର ଲଡର୍ସ ଟେଷ୍ଟ ଖେଳିବା ସମ୍ଭାବନା ସୃଷ୍ଟି ହୋଇଛି। ଜୋଫ୍ରା ମଙ୍ଗଳବାର ସସେକ୍ସ ୨ୟ ଦଳ ପକ୍ଷରୁ ପ୍ରତିନିଧିତ୍ୱ କରି ଗ୍ଲୋଷ୍ଟରଶାୟର ବିପକ୍ଷରେ ୬ ଉଇକେଟ୍ ଓ ଶତକ ହାସଲ କରିଥିଲେ।