ନୂଆଦିଲ୍ଲୀ,୧୩-୯(ପି.ଟି.):ଲଦାଖରେ ଭାରତ-ଚାଇନା ସେନା ପୁଣି ମୁହାଁମୁହିଁ ହୋଇଛନ୍ତି। ପାଙ୍ଗୋଙ୍ଗ୍ ହ୍ରଦ କୂଳର ଉତ୍ତର ଭାଗରେ ବୁଧବାର ଭାରତୀୟ ଯବାନମାନେ ପାଟ୍ରୋଲିଂ କରୁଥିବାବେଳେ ଚାଇନାର ପିପୁଲ୍ସ ଲିବରେଶନ ଆର୍ମି (ପିଏଲ୍ଏ) ସେମାନଙ୍କ ଉପସ୍ଥିତିକୁ ନେଇ ଆପତ୍ତି ଉଠାଇଥିଲା। ଏହାକୁ ନେଇ ଦୁଇ ସେନା ମଧ୍ୟରେ ହାତାହାତି ହୋଇଥିଲା। ପ୍ରତିନିଧି ମଣ୍ଡଳସ୍ତରୀୟ ଆଲୋଚନା ପରେ ବିବାଦର ସମାଧାନ ହୋଇଥିଲା। ବିବାଦ ପରେ ସୀମାରେ ଯବାନଙ୍କ ସଂଖ୍ୟା ବଢ଼ାଇ ଦିଆଯାଇଥିବା ସେନା ପକ୍ଷରୁ ଗୁରୁବାର କୁହାଯାଇଛି।
ମିଳିଥିବା ସୂଚନାନୁସାରେ ଭାରତୀୟ ଯବାନମାନେ ବୁଧବାର ପୂର୍ବ ଲଦାଖର ପାଙ୍ଗୋଙ୍ଗ୍ ହ୍ରଦ ନିକଟରେ ପାଟ୍ରୋଲିଂ କରୁଥିଲେ, ଯାହାର ଦୁଇ-ତୃତୀୟାଂଶ ଭାଗ ଚାଇନା ନିୟନ୍ତ୍ରଣରେ ରହିଛି। ଏହି ସମୟରେ ପିଏଲ୍ଏ ସୈନ୍ୟମାନଙ୍କ ସହ ସେମାନେ ସାମ୍ନାସାମ୍ନି ହୋଇଥିଲେ। ପିଏଲ୍ଏ ସୈନ୍ୟ ସେଠାରେ ଭାରତୀୟ ଯବାନଙ୍କ ଉପସ୍ଥିତିକୁ ନେଇ ପ୍ରଶ୍ନ ଉଠାଇଥିଲେ। ଯବାନମାନେ ଏହାକୁ ଖାତିର କରି ନ ଥିଲେ। ଫଳରେ ଦୁଇଦେଶର ସାମରିକ ବଳ ମଧ୍ୟରେ ହାତାହାତି ହୋଇଥିଲା। ଏହାକୁ ନେଇ ଉଭୟ ପଟୁ ଅଧିକ ସଂଖ୍ୟକ ସୈନ୍ୟଙ୍କୁ ମୁତୟନ କରାଯାଇଥିଲା। ଉଭୟ ପଟୁ ପ୍ରତିନିଧିସ୍ତରୀୟ ଆଲୋଚନା ପରେ ସ୍ଥିତି ଶାନ୍ତ ପଡ଼ିଥିଲା। ଦୁଇଦେଶ ମଧ୍ୟରେ ସୀମା ସ୍ପଷ୍ଟ ନିର୍ଦ୍ଧାରିତ ହୋଇ ନ ଥିବାରୁ ଏହାକୁ ନେଇ ବିଭେଦ ଯୋଗୁ ଏପରି ସ୍ଥିତି ଉପୁଜିଥିବା କୁହାଯାଉଛି। ଭାରତ-ଚାଇନାର ସେନା ଓ ବାୟୁସେନା ମଧ୍ୟରେ ହେବାକୁ ଥିବା ପ୍ରଥମ ମିଳିତ ସମରାଭ୍ୟାସର ମାସକ ପୂର୍ବରୁ ଏଭଳି ବିବାଦ ଦେଖାଦେଇଛି।
ପ୍ରକାଶ ଯେ, ଭାରତ-ଚାଇନା ମଧ୍ୟରେ ପ୍ରାୟ ୪,୦୦୦ କି.ମି. ବିସ୍ତୃତ ସୀମାକୁ ନେଇ ଦୁଇଦେଶ ମଧ୍ୟରେ ବିବାଦ ଲାଗିରହିଛି। ଚାଇନା ଅରୁଣାଚଳ ପ୍ରଦେଶକୁ ଦକ୍ଷିଣ ଲଦାଖର ଅଂଶ ବୋଲି କହୁଥିବାବେଳେ ୧୯୬୨ରୁ ଚାଇନା ଅଧିକୃତ ଅକ୍ସାଇ ଚୀନକୁ ଭାରତ ନିଜର ବୋଲି ଦାବି କରୁଛି। ୨୦୧୭ରେ ଭୁଟାନର ଅନୁରୋଧକ୍ରମେ ଭାରତୀୟ ସେନା ଡୋକ୍ଲାମରେ ଚାଇନାର ଏକ ବିବାଦୀୟ ରାସ୍ତା ନିର୍ମାଣକୁ ବିରୋଧ କରିଥିଲା। ଏହାକୁ ନେଇ ଭାରତ-ଚାଇନା ମଧ୍ୟରେ ପ୍ରାୟ ତିନିମାସ ଧରି ଚରମ ଉତ୍ତେଜନା ଦେଖାଦେଇଥିଲା। ଗତ ଅଗଷ୍ଟ ୫ରେ କେନ୍ଦ୍ର ସରକାର ଜମ୍ମୁ-କଶ୍ମୀରକୁ ଦୁଇଭାଗ କରି ଲଦାଖକୁ ସ୍ବତନ୍ତ୍ର କେନ୍ଦ୍ରଶାସିତ ଅଞ୍ଚଳରେ ପରିଣତ ପାଇଁ ନିଷ୍ପତ୍ତି ନେଇଥିବାବେଳେ ଏଥିଯୋଗୁ ଚାଇନାର କ୍ଷେତ୍ରୀୟ ସାର୍ବଭୌମତ୍ୱ ନୂ୍ୟନ ହେଉଥିବା ଦର୍ଶାଇ ବେଜିଂ ଏହାକୁ ବିରୋଧ କରିଥିଲା।