ଲଣ୍ଡନ,୧୪।୩: ଉତ୍ତର-ପୂର୍ବ ଲଣ୍ଡନରେ ଜନ୍ମର ମାତ୍ର କେଇ ମିନିଟ୍ ପରେ ଜଣେ ଶିଶୁ କରୋନା ଭାଇରସରେ ପୀଡିତ ଥିବା କୁହାଯାଉଛି। ବିଶ୍ୱର ସେ ସର୍ବ କନିଷ୍ଠ କରୋନା ସଂକ୍ରମିତ ରୋଗୀ ବୋଲି ଜଣାପଡିଛି। ପ୍ରାୟ ୨ ଦିନ ତଳେ ଜଣେ ଗର୍ଭବତୀ ନର୍ଥ ମିଡିଲସେକ୍ସ ୟୁନିଭର୍ସିଟି ହସ୍ପିଟାଲରେ ସନ୍ତାନ ପ୍ରସବ ପାଇଁ ପହଞ୍ଚିଥିଲେ। ସେ ନିମୋନିଆରେ ପୀଡ଼ିତ ଥିବାରୁ ତାଙ୍କର କରୋନା ପରୀକ୍ଷା କରାଯାଇଥିଲା। ଏହାପରେ ସେ କରୋନାରେ ପୀଡ଼ିତ ଥିବା ଜଣାପଡିଥିଲା। କିନ୍ତୁ ସେ ଯେଉଁ ସନ୍ତାନ ପ୍ରସବ କରିଥିଲେ ମାତ୍ର ଅଳ୍ପ କେତେ ସମୟ ମଧ୍ୟରେ ଶିଶୁଟି ମଧ୍ୟ କରୋନା ଭାଇରସରେ ସଂକ୍ରମିତ ହୋଇଥିବା ଜଣାପଡିଥିଲା। ଏବେ ଉକ୍ତ ଶିଶୁ ଓ ମା’ଙ୍କୁ ଅଲଗା ଅଲଗା ରଖାଯାଇ ଚିକିତ୍ସା କରାଯାଉଛି। ଶିଶୁଟି କରୋନା ସଂକ୍ରମିତ ସର୍ବକନିଷ୍ଠ ରୋଗୀ ବୋଲି କୁହାଯାଉଛି।